បន្ទាប់ពីផ្ទុះការតវ៉ា ប៉េអឹមខេត្តកំពង់ស្ពឺ ១២០នាក់ ទទួលបានលុយឧបត្ថម្ភ ការពារថ្ងៃបោះឆ្នោត ពីលោកមេបញ្ជាការវិញហើយ
ភ្នំពេញ៖ បន្ទាប់ពីផ្ទុះរឿងអាស្រូវ របស់មន្ត្រីអាវុធហត្ថ ខេត្តកំពង់ស្ពឺ និងក្រុមអធិការកិច្ច កងរាជអាវុធហត្ថ លើផ្ទៃប្រទេស ចុះធ្វើអធិការកិច្ច គឺលោកឧត្តមសេនីយ៍ត្រី ជូ សារុន មេបញ្ជាការ កងរាជអាវុធហត្ថ ខេត្តកំពង់ស្ពឺ បានបើកថវិកាឧបត្ថម្ភ អន្តរាគមន៍បោះឆ្នោតជ្រើសតាំង តំណាងរាស្ត្រ នីតិកាលទី៦ ឆ្នាំ២០១៨ ដល់មន្ត្រីអាវុធហត្ថ ចំនួន១២០នាក់ហើយ។ នេះបើតាមមន្ត្រីជាន់ខ្ពស់ កងរាជអាវុធហត្ថ លើផ្ទៃប្រទេស បានថ្លែងថាលុយជាច្រើនលានរៀលដែលលោក ជូ សារុន ប្រុងស៊ីតែមិនដាច់បែកធ្លាយដល់ក្រុមអ្នកសារព័ត៌មានប្រចាំខេត្តកំពង់ស្ពឺជាច្រើនអង្គភាពហើយរិះគន់ជ្រាបដល់ថ្នាក់លើនោះ។
លោកឧត្តមសេនីយ៍ត្រី ជូ សារុន បានរងការចោទប្រកាន់ ពីមន្ត្រីនៅក្រោមឱវាទ ពាក់ព័ន្ធការស៊ីដាច់អង្ករឧបត្ថម្ភ និងស៊ីដាច់លុយការពារ ការបោះឆ្នោតជ្រើសតាំងតំណាងរាស្ត្រ នីតិកាលទី៦ រួមទាំងភាពមិនប្រក្រតី មួយចំនួនទៀតថែមទៀតផងនោះ។
ដោយសារតែផ្ទុះរឿងអាស្រូវជ្រាបដល់ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងមេបញ្ជាការ កងរាជអាវុធហត្ថ លើផ្ទៃប្រទេសនោះក៏ បានបញ្ជាឲ្យលោកឧត្តមសេនីយ៍ត្រី ស៊ឹម ហុង ដឹកនាំគណៈកម្មការចំពោះកិច្ច ចុះធ្វើអធិការកិច្ច ចំពោះករណីនេះ កាលពីថ្ងៃទី០២ និងថ្ងៃទី០៣រហូតដល់ថ្ងៃទី០៥ ខែតុលា ឆ្នាំ២០១៨នេះហើយមិនទាន់ដឹងថាទទួលលិទ្ធិផលបែបណានោះទេ។
បើតាមប្រភពពីមន្ត្រីជាន់ខ្ពស់ដដែល បានបញ្ជាក់ថា អាវុធហត្ថខេត្តកំពង់ស្ពឺ បានបើកថវិកាឧបត្ថម្ភអន្តរាគមន៍ សម្រាប់ការការពារ ការបោះឆ្នោតជ្រើសតាំង តំណាងរាស្ត្រ នីតិកាលទី៦ ឆ្នាំ២០១៨ ដល់មន្ត្រីអាវុធហត្ថចំនួន១២០នាក់ ដោយក្នុងម្នាក់បាន ១០៥.០០០រៀល និងថវិកាឧបត្ថម្ភ សម្រាប់ការការពារ ការបោះឆ្នោតជ្រើសតាំង សមាជិកព្រឹទ្ធសភា ក្នុងម្នាក់ ៧០.០០០ រៀល សរុបទាំងអស់ ១៧៥.០០០ រៀល ហើយការបើកថវិកាឧបត្ថម្ភនេះ គឺចាប់ពីថ្ងៃទី០៤ ខែតុលា រហូតដល់ថ្ងៃទី០៨ ខែតុលា ឆ្នាំ២០១៨ដោយលោកជូ សារុន ស៊ីមិនទាន់ដាច់បន្ទាប់ពីព័ត៌មាននេះត្រូវបានផ្សព្វផ្សាយ។
ចំណែកមន្ត្រីអាវុធហត្ថខេត្តកំពង់ស្ពឺដែលទើបតែ បានទទួលក្រោយបែកធ្លាយរឿងនេះក៏បាន ថ្លែងអំណរគុណ យ៉ាងជ្រាលជ្រៅ ដល់នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងមេបញ្ជាការ កងរាជអាវុធហត្ថ លើផ្ទៃប្រទេស ដែលបានជួយអន្តរាគមន៍ ក្នុងរឿងនេះ រហូតពួកគាត់ទទួលបានថវិកា ឧបត្ថម្ភអន្តរាគមន៍ ការការពារក្នុងអំឡុងថ្ងៃបោះឆ្នោត។
រីឯគណៈកម្មការចំពោះកិច្ច ដែលចុះធ្វើអធិការកិច្ច នៅទីបញ្ជាការដ្ឋាន កងរាជអាវុធហត្ថ ខេត្តកំពង់ស្ពឺ ដែលដឹកនាំដោយ លោកឧត្តមសេសនីយ៍ត្រី ស៊ឹម ហុង គឺនៅមិនទាន់បង្ហាញ លទ្ធផលនៅឡើយទេប្រើរយៈពេល០៤ថ្ងៃមកហើយនោះ ខណៈដែលកាលពីថ្ងៃទី០២ ខែតុលាជាថ្ងៃដំបូងនោះមន្ត្រីតូចតាចអោយចូលនិងបញ្ជាការរងមូលដ្ឋានតាមបណ្តាលស្រុកមួយចំនួន ស្រាប់តែថ្ងៃបន្ទាប់មកទៀតគេអោយចូលត្រឹមតែមេបញ្ជាការមូលដ្ឋានក្រុង ស្រុក ប្រធានមន្ទីរ នាយការិយាល័យប៉ុណ្ណោះទេ។
គួររំលឹកផងដែលថាកាលពីពេលកន្លងទៅបានបែកធ្លាយព័ត៌មានថា លោកឧត្តមសេនីយ៍ត្រី ជូ សារុនមេបញ្ជាការកងរាជអាវុធហត្ថខេត្តកំពង់ស្ពឺ បានស៊ីដាច់អង្ករឧបត្ថម្ភរបស់ ឯកឧត្តម ហ៊ុន ម៉ានី តំណាងរាស្ត្រ មណ្ឌលខេត្តកំពង់ស្ពឺ និងជាប្រធានសហភាពសហព័ន្ធយុវជនកម្ពុជា ដែលបានផ្តល់ជូនកម្លាំងកងរាជ អាវុធហត្ថខេត្តកន្លងទៅនិងថែមទាំងស៊ីដាច់លុយការពារ ការបោះឆ្នោតជ្រើសតាំង តំណាងរាស្ត្រ នីតិកាលទី៦លុយរាប់លានរៀលថែមទៀតផង ទើបបែកធ្លាយដឹងដល់ក្រុមអ្នកសារព័ត៌មានប្រចាំខេត្តកំពង់ស្ពឺ ហើយបន្ទាប់ពីបែកធ្លាយមន្ត្រីអោបដៃអោបជើង(អាម៉ី អាថោង)មួយក្តាប់តូចនិយាយថាវាជារឿងរបស់មេបញ្ជាការជាអ្នកសម្រេច មិនបាច់សួរយោបល់អ្នកណាក៏បានដែរ។
ប្រភពដដែល បានបន្តថា លោកឧត្តមសេនីយ៍ត្រី ជូ សារុន បានឱ្យមនុស្សជំនិតរបស់ខ្លួន ដើរប្រមូលលុយនិងគាបសង្កត់អ្នករកស៊ី ដោយក្នុងនោះឱ្យ លោកវរសេនីយ៍ទោ លឹម ឧសភា ប្រមូលលុយពីក្រុមឈ្មួញឈើ និងទំនិញផ្សេងៗ នៅផ្លូវជាតិលេខ៤ ស្ទើរតែទូរទាំងខេត្តតែម្តងសូម្បីតែរ៉ឺម៉កដឹកធ្យូងក៏មិនអោយរំលងដែរ ចុះទំរាំអ្នករកស៊ីឈើឈ្មោះណុប ឌីហៅឆើត ជើងខ្លាំងប្រចាំខេត្តចំនួន៣ក្នុងមួយខែៗមិនតិចជាង៣០០០ដុល្លារនោះទេ។ ចំណែកលោកវរសេនីយ៍ទោ គង់ វាសនា រហ័សនាមហៅ មហាមេឃវិញដើរ ប្រមូលលុយផ្លូវជាតិលេខ៥ស្រុកឧដុង្គ ស្រុកថ្ពងដែលសំបូរបទល្មើសនោះ ដោយដេញចាប់ឡាន នៅស្នាក់ការអាវុធហត្ថ ៥៥១ នៅស្រុកឧដុង្គ មហាមេឃទៅហើយគ្រាន់តែឮឈ្មោះក៏គេខ្លាចដែរ។
កន្លងមកពាក់ពន្ធ័និងករណីខាងលើនេះដែល លោកឧត្តមសេនីយ៍ត្រី ជូ សារុន មេបញ្ជាការ កងរាជអាវុធហត្ថ ខេត្តកំពង់ស្ពឺ បានបដិសេធថា លោកមិនបានប្រព្រឹត្ត ដូចការចោទប្រកាន់នោះទេ។
ទោះយ៉ាងនេះក្តីមន្ត្រីអាវុធហត្ថជាច្រើនសប្បាយចិត្តខ្លាំងក្នុងការដែលថ្នាក់លើចុះមកធ្វើអធិកិច្ចលោកមេបញ្ជាការជូ សារុននេះណាស់ ប៉ុន្តែក៏មានមន្ត្រីមួយក្តាប់តូច មិនសប្បាយចិត្តនោះទេក៏ព្រោះតែប្រសិនបើថ្នាក់លើរកឃើញនូវកំហុសរបស់លោកជូ សារុនមែននោះពួកគេក៏លែងមានឥទ្ធិពលដែរ៕ (សុភា)
