ព្រះមហាក្សត្រកម្ពុជាថ្លែងអំណរព្រះគុណប្រធានាធិបតីអាមេរិកចំពោះសារអបអរបុណ្យឯករាជ្យជាតិកម្ពុជា
| ព័ត៌មានជាតិ
SHARE

(ភ្នំពេញ)៖ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្តារៈដ៏ខ្ពង់ខ្ពស់បំផុត ទ្រង់បានសព្វព្រះរាជហឫទ័យផ្ញើរព្រះរាជសារថ្លែងអំណរគុណទៅកាន់ ប្រធានាធិបតីសហរដ្ឋអាមេរិកចំពោះលិខិត ថ្វាយព្រះពរដែល ឯកឧត្តម ដូណាល់ ត្រាំ (DONALD J. TRUMP) បានថ្វាយទ្រង់ ក្នុងឱកាសដែលព្រះរាជាណាចក្រកម្ពុជាកំពុងអបអរ ខួបលើកទី ៦៦ នៃទិវាបុណ្យឯករាជ្យជាតិ ៩វិច្ឆិកា។

ព្រះករុណា ព្រះមហាក្សត្រ នៃព្រះរាជាណាចក្រកម្ពុជា ទ្រង់មានព្រះរាជអង្កាទៅកាន់ ប្រធានាធិបតីសហរដ្ឋអាមេរិក តាមរយៈព្រះរាជសារនោះថា ខណៈពេលដែលទទួលបាននូវលិខិតថ្វាយព្រះពរពីសំណាក់ឯកឧត្តម ដូណាល់ ត្រាំ (DONALD J. TRUMP) នោះ គឺ ក្នុងនាមជាព្រះមហាក្សត្រនៃព្រះរាជាណាចក្រកម្ពុជា ទ្រង់ពិតជាមានព្រះជំនឿជឿជាក់យ៉ាងមុតមាំថា ទំនាក់ទំនងមិត្តភាព និងកិច្ចសហប្រតិបត្តិការទ្វេភាគីកម្ពុជា-អាមេរិក នឹងនៅតែបន្តកាន់តែស៊ីជម្រៅរីកចម្រើនបម្រើឱ្យ ផលប្រយោជន៍ និងភាពសុខដុមរមនានៃប្រជាជននៃប្រទេសទាំងពីរ។

នេះបើយោងតាមព្រះរាជសារដែលចេញផ្សាយនៅលើគេហទំព័រផ្លូវការរបស់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដែលមានឈ្មោះថា « https://www.norodomsihamoni.org/kh »។

សូមជម្រាបថា កាលពីថ្ងៃទី២៥ ខែតុលា ឆ្នាំ២០១៩ កន្លងទៅថ្មីៗនេះ ឯកឧត្តម ដូណាល់ ត្រាំ (DONALD J. TRUMP)
ប្រធានាធិបតីសហរដ្ឋអាមេរិក បានផ្ញើលិខិតថ្វាយព្រះពរ ថ្វាយព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា និងប្រជាជនកម្ពុជា ក្នុងឱកាសប្រារព្ធខួបលើកទី៦៦ នៃទិវាបុណ្យឯករាជ្យជាតិ ថ្ងៃទី៩ ខែវិច្ឆិកា ឆ្នាំ២០១៩។នៅក្នុងលិខិតនោះ ប្រធានាធិបតីសហរដ្ឋអាមេរិកបានបញ្ជាក់ ថា «សហរដ្ឋអាមេរិក ស្ថិតនៅជាមួយ ប្រជាជនកម្ពុជា ដែលប្រាថ្នាចង់បាននូវព្រះរាជណាចក្រ ដែលប្រកបដោយសន្ដិសុខ វិបុលភាព ប្រជាធិបតេយ្យ និងអធិបតេយ្យភាព»៕


Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation