បេក្ខជនអនុប្រធានាធិបតីអាមេរិក លោកស្រី ខាម៉ាឡា ហារីស ផ្អាកការធ្វើដំណើរទៅឃោសនាបោះឆ្នោតបន្ទាប់ពីបុគ្គលិក២នាក់បានឆ្លងវីរុសកូវីដ១៩
អាមេរិក៖បេក្ខជនអនុប្រធានាធិបតីអាមេរិកមកពីគណបក្សប្រជាធិបតេយ្យ លោកស្រី ខាម៉ាឡា ហារីស (Kamala Harris) នឹងផ្អាកការធ្វើដំណើរទៅឃោសនាស្វែងរកសំឡេងឆ្នោតរហូតដល់ថ្ងៃចន្ទបន្ទាប់ពីបុគ្គលិក២នាក់នៅក្នុងក្រុមយុទ្ធនាការឃោសនាបោះឆ្នោតរបស់លោកស្រីបានឆ្លងវីរុសកូវីដ១៩។
ក្រុមមន្ត្រីយុទ្ធនាការឃោសនាបោះឆ្នោតបាននិយាយថា នាយកផ្នែកទំនាក់ទំនងរបស់ លោកស្រី ហារីស និងបុគ្គលិកបម្រេីការលេីយន្តហោះម្នាក់បានធ្វេីតេស្តិ៍វិជ្ជមានវីរុសកូវីដ១៩កាលពីថ្ងៃពុធ។
ប៉ុន្តែមនុស្សទាំង២នាក់នោះមិនបានប៉ះពាល់ លោកស្រី ហារីស ឬបេក្ខជនប្រធានាធិបតី លោក ចូ បៃដិន (Joe Biden) ទេក្នុងរយៈពេល៤៨ម៉ោងមុនពួកគេត្រូវបានរកឃេីញថាមានផ្ទុកវីរុសកូវីដ១៩។
ប្រធានក្រុមយុទ្ធនាការឃោសនាបោះឆ្នោតរបស់ លោក បៃដិន បាននិយាយថា ដោយសារ លោកស្រី ហារីស និង លោក បៃដិន មិនបានប៉ះពាល់ជាមួយបុគ្គលិកទាំង២នាក់នោះក្នុងរយៈពេល២ថ្ងៃមុនធ្វេីតេស្តិ៍វិជ្ជមានវីរុសនេះ ដូច្នេះហេីយក្រុមវេជ្ជបណ្ឌិត «មិនតម្រូវឲ្យពួកគេទាំង២នាក់នៅដាច់ដោយឡែកពីគេទេ»។
គួរកត់សម្គាល់ថា យុទ្ធនាការឃោសនាស្វែងរកសំឡេងឆ្នោតរបស់ លោក បៃដិន បានសង្កត់ធ្ងន់លើសុវត្ថិភាពផ្នែកសុខភាពដែលជាផ្នែកមួយនៃយុទ្ធសាស្ត្រនយោបាយរបស់ខ្លួនក្នុងកិច្ចប្រឹងប្រែងមួយដើម្បីបង្ហាញពីចំណុចផ្ទុយគ្នាជាមួយប្រធានាធិបតី ត្រាំ។
សហការីមួយចំនួនរបស់គណបក្សសាធារណរដ្ឋ និងសេតវិមាន រួមនិង លោក ត្រាំ ផ្ទាល់បានធ្វើតេស្តិ៍វិជ្ជមានវីរុសកូវីដ១៩ក្នុងប៉ុន្មានសប្តាហ៍ថ្មីៗនេះ៕