អឺរ៉ុប៖សហភាពអ៊ឺរ៉ុប  និងអង់គ្លេស កាលពីថ្ងៃព្រហស្បតិ៍ បានដាក់ទណ្ឌកម្មលើក្រុមមន្ត្រីកំពូលៗរបស់រុស្ស៊ីដែលស្និទ្ធនឹងប្រធានាធិបតី រុស្ស៊ី  លោក  វ្លាឌីមៀ  ពូទីន  (Vladimir Putin) ដេីម្បីឆ្លើយតបចំពោះការបំពុលមេដឹកនាំប្រឆាំងក្នុងប្រទេសរុស្ស៊ី  លោក  អាឡិចស៊ី  ណាវ៉ាល់នី  (Alexei Navalny) កាលពីខែសីហា។

ត្រូវបានជំរុញដោយប្រទេស បារាំង  និងអាល្លឺម៉ង់ជាកន្លែងដែល លោក  ណាវ៉ាល់នី  បានទទួលការព្យាបាលបន្ទាប់ពីបានធ្លាក់ខ្លួនឈឺក្នុងអំឡុងពេលជិះយន្តហោះក្នុងស្រុកមួយក្នុងប្រទេសរុស្ស៊ី,  សហភាពអឺរ៉ុប  និងអង់គ្លេសបានកំណត់គោលដៅដាក់ទណ្ឌកម្មទៅលើក្រុមមន្ត្រីកំពូលៗរបស់រុស្ស៊ីចំនួន៦នាក់  និងមជ្ឈមណ្ឌលស្រាវជ្រាវវិទ្យាសាស្ត្ររបស់រុស្ស៊ីដែលត្រូវបានចោទប្រកាន់ថាបានប្រេីប្រាស់សារធាតុគីមីដែលគេហាមឃាត់ទៅបំពុល  លោក  ណាវ៉ាល់នី  អាយុ៤៤ឆ្នាំដែលជាអ្នកនយោបាយបក្សប្រឆាំង។ 

ប្រធានាធិបតីបារាំង  លោក  អេម៉ានុយអែល ម៉ាក្រុង  (Emmanuel Macron) បានប្រាប់ក្រុមអ្នកយកព័ត៌មាននៅឯកិច្ចប្រជុំកំពូលសហភាពអឺរ៉ុបថា  «សហភាពអឺរ៉ុបនៅតែប្តេជ្ញាប្រយុទ្ធប្រឆាំងនឹងការប្រេីប្រាស់អាវុធគីមី»  ហេីយលោកក៏បានអំពាវនាវឱ្យមានការពិភាក្សាជាមួយទីក្រុងម៉ូស្គូផងដែរ។ 

វិមានក្រឹមឡាំងបានថ្កោលទោសការដាក់ទណ្ឌកម្មនេះដោយបានប្រកាសថានោះជាវិធានការធ្វេីឡេីងដោយចេតនា  និងបែបអមិត្តប្រឆាំងនឹងទីក្រុងម៉ូស្គូ  និងបានសន្យាសងសឹកវិញ។ 

សហភាពអឺរ៉ុបលេីកនេះបានកំណត់គោលដៅដាក់ទណ្ឌកម្មទៅលេីក្រុមមន្ត្រីរុស្ស៊ីតែម្ដងដែលខ្លួនជឿថាបានរៀបចំផែនការ  និងជួយគាំទ្រការវាយប្រហារដោយការបំពុលនេះ  ដែលនេះគឺខុសពីករណីបំពុលអតីតចារកម្មរុស្ស៊ីនៅអង់គ្លេសក្នុងឆ្នាំ២០១៨ដែលនៅពេលនោះសហភាពអឺរ៉ុបបានចំណាយពេលជិតមួយឆ្នាំទម្រាំសម្រេចចិត្តដាក់ទណ្ឌកម្មក្រុមភ្នាក់ងារស៊ើបការណ៍យោធារបស់រុស្ស៊ី៕