ជប៉ុន និងអាមេរិកចាប់ផ្តើមធ្វើសមយុទ្ធយោធាដ៏ធំមួយក្នុងគ្រាដែលការព្រួយបារម្ភអំពីចិនមានការកើនឡើង
សាច់រឿង៖ប្រទេសជប៉ុន និងអាមេរិកបានចាប់ផ្តើមធ្វើសមយុទ្ធយោធាផ្លូវអាកាស, ផ្លូវសមុទ្រ និងផ្លូវគោកកាលពីថ្ងៃច័ន្ទនៅជុំវិញប្រទេសជប៉ុនដែលជាការបង្ហាញកម្លាំងនៅចំពោះមុខសកម្មភាពយោធាចិនដែលចេះតែកើនឡើងនៅក្នុងតំបន់។
សមយុទ្ធយោធារួមគ្នានេះដែលមានឈ្មោះថា ឃីនសត (Keen Sword) គឺជាសមយុទ្ធដ៏ធំលើកដំបូងចាប់តាំងពី លោក យ៉ូស៊ីហ៊ីដេ ស៊ូហ្គា (Yoshihide Suga) បានក្លាយជានាយករដ្ឋមន្រ្តីរបស់ជប៉ុនកាលពីខែមុនជាមួយនឹងការប្តេជ្ញាបន្តការកសាងកម្លាំងយោធាសំដៅប្រឆាំងនឹងចិនដែលបានទាមទារយកប្រជុំកោះដែលគ្រប់គ្រងដោយជប៉ុននៅសមុទ្រចិនខាងកើត។
សមយុទ្ធយោធាឃីនសត (Keen Sword) ដែលធ្វើឡើងរៀងរាល់២ឆ្នាំម្តងនេះមានការចូលរួមពីនាវាចម្បាំងរាប់សិបគ្រឿង, យន្ដហោះរាប់រយ និងទាហានចំនួន៤ម៉ឺន៦ពាន់នាក់មកពីប្រទេសជប៉ុន និងអាមេរិក ហេីយត្រូវធ្វេីឡេីងរហូតដល់ថ្ងៃទី៥ ខែវិច្ឆិកា។
លោក ស៊ូហ្គា នៅខែនេះបានបំេញទស្សនកិច្ចនៅប្រទេសវៀតណាម និងឥណ្ឌូនេស៊ីដែលជាផ្នែកមួយនៃកិច្ចខិតខំប្រឹងប្រែងរបស់ជប៉ុនក្នុងការជំរុញទំនាក់ទំនងជាមួយសម្ព័ន្ធមិត្តសំខាន់ៗនៅអាស៊ីអាគ្នេយ៍ក្នុងគ្រាដែលឥទ្ធិពលរបស់ចិនក្នុងតំបន់កាន់តែកេីនឡេីង។
ជប៉ុនកំពុងមានការព្រួយបារម្ភជាពិសេសអំពីការកេីនឡេីងនៃសកម្មភាពកងទ័ពជើងទឹកចិនជុំវិញប្រជុំកោះមានជម្លោះនៅសមុទ្រចិនខាងកើតដែលទីក្រុងតូក្យូហៅថាសេនកាគុ (Senkaku) ហេីយទីក្រុងប៉េកាំងហៅថា ដ្យៅយូ (Diaoyu)។
ប៉ុន្តែប្រទេសចិនបាននិយាយថាចេតនារបស់ខ្លួននៅក្នុងតំបន់នោះគឺមានសន្តិភាពទេ៕