សាច់រឿង៖ក្រុមអ្នកតវ៉ា​ នៅថ្ងៃអង្គារនេះ បានប្រមូលផ្តុំគ្នានៅជិតវិមាននាយករដ្ឋមន្រ្តីអាមេនី ស្ថិតនៅក្នុងរដ្ឋធានីយ៉េរ៉េវ៉ាន់​ (Yerevan) គឺប៉ុន្មានម៉ោងបន្ទាប់ពីកិច្ចព្រមព្រៀងសន្តិភាពរវាងអាមេនី​ និងអាស៊ែបៃហ្សង់​ ត្រូវបានប្រកាស។

នៅក្នុងវីដេអូរបស់ប្រព័ន្ធផ្សព្វផ្សាយក្នុងស្រុក​ គេឃេីញមនុស្សមួយក្រុមបានធាក់ទ្វារកញ្ចក់​ ហើយសម្រុកចូលទៅក្នុងវិមានរដ្ឋាភិបាលនៅក្នុងរដ្ឋធានីយ៉េរ៉េវ៉ាន់​ ដោយទាមទារជួបនាយករដ្ឋមន្រ្តីអាមេនី​ លោក​ នីកូល​ ផាស៊ីនយ៉ាន​ (Nikol Pashinyan)។ 

ក្រុមអ្នកតវ៉ាបានវាយបំបែកទ្វារ​ និងគ្រឿងសង្ហារិមនៅក្នុងបន្ទប់ប្រជុំ។ នាយករដ្ឋមន្រ្តីអាមេនី​បាននិយាយថាអ្នកដែលពាក់ព័ន្ធនឹងចលាចលនេះនឹងត្រូវទទួលទោសយ៉ាងធ្ងន់ធ្ងរ។

ប្រទេសអាមេនី,​ អាស៊ែបៃហ្សង់​ និងរុស្ស៊ី​ បានប្រកាសនៅថ្ងៃអង្គារនេះថា​ ពួកគេបានចុះហត្ថលេខាលើកិច្ចព្រមព្រៀងដើម្បីបញ្ចប់ជម្លោះយោធាពាក់ព័ន្ធនឹងតំបន់ណាហ្គ័រណូ​ ការ៉ាបាក់​ (Nagorno-Karabakh) បន្ទាប់ពីមានការបង្ហូរឈាមអស់រយៈពេលជាងមួយខែ។

ការប្រកាសនេះបានធ្វើឡើងបន្ទាប់ពីមានការប្រយុទ្ធគ្នាដ៏ខ្លាំងក្លា​អស់រយៈពេល៦សប្ដាហ៍​ និងការរុលទៅមុខមិនឈប់របស់កងកម្លាំងអាស៊ែបៃហ្សង់៕