អគ្គបញ្ជាការដ្ឋានកងទ័ពជើងគោកបើកវគ្គហ្វឹកហ្វឺនជំនាញបាញ់គ្រាប់ពិត បើករថក្រោះ និងរថពាសដែក ដល់យោធិនវ័យក្មេង
អត្ថបទ៖ មួង សុវណ្ណារិទ្ធ
កំពត៖ លោកឧត្តមសេនីយ៍ឯក ម៉ៅ សុផាន់ មេបញ្ជាការរងកងទ័ពជើងគោក មេបញ្ជាការកងពលតូចលេខ ៧០បានអញ្ជើញចុះទៅសំណេះសំណាល វាយតម្លៃការងារ និងត្រួតពិនិត្យការសាកល្បងបាញ់គ្រាប់ពិតរបស់យោធិនដែលកំពុងតែហ្វឹកហ្វឺនបណ្តុះបណ្តាលបើកបរជំនាញរថក្រោះ T55 និងជំនាញរថពាសដែក BMP1 នៅសាលាហ្វឹកហ្វឺនតេជោសែន ជុំគិរី របស់កងពលតូចលេខ៧០ ខេត្តកំពត។
លោកឧត្តមសេនីយ៍ឯក បានមានប្រសាសនៅព្រឹកថ្ងៃទី១៩ ខែវិច្ឆិកា ឆ្នាំ២០២០នេះថា ការងារហ្វឹកហ្វឺនបានដើរតួនាទីជាយុទ្ធសាស្រ្តយ៉ាងសំខាន់ សម្រាប់ការពារជាតិ តាមរយៈការផ្តល់ចំណេះដឹង និងពុទ្ធិដល់កងទ័ព ជាពិសេសយោធិនវ័យក្មេង ដែលជាអ្នកបន្តវេនជំនាន់ក្រោយ។
លោកមេបញ្ជាការបានគូសបញ្ជាក់ថា ផែនការហ្វឹកហ្វឺន បានបន្តជំរុញឲ្យយោធិនមានសមត្ថភាព និងគុណភាពហ្វឹនហ្វឺន បង្កើនសមត្ថភាពដល់កងទ័ពឲ្យបានយល់ដឹងកាន់តែច្បាស់និងស្ទាត់ជំនាញ ក្នុងការបញ្ជាបាញ់គ្រាប់ឲ្យបានល្អ និងចំគោលដៅ មានសមត្ថភាពខ្ពស់ក្នុងការប្រើប្រាស់សម្ភារ គ្រឿងបំពាក់ត្រូវតាមលក្ខណៈបច្ចេកទេសឆ្លើយតបទៅនឹងតម្រូវការចាំបាច់តាមភារកិច្ចដែលបានចាត់តាំងរបស់កងយោធពលខេមរភូមិន្ទប្រកបដោយភាពទទួលខុសត្រូវជានិច្ច៕