ព័ត៌មានជាតិ

អង្គ​ការ​ WWF​ និង​អគ្គ​នាយក​ដ្ឋាន​កៅ​ស៊ូ ប្រកាសជាផ្លូវការ​​គម្រោងភាពជាដៃគូពហុភាគី​​ សម្រាប់អភិវឌ្ឍន៍វិស័យ​កៅ​ស៊ូប្រកបដោយនិរន្ត​រ​ភាព​​​​​​​​ 

image

ភ្នំពេញ៖ អង្គ​ការ​​ WWF-កម្ពុជា​ និង​អគ្គ​នាយក​ដ្ឋាន​កៅ​ស៊ូ នៃ​ក្រសួង​កសិកម្ម​ រុក្ខា​ប្រមាញ់ និង​នេ​សាទ​ បាន​ចុះ​អនុស្សា​រណៈ​យោគ​យល់ ដើម្បី​ចាប់ផ្តើម​កិច្ចសហប្រតិបត្តិការជាលើក​ដំបូងក្នុង​ការ​កសាង​ដៃ​គូ​ពហុភាគី​ សម្រាប់​ការ​​លើកក​ម្ពស់​ខ្សែ​ច្រវ៉ាក់ផ្គត់​ផ្គង់​កៅ​ស៊ូ​ធម្មជាតិ​ប្រកបដោយ​និរន្តរភាព និង​តម្លា​ភាព​​ក្នុង​ប្រទេស​កម្ពុជា​។ 

ក្រោម​ជំនួយថវិការបស់​​ក្រសួងកិច្ចសហប្រត្តិបត្តិការសេដ្ឋកិច្ច និងអភិវឌ្ឍន៍ (BMZ) របស់ប្រទេសអាល្លឺម៉ង់​ តាមរយៈអង្គការ Welthungerhilfe, កិច្ច​សហប្រតិបត្តិ​ការ​ភាពជាដៃគូពហុភាគីនេះ​ កំពុង​ត្រូវ​បាន​អនុវត្ត​ក្នុង​ប្រទេស​មួយ​ចំនួន​ក្នុង​តំបន់​អាស៊ី​អា​គ្នេយ៍​ ដែល​រួម​មាន​ទាំង​ប្រទេស​ថៃ​ និងមីយ៉ាន់ម៉ា ផង​ដែរ​។ 

ក្នុង​ប្រទេសកម្ពុជា កិច្ចសហប្រតិបិត្តការរយៈ​ពេល​បី​ឆ្នាំ​នេះ បានជម្រុញ​ការ​ចូល​រួម​និង​សហការណ៍​​ពី​ភាគីពាក់ព័ន្ឋសំខាន់ៗ​របស់​រាជ​រដ្ឋា​ភិបាល​ វិស័យ​ឯក​ជន អង្គការសង្គមស៊ីវិល និងកសិករ​កៅស៊ូគ្រួសារ ក្នុង​ខេត្ត​មណ្ឌល​គិរី​ ដើម្បីជម្រុញ​ផលិតកម្មកៅស៊ូធម្មជាតិប្រកបដោយចីរភាព ព្រម​ទាំង​រួម​ចំណែក​ដល់​ការ​លើកកម្ពស់ជីវភាពកសិករ​កៅស៊ូគ្រួសារ ជនជាតិដើមភាគតិច និង​កម្ម​ករ​​​កៅ​ស៊ូ​ផង​ដែរ​។ 

លោក​ សេង​ ទៀក នាយក​អង្គ​ការ WWF-កម្ពុជា​ បានលើកឡើងថា “​​ការ​លើក​កម្ពស់​ផលិត​កម្ម​កៅ​ស៊ូគ្រួសារ​ប្រកប​ដោយនិរន្តរ​ភាព និង​​ទំនួល​ខុស​ត្រូវ​ខ្ពស់​តាមរយៈ​ការ​អនុវត្ត​ការគ្រប់​គ្រង​បច្ចេកទេស​បាន​យ៉ាង​ល្អ​ត្រឹម​ត្រូវ​​​នៅ​ក្នុង​ប្រទេស​កម្ពុជា​ មិន​ត្រឹម​តែ​ជួយបង្កើត​​ការងារ និងចំណូលដល់​​សហគមន៍​មូល​ដ្ឋាន​​​ប៉ុណ្ណោះ​ទេ វា​ក៏​​ជួយ​កាត់បន្ថយសម្ពាធលើ​​ធន​ធាន​ធម្ម​ជាតិ​ផង​ដែរ​ តាមរយៈ​​ការប្រើ​ប្រាស់​ដី​ដាំ​កៅ​ស៊ូ​ដែ​លមាន​ស្រាប់ឲ្យអស់សុពលភាព និងទប់ស្កាត់​​ការ​​ទន្ទ្រាន​ដី​ព្រៃ​ខុស​ច្បាប់​។ ពិធីចុះ​អនុស្សារណៈ​យោគ​យល់គ្នា​នេះ​បានបើក​ទំព័រ​​ថ្មីមួយទៀតសម្រាប់អង្គការ​ WWF-កម្ពុជា លើ​កិច្ច​ខិតខំ​ប្រឹង​​ប្រែង​ធ្វើ​ការងារ​​ក្នុងភាពជាដៃគូ​ជាមួយស្ថាប័ន​ជំនាញនិង​មាន​ទំនួល​ខុស​ត្រូវ​របស់រាជរដ្ឋាភិបាលកម្ពុជា​”​។ 

អនុស្សារណៈ​យោគ​យល់​នេះ​ ​គាំ​ទ្រ​​​​ឆន្ទៈរួមគ្នា​​ ក្នុង​ការ​បង្កើត​ឱ្យ​មាន​យន្ត​ការ​ភាព​ជា​ដៃ​គូ​ពហុភាគី ដែល​គ្រប់​ភាគី​ពាក់​ព័ន្ធ​ទាំង​អស់អាច​ចែក​រំ​លែក​ចំណេះ​ដឹង​និង​ព័ត៌​មាន​ស្តី​អំពី​ផលិតកម្ម​កៅ​ស៊ូ​ប្រកប​ដោយ​និរន្តរ​ភាព​ ព្រម​ទាំង​អាច​ចូល​រួម​ក្នុង​​​គោល​នយោបាយ​ជម្រុញ​ខ្សែ​ចង្វាក់​ផ្គត់​ផ្គង់​កៅ​ស៊ូ​ធម្មជាតិ​ប្រកប​ដោយ​ចីរ​ភាពផង​ដែរ​។​ អនុស្សារណៈ​យោគ​យល់​នេះ ក៏​ផ្តល់​ឱកាស​ក្នុង​ការ​កសាង​សមត្ថ​ភាព​ក្នុង​ការ​អនុវត្ត​ផលិត​កម្ម​កៅ​ស៊ូ​ធម្ម​ជាតិ​ប្រកប​ដោយ​និរន្តរ​ភាព​ ខណៈ​លើក​កម្ពស់​ការ​ចូលរួមចំណែក​របស់​កសិករ​កៅ​ស៊ូគ្រួ​សារ​​ក្នុងកិច្ចការ​ពារ​ធន​ធាន​ធម្ម​ជាតិ​ក្នុង​សហគមន៍​របស់​ពួក​គេ​។

លោក ប៉ុល​ សុផា​ ប្រតិ​ភូ​រាជ​រដ្ឋាភិបាល​កម្ពុជា​ទទួល​បន្ទុក​ជា​អគ្គនាយក​ នៃ​អគ្គ​នាយក​ដ្ឋាន​កៅ​ស៊ូ​  មាន​ប្រសាសន៍​ថា “​ការ​កសាង​សមត្ថ​ភាព​ និង​បណ្តុះ​បណ្តាល​បច្ចេក​ទេស​ដល់​កសិករ​ដាំ​កៅ​ស៊ូ និង​មន្ត្រី​ជំនាញ​ផ្នែក​កៅ​ស៊ូ​ បូក​រួម​ទាំង​ការ​ចូល​រួម​យ៉ាង​សកម្ម​ពី​គ្រប់​ភាគី​ពាក់​ព័ន្ធ​ក្នុង​វិស័យ​កៅស៊ូ​នេះ នឹង​ធ្វើ​ឱ្យ​វិស័យ​កៅ​ស៊ូ​ក្នុង​ប្រទេស​កម្ពុជា​កាន់​តែ​រីកចម្រើន​​ទៅ​មុខ​ប្រកប​ដោយ​ចីរ​ភាព​”​។ 

ដើម្បី​ជា​ជំនួយ​ស្មារតី​ក្នុង​ការ​អនុវត្ត​ផលិត​កម្ម​កៅ​ស៊ូ​ប្រកប​ដោយ​និរន្តរ​ភាព​ អគ្គនាយក​ដ្ឋាន​កៅ​ស៊ូ មន្ទីរ​កសិកម្ម​ រុក្ខា​ប្រមាញ់ និង​នេសាទ​ អង្គ​ការ​ WWF​ និង​វិទ្យា​ស្ថាន​​ស្រាវ​ជ្រាវ​កៅ​ស៊ូ​កម្ពុជា (CRRI)​ បាន​សហការបោះ​ពុម្ព​​ផ្សាយ​សៀវ​ភៅ​ណែ​នាំ​បច្ចេក​ទេស​សម្រាប់​ការ​អនុវត្ត​កសិកម្ម​ល្អ (GAP) ​លើ​ការ​យក​ផល​ទឹក​ជ័រ​កៅ​ស៊ូ​ និង​​បាន​រៀប​ចំ​សិក្ខា​សាលា​បណ្តុះ​បណ្តាល​ បូក​រួម​ទាំង​​​​ការ​បង្ហាញ​ការ​អនុវត្តដើម្បី​ទទួល​បាន​បទ​ពិសោធន៍​បច្ចេក​ទេស​ដោយ​ផ្ទាល់​នៅ​តាម​ចម្កា​រ​កៅស៊ូគ្រួសារ​មួយ​ចំនួន​ផង​ដែរ​ ទៅ​​ដល់​កសិករ​កៅ​ស៊ូ​គ្រួសារ​​ចំនួន និង​មន្ត្រី​ជំនាញផ្នែក​​កៅ​ស៊ូរបស់​រាជ​រដ្ឋា​ភិបាល​ សរុប​ចំនួន​ ៦០​ នាក់​​ មក​ពី​ខេត្ត​ចំនួន ២០​ នៃ​ប្រទេស​កម្ពុជា​។

បច្ចុប្បន្ន​នេះ​ កសិករ​កៅ​ស៊ូ​គ្រួសារ​ ចំនួន ១០០ នាក់​ ដែល​រស់​នៅ​ជុំ​វិញ​សហគមន៍​តំបន់​ការ​ពារ​ចំនួន​ប្រាំ ​នៅ​ជិត​ដែន​ជម្រក​សត្វ​ព្រៃ​ស្រែ​ពក​ ក្រោម​ការ​​គាំ​ទ្រ​ដោយ​អង្គ​ការ WWF បាន​ចូល​រួម​ក្នុង​គម្រោង​នេះ​រួច​​មក​ហើយ​ ហើយ​គម្រោង​នឹង​បន្ត​ជម្រុញ​ការ​ចូល​រួម​របស់​កសិករ​កៅ​ស៊ូ​គ្រួសារ​រហូត​ដល់ ៣០០ គ្រួសារ​ត្រឹម​ឆ្នាំ​២០២២៕

ព័ត៌មានទាក់ទង...