បារាំង៖ កីឡាករ Aurelien Fontenoy ដែលជាជើងឯកជិះកង់តាមជម្រាលភ្នំ បានទទួលជោគជ័យក្នុងការបង្កើតកំណត់ត្រាថ្មីមួយ គឺការជិះកង់តាមកាំជណ្តើរឡើងដល់កំពូលអគារ៣៣ជាន់។

ការសាកល្បងនេះត្រូវធ្វើឡើងនាអគារ Trinity Tower កម្ពស់១៤០ម៉ែត្រ ដែលស្ថិតនាទីក្រុងប៉ារីស ប្រទេសបារាំង ដោយរូបគេត្រូវជិះតាមកាំជណ្តើរដែលមានចំនួន៧៦៨កាំ។ អ្វីដែលជាការពិបាក នោះគឺ Aurelien Fontenoy មិនអាចទម្លាក់ជើងចេញពីឈ្នាន់កង់នោះឡើយ។ ទោះជាយ៉ាងណា កីឡាករបារាំងរូបនេះ នៅតែអាចឆ្លងផុតឧបសគ្គទាំងអស់នោះ និងឡើងទៅដល់កំពូលអគារដោយជោគជ័យ ដោយប្រើពេលអស់ ៣០នាទី។

បង្ហាញចំណាប់អារម្មណ៍រីករាយរបស់ខ្លួន Aurelien Fontenoy បានឱ្យដឹងថា៖ “វាជារឿងពិបាកខ្លាំងណាស់ ប៉ុន្តែរូបគេបានហ្វឹកហាត់ការជិះកង់ឡើងជណ្តើរបែបនេះជានិច្ច។ ចំពោះថវិកាទទួលបានពីកម្មវិធីនេះ រូបគេនឹងយកបរិច្ចាគឱ្យមូលនិធិសប្បុរសធម៌ជួយកុមារ ដែលមានជំងឺធ្ងន់ធ្ងរ"៕