ព័ត៌មានអន្តរជាតិ

វ៉េណេស៊ុយអេឡាចាប់ផ្ដេីមចាក់វ៉ាក់សាំងកូវីដ-១៩​ ឲ្យបុគ្គលិកសុខាភិបាល

image

សាច់រឿង៖មន្ទីរពេទ្យមួយក្នុងចំណោមមន្ទីរពេទ្យធំៗនៅក្នុងរដ្ឋធានីការ៉ាកាស​ (Caracas) របស់ប្រទេសវ៉េណេស៊ុយអេឡា​ បានចាប់ផ្ដេីមចាក់វ៉ាក់សាំងកូវីដ-១៩​ ឲ្យបុគ្គលិកសុខាភិបាលក្នុងគ្រាដែលករណីឆ្លងសរុបរបស់វីរុសនេះក្នុងប្រទេសវ៉េណេស៊ុយអេឡាមានចំនួនជាង១៣ម៉ឺននាក់។ 

នាយកមន្ទីរពេទ្យបាននិយាយថា​ មន្ទីរពេទ្យបានចាប់ផ្ដេីមចាក់វ៉ាក់សាំងឲ្យបុគ្គលិកពេទ្យដោយប្រេីប្រាស់វ៉ាក់សាំង​ ស្ពុតនីកវី​ (Sputnik V) របស់រុស្ស៊ី។ 

បុគ្គលិកសុខាភិបាលរបស់គុយបាក៏នឹងត្រូវទទួលបានការចាក់វ៉ាក់សាំងដែរ។ ប៉ុន្តែទោះយ៉ាងណា​ នាយកមន្ទីរពេទ្យមិនបានបញ្ជាក់ថាមានគ្រូពេទ្យគុយបាប៉ុន្មាននាក់កំពុងធ្វើការនៅមន្ទីរពេទ្យនេះទេ។

ប្រទេសវ៉េណេស៊ុយអេឡាបានទទួលវ៉ាក់សាំងកូវីដ-១៩​ ស្ពុតនីកវី​ (Sputnik V) របស់រុស្ស៊ីចំនួន ១០ម៉ឺនដូសដំបូងនៅថ្ងៃទី១៣ ខែកុម្ភៈ​ ហើយបានប្រកាសថាខ្លួនបានចំណាយប្រាក់ ២០០លានដុល្លារដើម្បីទិញវ៉ាក់សាំងកូវីដ-១៩​ ចំនួន ១០លានដូស។

បន្ថែមលើនេះទីភ្នាក់ងារសុខភាពសាធារណៈអន្តរជាតិបានបញ្ជាក់ថា​ វ៉ាក់សាំងកូវីដ-១៩​ របស់ក្រុមហ៊ុន​ អាស្ត្រាហ្សេណេកា​ (AstraZeneca) ប្រហែលពី ១លាន៤សែនដូស​ ទៅ ២លាន៤សែនដូស​ ត្រូវបានបម្រុងទុកសម្រាប់វ៉េណេស៊ុយអេឡា។ 

យោងតាមទិន្នន័យផ្លូវការគិតត្រឹមថ្ងៃចន្ទ​ ប្រទេសវ៉េណេស៊ុយអេឡាបានរាយការណ៍ថា​ មានអ្នកឆ្លងវីរុសកូវីដ-១៩​ ជាង​ ១៣ម៉ឺន៦ពាន់នាក់​ និង មានអ្នកស្លាប់ដោយសារវីរុសនេះជាង​ ១ពាន់៣រយនាក់​ ប៉ុន្តែក្រុមអ្នកជំនាញខាងវេជ្ជសាស្ត្រ និង​ មេដឹកនាំប្រឆាំងជឿថាតួលេខពិតប្រាកដគឺខ្ពស់ជាងនេះ៕