សាច់រឿង៖នាយករដ្ឋមន្រ្តីអង់គ្លេសបានសន្យាថា​ មនុស្សពេញវ័យទាំងអស់នៅក្នុងចក្រភពអង់គ្លេសនឹងបានទទួលការចាក់វ៉ាក់សាំងកូវីដ-១៩​ ដូសដំបូងនៅត្រឹមចុងខែកក្កដាខាងមុខ។ 

មនុស្សជាង ១៧លាននាក់ហេីយបានទទួលការចាក់វ៉ាក់សាំងកូវីដ-១៩​ ចាប់តាំងពីយុទ្ធនាការចាក់វ៉ាក់សាំងក្នុងចក្រភពអង់គ្លេសបានចាប់ផ្តើមនៅក្នុងខែធ្នូ​ ឆ្នាំ២០២០មក។ 

ប៉ុន្តែ​ នាយករដ្ឋមន្រ្តីអង់គ្លេស​ លោក បូរីស​ ចនសុន​ (Boris Johnson) បាននិយាយថា ឥឡូវនេះលោកចង់អោយយុទ្ធនាការនេះធ្វេីការចាក់វ៉ាក់សាំងឲ្យពលរដ្ឋឲ្យបានកាន់តែច្រេីន​ និង​ លឿន។ 

លោកបាននិយាយថា​ គោលដៅខែកក្កដានឹងជួយឱ្យពលរដ្ឋស្ថិតក្នុងក្រុមងាយរងគ្រោះទទួលបានការការពារ «កាន់តែឆាប់» ហើយនឹងជួយបន្ធូរបន្ថយវិធានការរឹតបន្តឹងដេីម្បីទប់ស្កាត់ការឆ្លងរីករាលដាលរបស់វីរុសកូវីដ-១៩​ នៅទូទាំងប្រទេសបន្ថែមទៀត។ 

ប្រធានសេវាសុខភាពជាតិរបស់ចក្រភពអង់គ្លេសបាននិយាយថា​ មានសញ្ញាដំបូងៗដែលបង្ហាញ​យុទ្ធនាការចាក់វ៉ាក់សាំងនេះកំពុងរួមចំណែកដល់ការធ្លាក់ចុះនៃចំនួនអ្នកជំងឺចូលមកសម្រាកព្យាបាលវីរុសកូវីដ-១៩​ ក្នុងមន្ទីរពេទ្យ។

ការចាក់វ៉ាក់សាំងឲ្យបានឆាប់ទៅដល់ក្រុមជនងាយរងគ្រោះទាំងអស់ត្រូវបានគេមើលឃើញថាមានសារៈសំខាន់ក្នុងការកាត់បន្ថយចំនួនអ្នកស្លាប់ដោយសារវីរុសកូវីដ-១៩​ និង​ ជួយសម្រាលសម្ពាធពីសេវាសុខភាពជាតិ៕