សិង្ហបុរី៖ នៅរសៀលថ្ងៃទី ៣០ ខែសីហា ឆ្នាំ២០១៨ ឯកឧត្តមទេសរដ្ឋមន្រ្តី ប្រាក់ សុខុន បានអញ្ជើញចូលជួបសម្តែងការគួរសម ជាមួយឯកឧត្តម លី សៀនឡុង នាយករដ្ឋមន្រ្តីសិង្ហបុរី បន្ទាប់ពីបានជួបពិភាក្សាទ្វេភាគីជាមួយឯកឧត្តម គឺឯកឧត្តមបណ្ឌិត វីវៀន បាឡាក់គ្រីស្ហ្សណាន់ រដ្ឋមន្រ្តីការបរទេសសិង្ហបុរី កាលពីព្រឹកមិញនេះ។
នៅក្នុងជំនួបនេះឯកឧត្តមទេសរដ្ឋមន្រ្តី ប្រាក់ សុខុន បានជំរាបជូន ឯកឧត្តម លី សៀនឡុង នាយករដ្ឋមន្រ្តី នៃសាធារណរដ្ឋសិង្ហបុរីថា ដំណើរទស្សនកិច្ចផ្លូវការរបស់ឯកឧត្តមនៅប្រទេសសិង្ហបុរីនាពេលនេះ គឺក្នុង គោលបំណងពង្រឹងបន្ថែមទៀតនូវចំណងទាក់ទងទ្វេភាគី និងរិះរកវិស័យថ្មីៗទៀត ដើម្បីធ្វើកិច្ច សហប្រតិបត្តិការសំដៅនាំមកនូវផលប្រយោជន៍ទៅវិញទៅមកសម្រាប់ប្រជាជាតិទាំងពីរ។

សូមជំរាបថា កាលពីល្ងាចថ្ងៃពុធ ទី ២៩ ខែសីហាម្សិលមិញនេះ ឯកឧត្តមទេសរដ្ឋមន្រ្តី ប្រាក់ សុខុន បានដឹកនាំ គណៈប្រតិភូ អញ្ជើញទៅដល់សាធារណរដ្ឋសឹង្ហបុរីដោយសុវត្ថិភាព ដើម្បីបំពេញទស្សនកិច្ចផ្លូវការនៅសាធារណរដ្ឋសិង្ហបុរីចាប់ពីថ្ងៃទី ២៩ ដល់ថ្ងៃទី ៣១ ខែសីហា ឆ្នាំ២០១៨៕