សង្គម

អាជ្ញាធរជាតិអប្សរា បញ្ចប់ការងារទល់ទ្រសង្គ្រោះប្រាសាទបន្ទាយស្រីដំដែក

image

អត្ថបទ៖ ជា ស្រស់


សៀមរាប៖ ក្រុមអ្នកជំនាញនាយកដ្ឋានអភិរក្សប្រាសាទក្រៅឧទ្យានអង្គរ នៃអាជ្ញាធរជាតិអប្សរា បានបញ្ចប់ការទល់ទ្រដើម្បីជួយសង្ក្រោះប្រាសាទបន្ទាយស្រី ដំដែក ដែលស្ថិតនៅក្នុងឃុំដំដែក ស្រុកសូទ្រនិគម បានជោគជ័យហើយបន្ទាប់ពីបានប្រឹងប្រែងលើការងារអស់រយៈពេលជាង៣ខែមកនេះ។


មន្ត្រីទទួលបន្ទុកការងារការដ្ឋានលោក ពុទ្ធ សុទ្ធ ឱ្យដឹងថាការទល់ទ្រនេះ គឺក្នុងគោលបំណងជួយពង្រឹងសង្រ្គោះប្រាសាទឱ្យជៀសផុតពីហានិភ័យ។
ហើយបច្ចុប្បន្នប្រាសាទបន្ទាយស្រីដំដែកមានសភាពទ្រុឌទ្រោមខ្លាំងនៅប្រាង្គកណ្តាលនៅត្រង់ស៊ុមទ្វារ ស៊ុមបង្អួចដែលមានស្នាមប្រេះបែកបាក់។ លោកថា ប្រសិនបើពុំមានការជួយទល់ទ្រសង្គ្រោះឱ្យបានទាន់ពេលទេ នោះចំណុចទាំងនោះនឹងប្រឈមបញ្ហា។ ចំពោះដំណើរការទល់ទ្រប្រាសាទបន្ទាយស្រីដំដែកចាប់តាំងតែពីអំឡុងចុងខែសីហា ហើយទើបតែបញ្ចប់កាលពីចុងខែតុលា ឆ្នាំ២០២១។


សូមជម្រាបថាប្រាសាទបន្ទាយស្រីដំដែកស្ថិតនៅភូមិបន្ទាយស្រី ឃុំដំដែក ស្រុកសូទ្រនិគមក្នុងបរិវេណវត្ដប្រាសាទបន្ទាយស្រី ចម្ងាយប្រមាណ ៣៤គីឡូម៉ែត្រ ភាគខាងកើតនៃទីរួមខេត្ដសៀមរាប៕