ព័ត៌មានជាតិ

អជ្ញាធរខេត្តសៀមរាប ហាមឃាត់មិនឱ្យធ្វើយុទ្ធនាការរកសម្លេងឆ្នោតឃុំ-សង្កាត់ នៅតាមផ្លូវ និងទីប្រជុំជនមួយចំនួន 

image

សៀមរាប៖ រដ្ឋបាលខេត្ដសៀមរាប មិនឱ្យមានការប្រមូលផ្តុំ និងការហែក្បួនឃោសនា ក្នុងយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ របស់គណបក្សនយោបាយនានា នៅតាមបណ្តាទីតាំង និងផ្លូវមួយចំនួនក្នុងខេត្តសៀមរាប ដើម្បីរក្សាសណ្ដាប់ធ្នាប់ល្អ និងឱ្យដំណើរឃោសនាប្រព្រឹត្តទៅដោយរលួន។

យោងតាមសេចក្ដីជូនដំណឹងរបស់រដ្ឋបាលខេត្ដសៀមរាប ប្រាប់ទៅប្រធានគណៈកម្មការរៀបចំការបោះឆ្នោតខេត្ដសៀមរាប នៅថ្ងៃទី១៣ ខែឧសភា ឆ្នាំ២០២២ បានឱ្យដឹងថា រដ្ឋបាលខេត្តសៀមរាប បានកំណត់នូវទីប្រជុំជនដែលត្រូវចៀសវាងក្នុងការប្រមូលផ្តុំឃោសនា និងការហែក្បួន រួមមានផ្លូវជុំវិញផ្សារចាស់ ផ្លូវជុំវិញផ្សារលើធំថ្មី ផ្លូវជុំវិញផ្សារសាមគ្គី ហ៊ុយគាំង ផ្លូវជុំវិញផ្សារសម្តេចតេជោ ហ៊ុន សែន ដើមក្រឡាញ់ ផ្លូវជុំវិញផ្សារដំដែក។ ក្រៅពីនេះ ក៏មានផ្លូវជុំវិញផ្សារកំពង់ក្តី ផ្លូវជុំវិញផ្សារពួក ផ្លូវជុំវិញផ្សារក្រឡាញ់។ ដោយឡែកទីសាធារណៈដែលត្រូវចៀសវាងក្នុងការប្រមូលផ្តុំឃោសនា និងប្រារព្ធពិធី រួមមាន តំបន់រមណីដ្ឋានអង្គរ និងប្រាសាទបុរាណនានា វត្តអារាម និងនៅមុខគ្រឹះស្ថានសាធារណៈនានា។

រដ្ឋបាលខេត្ដសៀមរាប បានបញ្ជាក់ថា ការហាមឃាត់មិនឲ្យមានយុទ្ធនាការនៅតាមផ្លូវទីប្រជុំជន និងទីសាធារណៈសំខាន់នេះ ក្នុងយុទ្ធនាការឃោសានារកសម្លេងឆ្នោតក្រុមប្រឹក្សាឃុំ-សង្កាត់ អាណត្ដិទី៥ ដើម្បីឱ្យដំណើរការនៃការឃោសនារកសម្លេងឆ្នោតក្នុងយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដែលនឹងប្រព្រឹត្តទៅចាប់ពីថ្ងៃទី២១ ខែឧសភា ដល់ថ្ងៃទី៣ ខែមិថុនា ឆ្នាំ២០២២ ប្រព្រឹត្តទៅដោយរលូន និងធានាបាននូវសន្តិសុខ សុវត្ថិភាព សណ្ដាប់ធ្នាប់សាធារណៈជូនគណបក្សនយោបាយទាំងអស់បានល្អប្រសើរ និងបញ្ចៀសការកកស្ទះចរាចរណ៍ដែលរំខានដល់ការធ្វើដំណើររបស់ប្រជាពលរដ្ឋ ក៏ដូចជាភ្ញៀវជាតិ-អន្តរជាតិ និងបង្កលក្ខណៈងាយស្រួលដល់កិច្ចដំណើរការបោះឆ្នោតដ៏មានសារៈសំខាន់នេះ៕

អត្ថបទ៖ ជា ស្រស់