ភ្នំពេញ៖​ ស្នងការនគរបាលរាជធានីភ្នំពេញ​ លោក ស ថេត​ បានចេញសេចក្ដីសម្រេច​ ដោយបានចាត់តាំងមន្ត្រីរហូតដល់​ ៤៨រូប ស្មើនឹង៩ក្រុម​ ដើម្បីដឹកនាំ ទប់ស្កាត់​ និងបង្ក្រាបក្រុមអ្នកធ្វេីសកម្មភាពចាប់ឃាត់ខ្លួនប្រជាពលរដ្ឋបែបអនាធិបតេយ្យ។

ក្នុងសេចក្ដីសម្រេចនោះ បានបញ្ជាក់ថា​ មន្ត្រីទាំង៩ក្រុម ជាសេនាធិការរបស់ស្នងការនគរបាលរាជធានីភ្នំពេញ​ មានភារកិច្ចជាសេនាធិការជូនស្នងការដ្ឋាននគរបាលរាជធានីភ្នំពេញលើការងារចុះត្រួតពិនិត្យរក្សាសណ្ដាប់ធ្នាប់របៀបរៀបរយ​ ទប់ស្កាត់​ និងបង្រ្កាបជនធ្វើសកម្មភាពចាប់ឃាត់មនុស្សអនាធិបតេយ្យក្នុងភូមិសាស្ត្ររាជធានីភ្នំពេញ​។​ ក្រុមប្រតិបត្តិការនីមួយៗត្រូវបែងចែកកម្លាំងដើម្បីទទួលខុសត្រូវ ២៤ម៉ោងលើ២៤​ម៉ោង​ កសាងផែនការសកម្មភាព​ និងប្រតិទិនការងារកំណត់តំបន់ស្មុគស្មាញតំបន់ប្រឈមតំបន់កើតមានហេតុការណ៍ញឹកញាប់​ ដើម្បីឲ្យការងារទប់ស្កាត់និងបង្ក្រាបធានាបានប្រសិទ្ធភាព។ 

ក្រុមការងារនេះ​ ពេលចេញប្រតិបត្តិការ​ កម្លាំងទាំងអស់ត្រូវធ្វើការជាក្រុម​ ត្រូវស្លៀកពាក់ឯកសណ្ឋានឈុតប្រយុទ្ធពាក់សញ្ញាសម្គាល់​ និងគ្រឿងបន្ទាប់បន្សំរបស់នគរបាលឱ្យបានសព្វគ្រប់​ មានអាវុធគ្រប់ដៃ​ និងរៀបចំខ្លួនឱ្យស័ក្កិសមជាសមត្ថកិច្ចដែលមានតួនាទីជាអ្នកអនុវត្តច្បាប់។ នៅពេលទទួលបានព័ត៌មានតាមប្រព័ន្ធទាក់ទងទំនាក់ទំនង​ ឬប្រភពផ្សេងៗពាក់ព័ន្ធនឹងសកម្មភាពចាប់ឃាត់ខ្លួនពលរដ្ឋនៅចំណុចណាមួយដោយក្រុមមិនស្គាល់អត្តសញ្ញាណ​ ក្រុមប្រតិបត្តិការទាំងអស់ត្រូវទំនាក់ទំនងផ្ដល់ព័ត៌មានឲ្យគ្នាទៅវិញទៅមក​ និងចេញធ្វើសកម្មភាពបង្ក្រាបដោយមិនលើកលែង។ 

ពេលពិនិត្យឃើញជាក់ស្ដែងមានការចាប់ខ្លួនមនុស្សនៅលើដងផ្លូវ​ កម្លាំងប្រតិបត្តិការត្រូវអនុវត្តវិធានការ​ ត្រូវម្ចាស់ការធានាបានរៀបចំក្នុងការគ្រប់គ្រងស្ថានភាពកន្លែងកើតហេតុ,​ ពិភាក្សាដោយសម្របសម្រួលដើម្បីស្វែងរកអត្តសញ្ញាណអន្តភាព​ និងអ្នកទទួលខុសត្រូវ,​ ទំនាក់ទំនងទៅក្រុមប្រតិបត្តិការដែលនៅជិតបំផុត​ ដើម្បីបញ្ជូនកម្លាំងជំនួយមកគ្រប់គ្រងស្ថានការណ៍,​ អនុវត្តវិធានការដោយចាប់បង្ខំនាំយកអ្នកពាក់ព័ន្ធទាំងអស់មកអង្គភាពដើម្បីអនុវត្តនីតិវិធីស្រាវជ្រាវ​ និងស៊ើបអង្កេត។ 

ក្នុងអំឡុងពេលប្រតិបត្តិការ​ និងបង្ក្រាបនៅចំណុចណាមួយប្រធានក្រុមប្រតិបត្តិការណ៍នីមួយៗ​ ត្រូវរាយការណ៍បន្ទាន់អំពីស្ថានភាពកម្លាំងហេតុការណ៍​ បញ្ហាប្រឈមដំណោះស្រាយជូនបញ្ជាការដឹកនាំដើម្បីឱ្យមានមូលដ្ឋានរាយការណ៍​ និងសុំយោបល់ដឹកនាំបន្ត។ ប៉ុន្តែត្រូវបញ្ចៀសឱ្យបានក្នុងកម្រិតខ្ពស់ចំពោះការប្រើប្រាស់អាវុធធ្វើជាដំណោះស្រាយជាមួយបញ្ហា។ ក្នុងលក្ខខណ្ឌដើម្បីការពារពីការគំរាមកំហែង​ ត្រូវប្រើប្រាស់ឱ្យសមស្របតាមវិជ្ជាជីវៈ​ និងមានការគិតគូរពីហានិភ័យដល់ប្រជាពលរដ្ឋដែលនៅជិតទីកន្លែងនោះ។ 

ចំពោះក្រុមប្រតិបត្តិការនីមួយៗ​ ត្រូវធ្វើរបាយការណ៍​ ការរាយការណ៍ប្រចាំថ្ងៃពីសកម្មភាពដែលជាកិច្ចប្រតិបត្តិការ​   

បញ្ហាប្រឈម​ និងសំណូមពរជូនបញ្ជាការដឹកនាំ។ បញ្ជាការដឹកនាំត្រូវបូកសរុបរបាយការណ៍ពីក្រុមប្រតិបត្តិការទាំងអស់រាយការណ៍ជូនថ្នាក់ដឹកនាំ ដោយមានការចង្អុលដឹកនាំបន្ត​។ 

សូមរំឭកថា​ កាលពីព្រលប់ថ្ងៃទី១៤​ ខែសីហា​ ឆ្នាំ២០២២ មានការភ្ញាក់ផ្អើលជាខ្លាំងនៅចំណុចមុខប៉ុស្តិ៍ទួលសង្កែទី១ ដោយស្ត្រីម្នាក់ត្រូវជាម្តាយជនរងគ្រោះ​ ដែលត្រូវជនសុីវិលមួយក្រុមចាប់ខ្លួន​។ ក្នុងករណីនេះមានប្រជាពលរដ្ឋជាច្រើនបានមកប្រមូលផ្ដុំគ្នានៅចំណុចមុខប៉ុស្តិ៍ទួលសង្កែទី១​ ដោយស្រែយំអង្វសមត្ថកិច្ចឱ្យជួយរកកូនប្រុសរបស់ខ្លួនដែលត្រូវបានកម្លាំងស៊ីវិលមួយក្រុម​ ដោយដឹងថា​ ជាកម្លាំងបង្រ្កាបគ្រឿងញៀនបានឃាត់ខ្លួនយកទៅបាត់។  

ក្នុងករណីដូចគ្នានេះ​ កន្លងមកមានសកម្មភាពចាប់មនុស្សនៅតាមទីសាធារណៈជាញឹកញាប់​ ដោយក្រុមស្លៀកពាក់ស៊ីវិលនេះ​ ទើប​លោក​ ស​ ថេត​ ស្នងការនគរបាលរាជធានីភ្នំពេញ​ បានចេញសេចក្ដីសម្រេចដោយចាត់តាំងមន្ត្រីរហូត ៤៨រូប​ ស្មើនឹង៩ក្រុម​ ដើម្បីដឹកនាំទប់ស្កាត់​ និងបង្ក្រាបក្រុមអ្នកធ្វើសកម្មភាពចាប់ឃាត់ខ្លួនប្រជាពលរដ្ឋបែបអនាធិបតេយ្យដូចនេះ៕

ដោយ៖​ ឌីយ៉ាម៉ង់