អត្ថបទ​៖​ ប៉ៃ​ សុឃីម​

ព្រះសីហនុ​៖​ ក្រុមការងារជួយសង្គ្រោះ និងអូប័រល្បឿនលឿនចំនួន ២គ្រឿង សហការជាមួយ សមត្ថកិច្ច ចេញទៅអន្តរាគមន៍ជួយសង្គ្រោះ ប្រជានេសាទ ដែលបានលិចទូកមួយគ្រឿង នៅចំណុចខាងក្រៅកោះដំឡូង​ ប្រហែល​ ១ម៉ៃ ស្ថិតនៅសង្កាត់កោះរ៉ុងសន្លឹម​ ក្រុងកោះរ៉ុង​ ខេត្តព្រះសីហនុ នាល្ងាចថ្ងៃទី៣០ ខែកញ្ញា ឆ្នាំ២០២២ នេះ។ 

សមត្ថកិច្ច​បានឲ្យដឹងថា ជនរងគ្រោះនៅលើទូកនេសាទទាំងអស់មានចំនួន០៣នាក់ ក្នុងនោះមានតៃកុងទូកម្នាក់ និងកម្មករទូក០២នាក់ ក្រោយកើតហេតុ ពួកគាត់បានហែលទឹកឡេីងមក កោះដំឡូង បន្ទាប់មកត្រូវបានជួយសង្គ្រោះ នាំមកកាន់ដីគោកដោយសុវត្ថិភាព។

ជនរងគ្រោះទាំង៣នាក់ ​មានឈ្មោះ១.ឈ្មោះ ពេជ្រ​ ថ្មី​ ភេទប្រុស​ អាយុ៤២ឆ្នាំ​ មុខរបរតៃកុងទូក​ មានស្រុកកំណេីតនៅភូមិកំពង់ត្នោត​ ឃុំកូនសត្វ​ ស្រុក​ទឹកឈូ​ ខេត្តកំពត​ ។ ២.ឈ្មោះ ទន់​ វាសនា​ ភេទប្រុស​ អាយុ​ ៣២​ ឆ្នាំ​ មុខរបរកម្មករទូក​ មានស្រុកកំណេីតនៅភូមិក្រាំងរំដេង​ ឃុំក្រាំងស្បូវ​ ស្រុកឈូក​ ខេត្តកំពត​ ។ 

និង៣.ឈ្មោះ សៀម​ វិជ័យ​ ភេទប្រុស​ អាយុ២៥ឆ្នាំ មុខរបរកម្មករទូក​ មានស្រុកកំណេីតភូមិរបោះខ្ទម​ ឃុំដំបូកខ្ពស់​ ស្រុកអង្គរជ័យ​ ខេត្តកំពត​ ។ 

តាមការរៀបរាប់របស់ជនរងគ្រោះបញ្ជាក់ថា មូលហេតុដែលនាំឲ្យលិចទូកគឺបណ្តាលមកពី​ឧបករណ៍បូមទឹករបស់មាសុីនទូកខូច ​និងចំពេលរលកធំៗទៀត ទើបបណ្តាលឲ្យទឹកចូលទូកលិចតែម្តង។ 

បច្ចុប្បន្នជនរងគ្រោះទាំង៣នាក់ ត្រូវបានជួយសង្គ្រោះដោយសុវត្ថិភាព មិនប៉ះពាល់ដល់អាយុជីវិតទេ៕