ប្រធានស.ស.ស.ក គាំទ្រការជំរុញរបស់នាយករដ្ឋមន្ត្រី ឲ្យធ្វើវិសោធនកម្មច្បាប់របបសារព័ត៌មាន ច្បាប់សិទ្ធិទទួលព័ត៌មាន និងច្បាប់បទល្មើសប្រឆាំងបច្ចេកវិទ្យា
(ភ្នំពេញ)៖ ក្នុងពិធីជួបជុំអ្នកសារព័ត៌មាន លើកទី៣ នាព្រលប់ថ្ងៃទី១១ ខែមករា ឆ្នាំ២០១៩ សម្តេចតេជោ នាយករដ្ឋមន្ត្រី ហ៊ុន សែន បានប្រកាសជំរុញឲ្យក្រសួងព័ត៌មាន និងក្រសួងប្រៃសណីយ៍ រួមទាំងស្ថាប័នពាក់ព័ន្ធ ធ្វើវិសោធនកម្ម ឲ្យស៊ីចង្វាក់គ្នា ស្របគ្នា ឬមានសុគតភាពនឹងគ្នានូវច្បាប់ ៣ គឺច្បាប់ស្តីពីរបបសារព័ត៌មាន កាលពីឆ្នាំ១៩៩៥ និងសេចក្តីព្រាងច្បាប់ស្តីពីសិទ្ធិទទួលបានព័ត៌មាន ព្រមទាំងសេចក្តីព្រាងច្បាប់ស្តីពីឧក្រិដ្ឋកម្មប្រព័ន្ធបច្ចេកវិទ្យា ឬច្បាប់ប្រឆាំងបទល្មើសបច្ចេកវិទ្យា Cyber Law។
សម្តេចតេជោ ហ៊ុន សែន បានបញ្ជាក់ថា ការរៀបចំធ្វើច្បាប់ទាំង ៣ខាងលើនេះ មិនមែនជាការគ្រប់គ្រងប្រព័ន្ធផ្សព្វផ្សាយ តាមបែបផ្តាច់ការ នៅកម្ពុជានោះទេ។
ចំពោះមុខអ្នកសារព័ត៌មាន និងមន្ត្រីនាំពាក្យជាង ៥.០០០ នាក់ សម្តេចតេជោ ហ៊ុន សែន បានប្រកាសថា នៅកម្ពុជា កាលពីឆ្នាំ១៩៩៥ យើងមានច្បាប់ស្តីពីរបបសារព័ត៌មាន។ នៅពេលនេះ យើងកំពុងរៀបចំសេចក្តីព្រាងច្បាប់ស្តីពីសិទ្ធិទទួលព័ត៌មាន និងច្បាប់ស្តីពីឧក្រិដ្ឋកម្មប្រព័ន្ធបច្ចេកវិទ្យា។ ដូច្នេះក្រសួងព័ត៌មាន និងក្រសួងប្រៃសណីយ៍ ព្រមទាំងស្ថាប័នពាក់ព័ន្ធ ត្រូវពិនិត្យលើច្បាប់ទាំងបីនេះ ឲ្យមានសុគតភាពនឹងគ្នា។ តើច្បាប់របបសារព័ត៌មាន ឆ្នាំ១៩៩៥ ត្រូវធ្វើវិសោធនកម្ម កែសម្រួលអ្វីខ្លះ? ហើយសេចក្តីព្រាងច្បាប់ថ្មី ២នេះ ត្រូវធ្វើយ៉ាងណា ឲ្យស្របគ្នា។
សម្តេចតេជោ ហ៊ុន សែន បានស្នើឲ្យក្រសួងព័ត៌មាន និងក្រសួងប្រៃសណីយ៍ ព្រមទាំងស្ថាប័នពាក់ព័ន្ធ ត្រូវពិភាក្សាឲ្យបានល្អិតល្អន់។ ការរៀបចំច្បាប់ថ្មីទាំងនេះ មិនមែនជាការឈានទៅគ្រប់គ្រងប្រព័ន្ធផ្សព្វផ្សាយ តាមបែបផ្តាច់ការ ដូចការធ្វើអត្ថាធិប្បាយនោះទេ។ ការកែសម្រួល និងធ្វើច្បាប់ថ្មីទាំងនេះ ត្រូវឲ្យរួចរាល់ នៅក្នុងអាណត្តិទី៦នេះ។
ចំពោះសេចក្តីប្រកាសរបស់សម្តេចតេជោ នាយករដ្ឋមន្ត្រី ហ៊ុន សែន ខាងលើ ពិសេសការធ្វើវិសោធនកម្មច្បាប់ស្តីពីរបបសារព័ត៌មាន ឆ្នាំ១៩៩៥ ត្រូវបានលោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា ស.ស.ស.ក បានប្រកាសគាំទ្រ។
លោក ហ៊ុយ វណ្ណៈ លើកឡើងថា កាលពីមួយឆ្នាំមុន ក្នុងនាមសហភាពសហព័ន្ធអ្នកសារព័ត៌មានកម្ពុជា លោកបានដាក់លិខិតស្នើទៅកាន់ក្រសួងព័ត៌មាន ឲ្យធ្វើវិសោធនកម្ម កែប្រែច្បាប់ស្តីពីរបបសារព័ត៌មាន ឆ្នាំ១៩៩៥ ដោយសារតែការធ្វើច្បាប់នោះ កាលណោះ ត្រូវនឹងបរិបទសម័យនោះ។ ប៉ុន្តែសព្វថ្ងៃ ដោយសារតែបច្ចេកវិទ្យារីកចម្រើន ប្រព័ន្ធផ្សព្វផ្សាយ មានដល់អនឡាញ ដែលមិនត្រឹមតែការបោះពុម្ពបែបបុរាណទេ វាចូលដល់ទំនើបហើយ។
លោក ហ៊ុយ វណ្ណៈ បន្ថែមថា "យើងក៏គាំទ្រដែរ នូវការជំរុញធ្វើច្បាប់ឧក្រិដ្ឋកម្មប្រព័ន្ធបច្ចេកវិទ្យា ឬ Cyber Law ដើម្បីទប់ស្កាត់ទៅលើព័ត៌មានបំពុល ការពារហិរញ្ញវត្ថុ និងសន្តិសុខជាតិ។ យើងក្នុងនាមសហភាពសហព័ន្ធអ្នកកាសែតកម្ពុជា គាំទ្រការធ្វើច្បាប់ទាំង៣ ឲ្យមានសុគតភាពនឹងគ្នា ហើយជាពិសេសច្បាប់ Cyber ហ្នឹង គឺទាក់ទងទៅនឹងការប្រយុទ្ធប្រឆាំងព័ត៌មានក្លែងក្លាយផង ការពង្រឹងសន្តិសុខហិរញ្ញវត្ថុ និងសន្តិសុខជាតិផង"៕