សម្តេចតេជោ៖ កុំល្ងង់! ខ្ញុំចុះជួបកម្មករក៏ដើម្បីចំណេញនយោបាយផង និងចង់ដឹងពីសុខទុក្ខកម្មករផង មិនមែនជិះសេះមើលផ្កានោះទេ!
អត្ថបទ៖ វឿន សាវុធ
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានប្រកាសច្បាស់ៗទៅកាន់ក្រុមប្រឆាំងដែលតែងតែរិះគន់រាល់ការចុះជួបកម្មករនៅតាមបណ្តារោងចក្ររបស់សម្តេច យកចំណេញនយោបាយ ដោយថា ពិតជាមិនខុសនោះទេ ព្រោះការជួបនេះ ក៏ជាផ្នែកមួយដើម្បីចំណេញនយោបាយផងដែរ កុំល្ងង់ពេក! សូមប្រាប់ទៅវិញផង!។
ការបញ្ជាក់របស់សម្តេចតេជោ បន្ទាប់ពីក្រុមប្រឆាំងបានតែងតែនាំគ្នារិះគន់សម្តេចថា ចុះជួបកម្មករ ដើម្បីចំណេញនយោបាយប៉ុណ្ណោះ ខណៈការបោះឆ្នោតជ្រើសតាំងអ្នកតំណាងរាស្ត្រអាណតិ្តទី៧ នៃរដ្ឋសភា។
«ច្បាស់ណាស់មានអ្នកខ្លះថា លោក ហ៊ុន សែន ចុះមកនេះ ដើម្បីយកចំណេញខាងនយោបាយ សូមផ្តាំត្រឡប់ទៅវិញទៅអាល្ងង់ បើគេធ្វើដើម្បីខាតគេមិនធ្វើនោះទេ! កុំល្ងង់ពេក!»។ នេះជាប្រសាសន៍របស់សម្ដេចតេជោ ហ៊ុន សែន។
ជាមួយគ្នានេះដែរ សម្តេចតេជោ បានលើកឡើងថា ក្រុមអ្នកប្រឆាំង ឬក្រុមណាមួយធ្វើក៏ដើម្បីចំណេញនយោបាយដែរ។ ចំណែកសម្តេចវិញធ្វើដើម្បីខាតផលប្រយោជន៍កម្មករ ឬផលប្រយោជន៍ប្រទេសជាតិសម្ដេចធ្វើទេ?។ ប៉ុន្តែអ្វីដែលសម្ដេចកំពុងធ្វើនេះ គឺដើម្បីកូនៗ ចៅៗ ដើម្បីក្រុមគ្រួសារអ្នកទាំងឡាយដែលសព្វថ្ងៃកំពុងតែពឹងផ្អែកអ្នកនៅទីនេះ។
«សូម្បីតែធ្វើស៊ីហ្គេមក៏ ដើម្បីចំណេញនយោបាយដែរ ដូច្នេះសូមប្រាប់ទៅអាល្ងង់ មីល្ងង់ ថា បើធ្វើសម្រាប់ខាតគេមិនធ្វើទេ?! កុំល្ងង់ពេក! និយាយឲ្យអសុរោះតិចចុះ ដើម្បីឲ្យវាឈឺតិចទៅ!»។ នេះជាប្រសាសន៍របសើសម្ដេចតេជោ។
សម្តេចតេជោ ហ៊ុន សែន បានលើកឡើងថា បច្ចុប្បន្ននេះ រាជរដ្ឋាភិបាល បានខិតខំទប់ស្កាត់អតិផរណារក្សាកម្លាំងទិញនូវអ្វីដែលកម្មករទទួលបាន។ ប្រសិនបើបណ្តោយឲ្យមានអតិផរណា ហើយកម្មករទទួលបានប្រាក់បៀវត្សរ៍ជាប្រាក់រៀល ក្នុងពេលប្រាក់រៀលបាត់តម្លៃនោះកម្លាំងទិញក៏ខ្សោយដែរ។
ទន្ទឹមនឹងនេះដែរ សម្តេចតេជោ ក៏បានណែនាំដល់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈធ្វើរបាយការណ៍ចំពោះការចុះជួបកម្មករលើកទី១ បានអ្វី? ហើយក្រោយចុះបានអ្វីខ្លះ? ដើម្បីប្រៀបធៀបពីវឌ្ឍនភាពដែលសម្រេចបាន។
«ហ៊ុន សែន ចុះមកមិនមែនដូចមកជិះសេះមើលផ្កានោះទេ គឺចង់ដឹងពីសុខទុក្ខកម្មករ និងរបៀបដំណោះស្រាយឲ្យកម្មករ ព្រោះជាបញ្ហាសេដ្ឋកិច្ចជាតិ បញ្ហាការងារធ្វើរបស់ប្រជពលរដ្ឋជាប្រាក់ចំណូលរបស់ពលរដ្ឋដែលយើងត្រូវរកវិធីដោះស្រាយ»។ នេះជាប្រសាសន៍របស់សម្ដេចនាយករដ្ឋមន្ដ្រី ហ៊ុន សែន។
សូមជម្រាបជូនថា ការលើកឡើងនេះរបស់សម្ដេចតេជោ ហ៊ុន សែន ក្នុងពិធីជួបសំណេះសំណាល ជាមួយកម្មករជិត ២ម៉ឺននាក់ ក្នុងតំបន់សេដ្ឋកិច្ចពិសេស រ៉ូយ៉ាល់ គ្រុបភ្នំពេញ នៅព្រឹកថ្ងៃទី២៦ ខែឧសភា ឆ្នាំ២០២៣៕
