សម្តេចកិត្តិព្រឹទ្ធបណ្ឌិត​ ចាត់មន្ត្រីចុះសួរសុខទុក្ខ​ និងនាំយកអំណោយផ្តល់ជូនប្រជាពលរដ្ឋងាយរងគ្រោះបំផុតចំនួន​ ៣១០គ្រួសារ រស់នៅ ខេត្តឧត្តរមានជ័យ​
| ព័ត៌មានជាតិ
SHARE

(ឧត្តរមានជ័យ)​ ៖​ នៅព្រឹកថ្ងៃសៅរ៍ ទី​ ១៧​ ខែសីហា​ ឆ្នាំ២០១៩​ នេះ​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ប្រធាន​កាកបាទក្រហមកម្ពុជា​ បានចាត់ឱ្យ​ លោកជំទាវ​ ម៉ែន​ នារី​សោភ័គ​ អគ្គលេខាធិការរងទី​ ១​ កាកបាទក្រហមកម្ពុជា​ និងសហការី​ រួមជាមួយឯកឧត្តម​ ប៉ែន​ កុសល​្យ​ ប្រធានកិត្តិយស​សាខាកាកបាទក្រហមកម្ពុជា​ខេត្តឧត្តរមានជ័យ​ ចុះសួរសុខទុក្ខ​ និងផ្តល់អំណោយមនុស្សធម៌ជូនប្រជាពលរដ្ឋងាយរងគ្រោះបំផុតចំនួន​ ៣១០គ្រួសារ​រស់នៅស្រុកអន្លង់វែង​ និងស្រុកត្រពាំងប្រាសាទ ខេត្តឧត្តរមានជ័យ​ ដែល​ពិធី​នេះបានរៀបចំនៅទីលានដំឡូង​ ភូមិទួលគ្រួស​ ឃុំថ្លាត ស្រុកអន្លង់វែង​ ខេត្តឧត្តរមានជ័យ​។   


ក្នុងឱកាសជួបសំណេះសំណាលជាមួយប្រជាពលរដ្ឋទាំងអស់​ ​លោកជំទាវ​អគ្គលេខាធិការរងទី​ ១​ បានពាំនាំនូវប្រសាសន៍របស់​សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន ដែលផ្ដាំផ្ញើសួរសុខទុក្ខ​ ក្តីនឹករលឹក​ អាណិតស្រឡាញ់​យ៉ាងជ្រាលជ្រៅ​ និងគិតគូរជានិច្ច​ចំពោះសុខទុក្ខ ជាពិសេស​ក្តីសោមនស្ស​រីករាយ​ជាមួយប្រជាពលរដ្ឋទាំងអស់​ ដែល​រស់នៅតំបន់ធ្លាប់​ជាសមរភូមិប្រយុទ្ធប្រែក្លាយ​ជាមានសន្តិភាព​ ស្ថិរភាព​ និងអភិវឌ្ឍដូចសព្វថ្ងៃនេះ។ 


ទន្ទឹមនឹងនេះ​​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​​ បានអំពាវនាវដល់​ប្រជា​ពលរដ្ឋ​ទាំង​អស់នូវខ្លឹមសារដូចខាងក្រោម​ ៖

-​ ​សូមថែទាំសុខភាព​ឱ្យបានល្អដេីម្បីកាត់បន្ថយការចំណាយក្នុងគ្រួសារ​ ដោយត្រូវ​រស់នៅមាន​អនាម័យ​​ ពិសា​ទឹកដាំឆ្អិន និងបរិភោគអាហារូបត្ថម្ភ​ឱ្យបានត្រឹមត្រូវ​ជៀសវាងជំងឺលេីសឈាម​ ជំងឺបេះដូង​ ឈឺសន្លាក់ ឬទឹកនោមផ្អែម។ល។ 

-​ សូមសម្អាតបរិស្ថាន​ជុំវិញផ្ទះ​ លុបបំបាត់ជម្រកសត្វមូស​ គេងក្នុងមុងជានិច្ច​ជៀសវាង​ជំងឺគ្រុនឈាម​-គ្រុនចាញ់​ ហេីយប្រសិនបេីក្តៅខ្លួន​ ឬចេញរោគសញ្ញាណាមួយ​ត្រូវប្រញាប់ទៅមន្ទីរពេទ្យ​ដេីម្បីព្យាបាលជាបន្ទាន់​ ជៀសវាងបណ្តែតបណ្តោយពេលវេលាធ្វេីឱ្យប៉ះពាល់ដល់អាយុជីវិត។

- សូមស្ត្រីមានផ្ទៃពោះ​ អញ្ជេីញទៅពិនិត្យផ្ទៃពោះឱ្យបានទៀងទាត់​ អនុវត្តតាមការណែនាំរបស់គ្រូពេទ្យ​ និងទៅសម្រាលកូន​នៅមណ្ឌលសុខភាព​ដែលនៅជិតបំផុត។

-​ សូមស្ត្រីមានផ្ទៃពោះ​ដែលមានផ្ទុកមេរោគអេដស៍​ត្រូវទៅពិនិត្យសុខភាពនិងពិគ្រោះជាមួយគ្រូពេទ្យ​ដេីម្បីបង្ការការឆ្លងមេរោគពីម្តាយទៅកូន។

-​ សូមចូលរួមចំណែកទាំងអស់គ្នា​ លុបបំបាត់គ្រឿង​ញៀន​ គ្រឿងស្រវឹង​ និងល្បែងស៊ីសងគ្រប់ប្រភេទ​ ដេីម្បីលេីក​កម្ពស់គោលនយោបាយភូមិឃុំមានសុវត្ថិភាព។ 

-​ សូមប្រជាពលរដ្ឋ​គិតគូរពីសុវត្ថិភាព​ចរាចរណ៍​ ដែលជាបញ្ហាប្រឈម​បង្កឱ្យមានការស្លាប់និងពិការភាពជារៀងរាល់ថ្ងៃ។ 


សូមបញ្ជាក់ថា​ អំណោយដែលបានចែកជូនគ្រួសារនីមួយៗរួមមាន ៖​ អង្ករ​ ៣០គីឡូក្រាម​ មី១កេស​ ត្រីខ​ ១០កំប៉ុង​ ឃីត១​ (មុង​ ភួយ​ សារុង​ ក្រមា​ អាវយឺត​)​​ និងថវិកាថ្លៃធ្វេីដំណេីរចំនួន​ ១ម៉ឺនរៀល៕


Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation