ព័ត៌មានជាតិ

ប្រធានទីស្នាក់ការត្រួតពិនិត្យច្រកទ្វារព្រំដែន​អែនអន្តរជាតិព្រែកចាកខេត្តកំពតថ្មី ត្រូវបានប្រកាសតែងតាំង

image

ខេត្ត្តកំពត៖ នៅព្រឹកថ្ងៃទី០៣ ខែកញ្ញា ឆ្នាំ ២០១៩ នៅទីស្នាក់ការ​ត្រួតពិនិត្យ​ច្រកទ្វារព្រំដែន​អន្តរជាតិ​ព្រែក​ចាកខេត្តកំពត ឯកឧត្ដម​ជាវ តាយ​អភិបាល​នៃគណៈអភិបាលខេត្ត បានអញ្ជើញ​ប្រកាសផ្លាស់ប្ដូរ​និងប្រគល់ភារកិច្ចប្រធានទី​ស្នាក់​ការ​ត្រួតពិនិត្យ​ច្រកទ្វារព្រំដែន​អន្តរជាតិ​ព្រែក​​ចាកខេត្តកំពត។ ពិធី​នេះ មានការចូលរួម​ពីថ្នាក់ដឹកនាំខេត្តមន្ទីរ​អង្គភាព​ជុំវិញខេត្តព្រមទាំងអាជ្ញាធរ​ក្រុង ស្រុក​ប្រជាពលរដ្ឋ​នៃខេត្តកំពត និងមន្ត្រី អាជ្ញាធរ​ពាក់ព័ន្ធ​នៃភាគីមិត្តវៀតណាមជាប់ព្រំដែននិងពាណិជ្ជករអាជីវករផងដែរ។​

យោងតាមប្រកាសរបស់ក្រសួងមហាផ្ទៃ ស្ដីពីការផ្លាស់ប្ដូរ​និងប្រគល់ភារកិច្ចជូនមន្ត្រីរាជការ បានសម្រេចផ្លាស់ប្ដូរប្រគល់ភារកិច្ចជូនលោក ង៉ែត សាវឿន នាយករងរដ្ឋបាលសាលាខេត្តកំពតឲ្យមកកាន់តំណែងជាប្រ​ធាន​ទីស្នាក់ការ​ត្រួតពិនិត្យច្រកទ្វារព្រំដែន​អន្តរជាតិ​ព្រែក​ចាកខេត្តកំពត​ជំនួសលោក​ឡេង វិបុល ដែលត្រូវប្ដូរចេញពីប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិព្រែកចាកឲ្យទៅ​បម្រើការងារ​នៅអង្គភាពដើមវិញ។​

ឯកឧត្ដម​ ជាវ តាយ អភិបាល​នៃគណៈអភិបាលខេត្ត បានមានប្រសាសន៍​គូសបញ្ជាក់ថា៖ ការផ្លាស់ប្ដូរ​តួនាទីភារកិច្ចជូនមន្រ្តីរាជការនាពេលនេះគឺជាការងារធម្មតារបស់មន្រ្តីរាជការសាធារណៈដែលធ្វើឡើងដើម្បីផ្លាស់ប្ដូរបទពិសោធន៍នៃមុខតំណែងផ្សេងទៀតរបស់ស្ថាប័នរដ្ឋ​តាមតម្រូវការចាំបាច់ស្របតាមលិខិតបទដ្ឋានគតិយុត្តជាធរមានដើម្បីលើកកម្ពស់សមត្ថភាពការងារដឹកនាំគ្រប់គ្រងសំដៅធ្វើឲ្យប្រព័ន្ធការងារកាន់តែមានប្រសិទ្ធភាពប្រសើរឡើងថែមទៀតស្របតាមគោលនយោបាយរបស់រាជរដ្ឋាភិបាល។​

ឯកឧត្ដម ជាវ តាយ អភិបាល​ខេត្ត​ក៏បានថ្លែងការកោតសរសើរចំពោះប្រធានទីស្នាក់ការដែលត្រូវបានផ្លាស់ប្ដូរចេញតែងបានយកចិត្តទុកដាក់បំពេញការងារដឹកនាំច្រកទ្វារត្រួតពិនិត្យព្រំដែនអន្តរជាតិព្រែកចាកកន្លងទៅនេះទទួលបានលទ្ធផលល្អប្រសើរ និងបានផ្ដាំផ្ញើឲ្យប្រធានទីស្នាក់ត្រួតពិត្យច្រកទ្វារព្រំដែនដែលទើបប្រគល់និងទទួលភារកិច្ចថ្មីនេះឲ្យខិតខំយកចិត្តទុកដាក់ប្រឹងប្រែងអនុវត្តតួនាទីភារកិច្ចថ្មីរបស់ខ្លួន ក្នុងការងារដឹកនាំគ្រប់គ្រង និងអភិវឌ្ឍ​តំបន់ច្រកទ្វារព្រំដែនអន្តរជាតិព្រែកចាកនេះឲ្យមានការរីកចម្រើនថែមទៀត។​

ឯកឧត្ដម​ជាវ តាយ​អភិបាល​ខេត្ត​ក៏បានបន្តផ្ដល់នូវអនុសាសន៍ផ្ដាំផ្ញើដល់មន្ទីរ អង្គភាព​ជុំវិញខេត្ត អាជ្ញាធរ​ដែនដីគ្រប់លំដាប់ថ្នាក់នៅក្នុងស្រុកកំពង់ត្រាច មន្ត្រី​រាជការ​និងកងកម្លាំងគ្រប់លំដាប់ថ្នាក់ ដែលប្រចាំការនៅច្រកទ្វារអន្តរជាតិព្រែកចាកនេះនូវកិច្ចការសំខាន់ៗមួយចំនួនដែលត្រូវតែប្ដេជ្ញាយកចិត្តទុកដាក់អនុវត្តសម្រេចឲ្យបាន គឺ ការអនុវត្ត​អោយបានត្រឹមត្រូវនូវការបំពេញតួនាទីភារកិច្ចស្របតាមច្បាប់លិខិតបទដ្ឋានគតិយុត្តជាធរមាននិងធ្វើកិច្ចសហប្រតិបត្តិការជាមួយភាគីជាមិត្តរវាងកម្ពុជា-វៀតណាមអោយបានល្អថែមទៀត ត្រូវមានសាមគ្គីភាពល្អ ដោយចេះសម្របសម្រួលក្នុងការផ្ដល់សេវាសាធារណៈប្រកបដោយភាពជឿជាក់និងទុកចិត្តពីប្រជាពលរដ្ឋរស់នៅជាប់ព្រំដែន និងត្រូវចូលរួមលុបបំបាត់ប៉ុស្តិ៍ត្រួតពិនិត្យអនាធិបតេយ្យឲ្យបាន ពង្រឹង​កិច្ចសហប្រតិបត្តិការ​បន្ថែម​ទៀត​ជាមួយស្ថាប័ន​ពាក់ព័ន្ធ​និងកងកម្លាំងសមត្ថកិច្ចនានាដើម្បីរក្សាការពារ​បូរណភាព​ទឹកដី អធិបតេយ្យភាព បង្កើនការគ្រប់គ្រងការចេញចូលឆ្លងកាត់ព្រំដែនទាំងមនុដ​ស្សនិងទំនិញឲ្យបានម៉ឺងម៉ាត់ បន្តពង្រឹង​ពង្រីក​ទំនាក់ទំនង​កិច្ចសហប្រតិបត្តិការ​ល្អជាមួយអាជ្ញាធរ កងកម្លាំង​សមត្ថកិច្ច​ពាក់ព័ន្ធ​ប្រទេសជិតខាងដើម្បីប្រែក្លាយតំបន់ព្រំដែនទៅជាតំបន់ប្រកបដោយសន្តិភាព មិត្តភាព​សហប្រតិបត្តិការ​និងការ​អភិវឌ្ឍ​៕ដោយ៖ ប៉ៃ សុឃីម

ព័ត៌មានទាក់ទង...