ភ្នំពេញ៖​ រដ្ឋលេខាធិការក្រសួងយុត្តិធម៌​ លោក​ គឹម សន្តិភាព បានជំរុញឱ្យថ្នាក់ដឹកនាំ​ និងមន្ត្រីនៅក្រោមឱវាទនៃអគ្គនាយកដ្ឋានកិច្ចការទោសព្រហ្មទណ្ឌ ត្រូវអនុវត្តតួនាទី​ និងភារកិច្ចរបស់ខ្លួនឱ្យបានខ្ជាប់ខ្ជួនប្រកបដោយស្មារតីបុរេសកម្មជានិច្ច ដើម្បីបំពេញការងារទទួលបានលទ្ធផលល្អ ដោយត្រូវប្រកាន់ខ្ជាប់នូវអភិក្រមការងារ លឿន រហ័ស និងត្រឹមត្រូវ។

លោក គឹម សន្តិភាព ដែលទទួលបន្ទុកអគ្គនាយកដ្ឋានកិច្ចការទោសព្រហ្មទណ្ឌ​នោះ​ បានលើកឡើងដូចនេះក្នុងកិច្ចប្រជុំផ្ទៃក្នុងនៃអគ្គនាយកដ្ឋានកិច្ចការទោសព្រហ្មទណ្ឌ​ ជាមួយអ្នកពាក់ព័ន្ធនៅក្នុងវិស័យយុត្តិធម៌​ នៅព្រឹកថ្ងៃ ទី១៨ ខែកញ្ញា ឆ្នាំ២០២៣។

លោក គឹម សន្តិភាព ក្នុងកិច្ចប្រជុំនោះក៏បានប្រកាសនូវសេចក្តីសម្រេចរបស់ លោកឧបនាយករដ្ឋមន្ត្រីរដ្ឋមន្ត្រីក្រសួងយុត្តិធម៌ ស្តីពីការបែងចែកភារកិច្ចរបស់ថ្នាក់ដឹកនាំក្រសួងយុត្តិធម៌ ពាក់ព័ន្ធនឹងអគ្គនាយកដ្ឋានកិច្ចការទោសព្រហ្មទណ្ឌ សម្រាប់នីតិកាលទី៧ នៃរដ្ឋសភា និងបានស្នើសុំដល់ថ្នាក់ដឹកនាំ អនុវត្តនូវតួនាទី និងភារកិច្ចរបស់ខ្លួនឱ្យមានប្រសិទ្ធភាពខ្ពស់ជានិច្ច៕

អត្ថបទ៖​ ម៉ៅ នរិទ្ធិយ៉ា