អត្ថបទ៖ វឿន សាវុធ
ភ្នំពេញ៖ ក្រសួងអប់រំ យុវជន និងកីឡា បានឲ្យដឹងថា ទិវាបង្កើតបណ្តាញលើកទី៥នៃមជ្ឈមណ្ឌលជាតិ Incubation Center of Cambodia (NICC) បានប្រារព្ធ​ធ្វើឡើង នាថ្ងៃទី២១​ ខែកញ្ញា ឆ្នាំ២០២៣​ នៅសណ្ឋាគារមួយកន្លែង ក្នុងរាជធានីភ្នំពេញ។

ព្រឹត្តិការណ៍នេះមានគោលបំណងជំរុញការសន្ទនា និងតភ្ជាប់បណ្តាញសក្តានុពលនៃវិនិយោគិន និងទស្សនិកជនសាជីវកម្ម។

សូមជម្រាបថា សំណង់អគារ NICC និងសម្ភាររូបវ័ន្ធគឺជាជំនួយឥតសំណងរបស់អង្គការ KOICA ដើម្បីគាំទ្រដល់ការចាប់ផ្តើមអាជីវកម្មតាមរយ:នៃការបណ្តុះបណ្តាល ការណែនាំ ការប្រឹក្សា និងការគាំទ្រការច្នៃប្រឌិតបច្ចេកវិទ្យាជាដើម។ មជ្ឈមណ្ឌលនេះក៏ជាកន្លែងតភ្ជាប់រវាងសហគ្រិន អ្នកចាប់ផ្តើមអាជីវកម្ម និស្សិត និងសហគ្រាស ដើម្បីពិភាក្សាអំពីគោលបំណងស្វែងរកដំណោះស្រាយដ៏ល្អបំផុត។
ទិវាបណ្តាញ NICC បានក្លាយជាចំណុចប្រមូលផ្តុំដ៏សំខាន់មួយនៅក្នុងប្រព័ន្ធអេកូឡូស៊ីសហគ្រិននៅកម្ពុជា សម្រាប់អ្នកចាប់ផ្តើមអាជីវកម្ម វិនិយោគិន និងស្ថាប័នពាក់ព័ន្ធនឹងការវិនិយោគនៅកម្ពុជា។
គម្រោងសាងសង់​NICC​ មានទឹកប្រាក់សរុបចំនួន៧,៩១លានដុល្លារអាម៉េរិក។

ចក្ខុវិស័យរបស់ NICC គឺដើម្បីក្លាយជាមជ្ឈមណ្ឌលនៃឧត្តមភាព និងជាវេទិកាគំរូដ៏ល្អបំផុត ដើម្បីបណ្តុះសហគ្រិនវ័យក្មេងកម្ពុជាឲ្យចាប់ផ្តើមរីកចម្រើន និងពង្រីកអាជីវកម្មរបស់ពួកគេ៕