ព័ត៌មានជាតិ

រដ្ឋមន្ត្រី​កាបរទេសកម្ពុជា នឹង​អញ្ជើញ​ធ្វើ​សេចក្ដី​ថ្លែងការណ៍​ ​ផ្ដោត​លើការអភិវឌ្ឍសេដ្ឋកិច្ច-សង្គម សមិទ្ធិផលសំខាន់ និងកិច្ច​ប្រឹងប្រែងរបស់កម្ពុជា​​នៅ​ទីក្រុង​ញូវយ៉ក

image

ឯកឧត្ដម​ ប្រាក់ សុខុន ឧបនាយក​រដ្ឋមន្ត្រី រដ្ឋមន្ត្រី​ការបរទេស និង​សហប្រតិបត្តិការ​អន្តរជាតិ តំណាងរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា នឹង​ដឹកនាំ​គណៈប្រតិភូ​ចូលរួម​កិច្ចពិភាក្សាទូទៅ នៃ​​មហា​សន្និបាត​អង្គការ​សហប្រជាជាតិ លើកទី៧៤ ក្រោម​មូលបទ «ជំរុញកិច្ច​ប្រឹងប្រែង​ពហុភាគី​ សម្រាប់​ការ​លុប​បំបាត់​ភាព​ក្រីក្រ ការអប់រំប្រកបដោយគុណភាព សកម្មភាពអាកាសធាតុ និងបរិយាប័ន្ន» និងកិច្ចប្រជុំពាក់ព័ន្ធផ្សេងទៀត ​ពី​ថ្ងៃទី ២៤ ដល់​ថ្ងៃទី ២៨ ខែ​កញ្ញា ឆ្នាំ ២០១៩ ​នៅ​ទីក្រុង​ញូវយ៉ក។

​ឯកឧត្ដម​ឧបនាយករដ្ឋមន្ត្រី នឹង​អញ្ជើញ​ធ្វើ​សេចក្ដី​ថ្លែងការណ៍​ ​ផ្ដោត​លើការអភិវឌ្ឍសេដ្ឋកិច្ច-សង្គម សមិទ្ធផលសំខាន់ៗ​ឆ្ពោះទៅគោលដៅ​អភិវឌ្ឍន៍​សហស្សវត្សរ៍ និងកិច្ច​ប្រឹងប្រែង​​ឆ្ពោះ​ទៅ​គោលដៅ​អភិវឌ្ឍន៍​ប្រកប​ដោយ​ចីរភាពរបស់កម្ពុជា និងសារៈ​សំខាន់​នៃ​កិច្ច​ប្រឹង​ប្រែង​រួម​ក្នុង​ការ​ដោះ​ស្រាយ​បញ្ហាការ​ប្រែប្រួល​អាកាសធាតុ ភេរវកម្ម អំពើជ្រុលនិយមនិងអចន្តិនិយម និងការគំរាមកំហែងសន្តិសុខមិនប្រពៃណី។ ឯកឧត្ដម ក៏នឹងរំលេចបញ្ហា​សណ្តាប់ធ្នាប់ពិភពលោកថ្មី ពហុភាគីនិយម តួនាទីច្បាប់អន្តរជាតិ ផលប៉ះពាល់ជាអវិជ្ជមាននៃព័ត៌មានក្លែងបន្លំ និងបញ្ហាតំបន់និង​អន្តរជាតិ​ដែល​មានផលប្រយោជន៍និង​ការ​ព្រួយ​បារម្ភ​រួម ​នៅ​ក្នុង​សេចក្ដី​ថ្លែងការណ៍​នេះ​ផង​​ដែរ។

​ក្រៅពីអញ្ជើញចូលរួមមហា​សន្និបាតនេះ​ ឯកឧត្ដម​ឧបនាយករដ្ឋមន្ត្រី ​នឹង​មាន​ជំនួប​ទ្វេ​ភាគី​ដាច់ដោយឡែកពីគ្នាជាមួយឯកឧត្តម ថូម៉ាស ភេទ្រីសេក (Tomas Petricek) ​រដ្ឋមន្ត្រី​ការបរទេសនៃសាធារណរដ្ឋឆែក និង ឯកឧត្តម សឺរហ្គេយ ឡាវរ៉ូវ (Sergey V. Lavrov) ​រដ្ឋមន្ត្រី​ការបរទេសនៃសហព័ន្ធរុស្ស៊ី។ ឯកឧត្ដម​ឧបនាយករដ្ឋមន្ត្រី ​ក៏រំពឹងថានឹងមានជំនួបដាច់ដោយឡែកជាមួយរដ្ឋមន្រ្តីការបរទេសនៃប្រទេសមួយចំនួនផ្សេងទៀត រួមទាំង​អគ្គលេខាធិការ​អង្គការ​សហប្រជាជាតិ​ផង​ដែរ។

​ស្របពេល​ជាមួយមហា​សន្និបាតនេះ គណៈ​ប្រតិភូ​កម្ពុជា ក៏នឹង​ចូលរួម​កិច្ច​ប្រជុំ​ថ្នាក់​រដ្ឋមន្ត្រី​ក្រៅ​ផ្លូវការ​នៃ​សន្និសីទ​ស្ដីពី​អន្តរកម្ម​ និង​វិធានការ​កសាង​ទំនុក​ចិត្ត​នៅតំបន់​អាស៊ី (CICA) កិច្ចប្រជុំថ្នាក់រដ្ឋមន្រ្តីនៃចលនាមិនចូលបក្សសម័្ពន្ធ (NAM) កិច្ចប្រជុំថ្នាក់រដ្ឋមន្រ្តីនៃបណ្តាប្រទេសអភិវឌ្ឍតិចតួច (LDCs) កិច្ចប្រជុំរដ្ឋមន្រ្តីការបរទេសដៃគូសហប្រតិបត្តិការអាស៊ី (ACD) កិច្ចប្រជុំរដ្ឋមន្រ្តីការបរទេសអាស៊ានក្រៅផ្លូវការ (IAMM) និងកិច្ចប្រជុំរដ្ឋមន្រ្តីការបរទេសអាស៊ានជាមួយប្រធានមហាសន្និបាតអង្គការសហប្រជាជាតិ លើកទី៧៤ និងអគ្គលេខាធិការអង្គការសហប្រជាជាតិ (IUMM) ព្រមទាំងកិច្ចប្រជុំជាច្រើនទៀត៕

ព័ត៌មានទាក់ទង...