បិទផ្លូវគោក លួចចេញផ្លូវទឹក! មេបញ្ជាការកងរាជអាវុធខេត្តក្រចេះបញ្ជាឲ្យចាប់ទូកឈើ១គ្រឿង ចំណុះជាង១០ម៉ែត្រគុប
| ព័ត៌មានជាតិ
SHARE

ក្រចេះ៖ កម្លាំងកងរាជអាវុធហត្ថស្រុកចិត្របុរី ខេត្តក្រចេះ បានចុះប្រតិបត្តិការ បង្ក្រាបបទល្មើសព្រៃឈើតាមផ្លូវទឹក ដោយឃាត់បានទូកឈើ (ទូកអេវ ) បានមួយគ្រឿង កាលពីវេលាម៉ោង០៥ទៀបភ្លឺ ថ្ងៃទី១៤ ខែវិច្ឆិកា ឆ្នាំ២០១៩ ស្ថិតក្នុងភូមិសាស្ត្រ ភូមិឫស្សីចារ ឃុំថ្មគ្រែ ស្រុកចិត្របុរី ខេត្តក្រចេះ។

លោក អ៊ឹម យុគន្ធរ មេបញ្ជាការរង អាវុធហត្ថស្រុកចិត្តបុរី បានឲ្យដឹងថា ប្រតិបត្តិការនេះត្រូវបានដឹកនាំដោយលោក អ៊ឹម ចិត្រា មេបញ្ជាការអាវុធហត្ថស្រុកចិត្របុរី និងដោយមានការបញ្ជាផ្ទាល់ ពីសំណាក់លោកឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្ត ក្រចេះ។

លោកអ៊ឹម យុគន្ធរ បន្តថា ប្រតិបត្តិការការនេះ កម្លាំងឃាត់បានទូកឈើ១គ្រឿង (ទូកអេវ) ដែលយោងតាមការសន្និដ្ឋានជាបឋម ទូកនេះមានផ្ទុកឈើ ប្រហែលជាង១០ម៉ែត្រគុប។ មេបញ្ជាការរង អាវុធហត្ថស្រុកចិត្តបុរី បានបន្តថា ក្រោយពីបង្ក្រាបបានរួចរាល់ កម្លាំងមូលដ្ឋានអាវុធហត្ថស្រុកបានប្រគល់ឲ្យទៅជំនាញរដ្ឋបាលព្រៃឈើសង្កាត់ថ្មគ្រែ ដើម្បីរក្សាទុក និងកសាងសំណុំរឿងតាមនីតិវិធី។

គួររំលឹកថា ក្នុងការបង្ក្រាបនេះ ក៏ដូចជាការបង្កា្របរាល់ដង គេមិនដែលឃើញវត្តមានមន្ត្រីជំនាញរដ្ឋបាលព្រៃឈើ ចុះបង្ក្រាបដោយផ្ទាល់ទេ ភាគច្រើនគឺរង់ចាំតែកងកម្លាំងដទៃចាប់ប្រគល់ជូន ដូចពាក្យចាស់លោកពោលថា ចាំឆ្អិនស្រាប់។

យោងតាមប្រភពព័ត៌មានបានបង្ហើបថា ក្នុងភូមិសាស្ត្រស្រុកចិត្របុរីនេះ ទូកឈើជាច្រើនតែងចេញជាទៀងទាត់រៀងរាល់យប់ដោយរលូន ប៉ុន្តែដោយឡែកសម្រាប់ទូក១គ្រឿងដែលត្រូវបានបង្ក្រាបនេះ គឺដោយសារតែលោតឆត្រលួចចេញដោយមិនគោរពតាមម៉ោងពេល ខុសការព្រមព្រៀងជាមួយសមត្ថកិច្ច៕ដោយ៖នាង ចន្ថា


Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation