វិទ្យាស្ថាន​បច្ចេកវិទ្យា​កម្ពុជា​សហការ​ជាមួយ​ទីភ្នាក់ងារ​ឧ​ត្ត​មសិ​ក្សា​ប្រើប្រាស់​ភាសា​បារាំង​(AUF)​ប្រចាំ​តំបន់​អាស៊ី​ប៉ាស៊ីហ្វិក​បាន​បើក​ការប្រកួតប្រជែង​វគ្គ​ផ្តាច់​ព្រ័ត្រ​លើ​ការបង្កើត​គម្រោង​ច្នៃប្រឌិត​ឆ្នាំ​២០១៩​ក្រោម​ប្រធានបទ​៖​ស្មារតី​សហគ្រិនភាព​ឆ្ពោះទៅ​គម្រោង​“​ការបង្កើត​ថ្មី​សម្រាប់​សង្គម​និង​សាមគ្គីភាព »​ក្នុងគោលបំណង​បង្កើត​ទំនាក់ទំនង​រវាង​វិស័យ​អប់រំ​បណ្តុះបណ្តាល​និង​តួអង្គ​សង្គម​សេដ្ឋកិច្ច​ក្នុង​តំបន់​និង​រំលេច​ឡើង​នូវ​គម្រោង​សហគ្រិនភាព​ថ្មីៗ​ជាច្រើន​របស់​យុវ​និស្សិត​និង​យុវជន​ទើប​បញ្ចប់​ការសិក្សា​ជា​ភាសា​បារាំង​ដែលមាន​អាយុ​ក្រោម​៣៥​ឆ្នាំ​។​

​បេក្ខជន​ឆ្នើម​ចំនួន​៦​ក្រុម​ចុងក្រោយ​បាន​ចូលរួម​ក្នុង​វគ្គ​ប្រកួត​ផ្តាច់​ព្រ័ត្រ​ នាទី​ក្រុងភ្នំពេញ​ក្នុងនោះ​មាន​៤​ក្រុម​មកពី​ប្រទេស​វៀតណាម​និង​២​ក្រុម​នៅ​កម្ពុជា​។​ពួកគេ​បានធ្វើ​ការការពារ​គម្រោង​ធុរកិច្ច​របស់ខ្លួន​ជា​ភាសា​បារាំង​នៅ​ចំពោះមុខ​គណៈមេប្រយោគ​ដែល​សុទ្ធតែជា​សហគ្រិន​។​ 

ជ័យលាភី​នឹង​ទទួលបាន​ការចុះ​ធ្វើ​កម្មសិក្សា​នៅតាម​ក្រុមហ៊ុន​ដែល​ប្រើប្រាស់​ភាសា​បារាំង​នៅ​ប្រទេស​បារាំង​និង​នៅក្នុង​តំបន់​ហើយក៏​នឹង​ទទួលបាន​នូវ​ទំនាក់ទំនង​ដោយផ្ទាល់​ជាមួយ​វិនិយោគិន​សំខាន់ៗ​ជាច្រើន​មកពី​ប្រទេស​បារាំង​និង​វៀតណាម​ផងដែរ​។​

ជា​លទ្ធផល​នៃ​ការប្រកួតប្រជែង ជ័យលាភី​លេខ​១ បាន​ទៅលើ​ក្រុមនិស្សិត​វៀតណាម លេខ​២​និស្សិត​កម្ពុជា និង​លេខ​៣​ស្ទួន បាន​ទៅ​ក្រុមនិស្សិត​វៀតណាម​។​

ជ័យលាភីទី១បានទៅក្រុម AC-Cool របស់ NGUYEN Ngoc Thanh Phuong & NGO Thi Ha My ; គម្រោង AC-Cool ផ្តល់នូវផលិតផល១០០%ជីវៈផ្លាស្ទិកគ្មានគ្រោះថ្នាក់និងមានការគោរពពីបរិស្ថានសម្រាប់ជំនួសផលិតផលប្លាស្ទិក។

លេខពីបានទៅក្រុម UNITECH របស់ក្រុមCHAN Sereivath & DUONG Porhuot ; ជាគម្រោងបង្កើតកម្មវិធី Venta ដែលអាចឲ្យកុមារ មនុស្សចាស់ ជនពិការ និងនិស្សិតសិក្សាផ្នែកទេសចរណ៍ អាចទស្សនាតំបន់ទេសចរណ៍នានាជុំវិញខ្លួនបាន(ក្នុងរង្វង់៣៦០ដឺក្រេ) ដោយគ្រាន់តែប្រើវ៉ែនតា។

លេខបីពីរក្រុមបានទៅ TLNET របស់ក្រុម NGUYEN Thi Tra My 7 BUI Tuan Anh ដែលជាដំណោះស្រាយមួយសម្រាប់គ្រឹះស្ថានអប់រំអាចប្រើកម្មវិធីស្មាតអាចសំគាល់មុខសិស្ស/និស្សិតដើម្បីបញ្ចៀសបានរាល់បញ្ហាលួចចម្លងនិងអំពើហិង្សានានាក្នុងសាលា។

ជ័យលាភីទី៣មួយក្រុមទៀតបានទៅក្រុម Happy Life របស់ក្រុម Nguyen Ngoc Hanh & Pham Hong Hanh ដែលបង្កើតទស្សនាវដ្តីអាហាសុវត្ថិភាពសម្រាប់ប្រជាជនទីក្រុង សាយ ហ្កន នូវផលិតផលកសិកម្មប្រកបដោយសុវត្ថិភាពនិងគោរពពីបរិស្ថាន ដោយប្រើវិធីសាស្ត្រថ្មីៗក្នុងទស្សនាវដ្តីជាបន្តបន្ទាប់។

គួរបញ្ជាក់ថា ជ័យលាភី​លេខ​១​នឹង​ទទួលបាន​កម្មសិក្សា​រយៈ​ពេល​២​ស​ប្តា​ហ៍​នៅក្នុង​ក្រុមហ៊ុន​នៅ​ទីក្រុង​ប៉ារីស​ប្រទេស​បារាំង​។​ ជ័យលាភី​ទី​២​ទទួលបាន​កម្មសិក្សា​នៅ​ទីក្រុង​ហាណូយ​រយៈពេល​២​ស​ប្តា​ហ៏។​ រីឯ​ជ័យលាភី​ទី​៣​នឹង​ទទួលបាន​រង្វាន់​ជា​ថវិកា​ចំនួន​២៥០​អឺរ៉ូ​(​ចំនួន​ពីរ​ង្វាន់​)​៕អត្ថបទ ៖ ស៊ន សុខឃៀង