កំពត៖ មុនឱកាសនៃពិធីបុណ្យសមុទ្រលើកទី១១ ជុំទី៣ ចូលមកដល់ ថ្នាក់ដឹកនាំមន្ទីរទេសចរណ៍​ន​ បានឱ្យដឹងថា នៅទូទាំងខេត្តកំពត​ មានសេវាកម្មទេសចរណ៍​ចំនួន​ ៥២៤កន្លែង ក្នុងនោះមានបន្ទប់សម្រាប់ស្នាក់នៅចំនួន ៥.០៦៩បន្ទប់ និងភោជនីយដ្ឋាន អាហារដ្ឋានប្រមាណ ១៣០ទីតាំង​ ផងដែរ។ ប្រសិនបេីភ្ញៀវទៅកម្សាន្ត និងស្នាក់នៅក្នុងខេត្តកំពត​ នឹងពេញចិត្តគ្រប់សេវាកម្មទេសចរណ៍ទាំងអស់។

លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឱ្យដឹងថា សេវាកម្មទេសចរណ៍ទាំង​ ៥២៤កន្លែង ក្នុងនោះសេវាស្នាក់នៅមានចំននួន ៣៣២កន្លែង ស្មើនឹង ៥.០៦៩បន្ទប់ សេវាម្ហូបអាហារ​ ១៣០ទីតាំង សេវាកម្សាន្តសម្រាប់មនុស្សពេញវ័យ ២៦កន្លែង សេវាម៉ាស្សា ៣១កន្លែង កីឡាទេសចរណ៍ ៣កន្លែង ព្រមទាំងទីភ្នាក់ងារ និងការិយាល័យទេសចរណ៍មាន ២កន្លែង។ សម្រាប់ឱកាសនៃពិធីបុណ្យសមុទ្រ ក៏ដូចជាពិធីផ្សេងៗនាពេលខាងមុខ​ លោករំពឹងថា​ ភ្ញៀវនឹងកាន់តែសប្បាយរីករាយ ហើយមានភាពកក់ក្តៅជាមួយសកម្មភាពបដិសណ្ឋារកិច្ច សន្តិសុខ សុវត្ថិភាព ក៏ដូចជាគ្រប់តម្លៃសេវាកម្មទាំងអស់។

លោកប្រធានមន្ទីរ​ បានបញ្ជាក់ថា ជាក់ស្តែងអំឡុងពេលព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុកកន្លងទៅ​ មិនមានករណីអវិជ្ជមានណាមួយកើតឡើងចំពោះភ្ញៀវដែលមកកម្សាន្តនៅខេត្តកំពតឡើយ។ មន្ត្រីមន្ទីរទេសចរណ៍បានចុះស្រង់បញ្ជីតម្លៃមុខទំនិញ និងសេវាកម្មនៅទីតាំងអាជីវកម្មទេសចរណ៍មករក្សាទុកសម្រាប់ផ្ទៀងផ្ទាត់ពេលមានប្រតិកម្មពីភ្ញៀវស្របតាមការណែនាំរបស់ថ្នាក់ដឹកនាំខេត្ត។

ម្យ៉ាងវិញទៀត កាលពីថ្ងៃទី១៤ ខែឧសភា និងថ្ងៃទី៧ ខែវិច្ឆកា ឆ្នាំ២០២៤ អភិបាលខេត្តកំពត​ ក៏បានធ្វើពិធីជួបសំណេះសំណាល និងធ្វើសវនការជាមួយប្រតិបត្តិករទេសចរណ៍ ដោយអំពាវនាវឱ្យអាជីវករ​ ផ្តល់នូវជំនឿទុកចិត្តសម្រាប់អតិថិជន និងរក្សាភាពថ្លៃថ្នូរក្នុងមុខរបររបស់ខ្លួន ហើយថ្មីៗនេះ ក្រសួងទេសចរណ៍​ ក៏បានអញ្ជើញប្រតិបត្តិករ និងគ្រប់ភាគីពាក់ព័ន្ធចូលរួមប្រជុំ​ ដើម្បីពង្រឹងសេវាកម្មទេសចរណ៍នេះ៕

អត្ថបទ៖ វង្ស សុធារម្យ