ចិនបង្ហាញនាវាផ្ទុកយន្តហោះចម្បាំងដែលផលិតដោយខ្លួនឯងផ្ទាល់ជាលើកដំបូង
| ព័ត៌មានអន្តរជាតិ
SHARE

នៅថ្ងៃពុធនេះទូរទស្សន៍របស់រដ្ឋក្នុងប្រទេសចិនបានចាក់ផ្សាយវីដេអូបង្ហាញពីរូបរាងនាវាផ្ទុកយន្តហោះចម្បាំងថ្មីសន្លាងរបស់ចិនដែលត្រូវបានផលិតនៅក្នុងស្រុកផ្ទាល់ជាលើកដំបូងមានឈ្មោះថា សានទុង (Shandong) ដែលត្រូវបានសម្ពោធដាក់ឲ្យប្រើប្រាស់ជាផ្លូវការកាលពីថ្ងៃអង្គារក្រោមការត្រួតពិនិត្យរបស់ប្រធានាធិបតីចិន លោក ស៊ី ជីនពីង (Xi Jingping)។

ពិធីប្រគល់នាវាផ្ទុកយន្តហោះចម្បាំងនេះទៅឲ្យកងទ័ពជើងទឹកចិនត្រូវបានធ្វើឡើងនៅឯមូលដ្ឋានកងទ័ពជើងទឹក សាន់យ៉ា (Sanya) ក្នុងភាគខាងត្បូងកោះ ហៃណាន (Hainan) ក្បែរប្រជុំកោះកំពុងមានជម្លោះនៅក្នុងសមុទ្រចិនខាងត្បូង។

ការសម្ពោធដាក់ឲ្យប្រើប្រាស់នេះត្រូវបានគេមើលឃើញថាគឺជាការធ្វើទំនើបកម្មយោធាដ៏ធំមួយរបស់ចិន។

កម្មវិធីនាវាផ្ទុកយន្តហោះចម្បាំងរបស់ចិនមិនសូវផ្សព្វផ្សាយទូលំទូលាយទេដោយសារជាកិច្ចការសម្ងាត់របស់រដ្ឋប៉ុន្តែរដ្ឋាភិបាលបានប្រកាសថានាវាផ្ទុកយន្តហោះចម្បាំង សានទុង (Sandong) ត្រូវបានផលិតឡើងដោយយកតាមគំរូនាវាផ្ទុកយន្តហោះចម្បាំងទី១របស់ចិនឈ្មោះ ឡាវនីង (Liaoning) ដែលបានទិញពីអ៊ុយក្រែនកាលពីឆ្នាំ១៩៩៨។

តាមរយៈការដាក់ឲ្យប្រើប្រាស់ជាផ្លូវការនូវនាវាផ្ទុកយន្តហោះចម្បាំងមួយគ្រឿងបន្ថែមទៀតនេះ ចិនបានបង្ហាញពីមហិច្ឆតាធ្វើទំនើបកម្មយោធានៅក្នុងបរិបទដែលកំពុងមានភាពតានតឹងជាមួយកោះតៃវ៉ាន់, អាមេរិក ព្រមទាំងជម្លោះជាមួយប្រទេសក្នុងតំបន់អាស៊ីនៅសមុទ្រចិនខាងត្បូង៕

Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation