ថៃឡង់ដ៍៖ យោងតាមការចុះផ្សាយដោយសារព័ត៌មានខោវសូដ (Khaosod) របស់ថៃឡង់ដ៍ បានឱ្យដឹងថា នៅព្រឹកព្រលឹមថ្ងៃទី១៤ ខែមេសា មានភ្លៀងបង្អុរធ្លាក់យ៉ាងខ្លាំងក្លា និងបង្កជាជំនន់ទឹកភ្លៀង វាយប្រហារភូមិហយហុមណុក (Huay Hom Nok), ឃុំថាមេលប់ (Tha Mae Lop), ស្រុកម៉ែថា (Mae Tha), ខេត្តឡាំភុន (Lam Phun) ប្រទេសថៃ ។

ទឹកជំនន់ដ៏ខ្លាំងក្លានេះ បានបំផ្លិចបំផ្លាញផ្ទះសម្បែង, យានជំនិះ, ដើមឈើ និងឆក់យកអាយុជីវិតសត្វពាហហៈរបស់អ្នកស្រុកថែមទៀតផង ជាពិសេសសត្វគោ។ លើសពីនេះ ក៏មានសេចក្ដីរាយការណ៍ដែរថា មនុស្ស២នាក់ស្លាប់ នៅក្នុងឧបទ្ទវហេតុគ្រោះទឹកជំនន់ថ្ងៃចូលឆ្នាំថ្មីខាងលើនេះ ។

ពាក់ព័ន្ធនឹងរឿងរ៉ាវនេះ អាជ្ញាធរ បានចុះទៅកាន់តំបន់រងគ្រោះភ្លាមៗ ដើម្បីផ្ដល់ជំនួយដល់អ្នកស្រុក និងចាប់ផ្ដើមត្រួតពិនិត្យថា តើមានការខូចខាតប៉ុន្មានខ្លះ។ ទន្ទឹមនឹងនោះ មន្ត្រីបានរកឃើញថា មានផ្ទះចំនួន៦ខ្នងត្រូវទឹកជំនន់បំផ្លាញទាំងស្រុង។ ជុំវិញសេចក្ដីរាយការណ៍ក្រៅផ្លូវការមួយផ្សេងទៀត បានអះអាងថា ផ្ទះចំនួន៣ខ្នងនៅឯភូមិហយហុមណៃ (Huay Hom Nai) (ឬភូមិលេខ៥) ដែលជាភូមិមួយផ្សេងទៀតនោះ ក៏រងនូវការខូចខាតផងដែរ ៕

ប្រែសម្រួល៖ ឡេង លាងហេង
ប្រភព/ រូបភាព៖ Khaosod English