ព្រៃវែង​៖ នៅថ្ងៃទី១នៃពិធីបុណ្យចូលឆ្នាំថ្មីប្រពៃណីជាតិខ្មែរ ត្រូវនឹងថ្ងៃទី១៤ ខែមេសា ឆ្នាំ២០២៥ ព្រឹត្តិការណ៍សង្ក្រាន្តព្រៃវែង ឆ្នាំ២០២៥ មានអ្នកចូលរួមទស្សនា និងលេងកម្សាន្តនៅទីតាំងតំបន់ត្រជាក់ចិត្ត ស្តង់ពិព័រណ៍ពាណិជ្ជកម្ម ភូមិល្បែងប្រជាប្រិយ ទីតាំងប្រកួតប្រដាល់គុនខ្មែរ ទីតាំងប្រឡងចម្រៀង ប្រកួតស្រីស្រស់ប្រុសស្អាត និងបវរកញ្ញាវ័យចំណាស់ ចំនួនប្រមាណជិត ៦០ម៉ឺននាក់។

គិតចាប់ពីថ្ងៃបើកព្រឹត្តិការណ៍ ថ្ងៃទី១២ មកដល់ថ្ងៃទី១៤ ខែមេសា ឆ្នាំ២០២៥ សង្ក្រាន្តព្រៃវែង ទទួលបានអ្នកមកចូលរួមលេងកម្សាន្តចំនួនប្រមាណ ៧៥ម៉ឺននាក់។

សូមបញ្ជាក់ថា រដ្ឋបាលខេត្ត បានសហការជាមួយសហភាពសហព័ន្ធយុវជនកម្ពុជាខេត្ត រៀបចំព្រឹត្តិការណ៍សង្ក្រាន្តព្រៃវែង ឆ្នាំ២០២៥ រយៈពេល៥ថ្ងៃ ដោយមានរៀបចំការប្រគុំតន្ត្រីខ្នាតយក្ស និងប្រដាល់គុនខ្មែរ នៅសួនសម្តេចក្រឡាហោម ឆាកតន្ត្រីEDM ដោយមានDJ និងតារាល្បីៗនៅតំបន់ត្រជាក់ចិត្ត និងឆាកតន្ត្រី ចំនួន ៣ផ្សេងទៀត ដែលរៀបចំដោយអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំក្រសួងមហាផ្ទៃ ការលេងល្បែងប្រជាប្រិយ ការប្រកួតអុកចត្រង្គ និងការឡើងសសរខ្លាញ់យករង្វាន់ នៅក្នុងបរិវេណសាលាបឋមសិក្សាព្រៃវែងក្រុង ការប្រកួតបាល់ទះក្នុងភក់ នៅមុខសាលាខេត្ត ការបង្ហោះគោម និងបាញ់កាំជ្រួច នៅទីតាំងចុងប៉ម ការសម្តែងក្បាច់គុនយុទ្ធក្រមខម នៅសួនតេជោសន្តិភាព ការប្រឡងចម្រៀង ប្រឡងស្រីស្រស់ប្រុសស្អាត និងបវរកញ្ញាវ័យចំណាស់ ជាពិសេសក្នុងយប់ថ្ងៃទី១៥ នឹងមានការសម្តែងទស្សនីយភាពល្ខោនយីកេខ្នាតធំ "រឿងតេជោជ្រែកដី" នៅដីឡូត៍ខាងមុខសាខាកាកបាទក្រហមខេត្តផងដែរ៕

អត្ថបទ​៖ មិន​ភក្ដី​