កំពង់ស្ពឺ៖ តុលាការខេត្តកំពង់ស្ពឺ​ ចេញដីការឱ្យលក់ដោយបង្ខំនូវទ្រព្យសម្បត្តិទាំង​ ៧៩កន្លែង​ របស់លោកស្រី ម៉ន ដានី ម្ចាស់បុរី​ ម៉ន ដានី បន្ទាប់ពីតុលាការសម្រេចចោទប្រកាន់ពីបទ​ «មិនបំពេញកាតព្វកិច្ចចំពោះឧបករណ៍អាចជួញដូរបាន ប្រព្រឹត្តនៅរាជធានីភ្នំពេញ កាលពីថ្ងៃទី១៣ ខែឧសភា ឆ្នាំ២០២៣ បទល្មើសដែលមានបញ្ញត្តិឱ្យផ្តន្ទាទោសតាមមាត្រា២៣១ នៃច្បាប់ស្តីពីឧបករណ៍អាចជួញដូរបាន​ និងប្រតិបត្តិការទូទាត់សងប្រាក់»​។ នេះបើតាមដីកាសម្រេច​ នៅថ្ងៃទី២ ខែធ្នូ​ ឆ្នាំ២០២៤ ដែលទើបផ្សព្វផ្សាយជាសាធារណៈនៅថ្ងៃទី៩ ខែឧសភា ឆ្នាំ២០២៥។

យោងតាម និយ័តករអាជីវកម្មអចលនវត្ថុ និងបញ្ចាំ​ បានឱ្យដឹងថា ពលរដ្ឋរាប់ពាន់គ្រួសារ​ បានរងគ្រោះពីគម្រោងអភិវឌ្ឍន៍របស់ក្រុមហ៊ុន ម៉ន ដានី រៀលអ៊ីស្ទេត ឯ.ក ក្នុងនោះមានទាំងម្ចាស់ដី ដែលបានលក់ដីឱ្យក្រុមហ៊ុន អតិថិជនរបស់ក្រុមហ៊ុន ដែលបានបង់ប្រាក់ផ្តាច់ និងបង់រំលស់ ផងដែរ៕