រដ្ឋមន្ត្រីកិច្ចការនារី ស្នើសុំឲ្យសហភាពអឺរ៉ុប ជួយគាំទ្រដើម្បីបង្កើតកម្មវិធីមួយ ក្នុងកិច្ចប្រជុំកំពូលអាស៊ី-អឺរ៉ុប
ភ្នំពេញ ៖ លោកជំទាវវេជ្ជបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានទទួលជួបជាមយយ លោកជំទាវ ខាមែន ម៉ូរីណូ (Carmen Morino) ឯកអគ្គរដ្ឋទូតសហភាពអឺរ៉ុបប្រចាំកម្ពុជា ចូលជួបសម្ដែងការគួរសម នៅទីស្តីការក្រសួង។ គោលបំណងនៃជំនួបនេះ គឺដើម្បីជជែក អំពី ផែនការគោលដៅផ្សេងៗ រវាងសភាពអឺរ៉ុប និងក្រសួងកិច្ចការនារី ដែលបានផ្ដោតទៅលើ បញ្ហាសំខាន់មួយចំនួន ពាក់ព័ន្ធនឹង កិច្ចប្រជុំកំពូលអាស៊ី-អឺរ៉ុប ដែលកម្ពុជានឹងធ្វើជាម្ចាស់ផ្ទះ នាចុងឆ្នាំនេះ។
លោកជំទាវ អ៊ឹង កន្ថាផាវី មានប្រសាសន៍ថា កិច្ចប្រជុំអាស៊ី-អឺរ៉ុបនេះ គឺក្រសួងកិច្ចការនារី ចង់បង្កើតនូវកម្មវិធីមួយ (Side Event) នៅក្នុងកិច្ចប្រជុំកំពូលអាស៊ី-អឺរ៉ុបនេះ ដែលមានឈ្មោះថា កម្មវិធី «ស្ត្រី សន្តិភាព និងសន្តិសុខ»។ ក្នុងន័យនេះ លោកជំទាវរដ្ឋមន្ត្រី បានស្នើសុំ ឯកអគ្គរដ្ឋទូត សហភាពអឺរ៉ុប ឲ្យជួយសម្របសម្រួល ធ្វើយ៉ាងណាឲ្យមានការគាំទ្រ ពីសហភាពអឺរ៉ុប ទៅលើបញ្ហាហិរញ្ញវត្ថុ និងបច្ចេកទេស ដល់ក្រសួងកិច្ចការនារី ដើម្បីរៀបចំ Side Event មួយនេះឡើង។
ការស្នើសុំនេះ ដោយសារតែនៅក្នុងរបៀបវារៈ នៃកិច្ចប្រជុំកំពូលអាស៊ី-អឺរ៉ុប នៅពេលខាងមុខ គឺមិនមានការផ្ដោតទៅលើ កិច្ចការនារីនោះទេ ដូច្នេះហើយ ទើបលោកជំទាវរដ្ឋមន្ត្រី លើកនូវគម្រោងកម្មវិធីនេះឡើង។
ជាការឆ្លើយតប លោកជំទាវទូតសហភាពអឺរ៉ុប បានទទួលយកសំណើរ ហើយថានឹងជួយសម្របសម្រួល ដើម្បីឲ្យមានការគាំទ្រផ្សេងៗ ពីបណ្តាប្រទេសជាសមាជិកសហភាពអឺរ៉ុប ដែលមានជាង៥០ប្រទេសនោះ ដើម្បីជួយគាំទ្រដល់ក្រសួងកិច្ចការនារី ដើម្បីសម្រេចនូវផែនការនេះ។
គួររំលឹកថា កន្លងមកសភាពអឺរុប បានជួយកម្ពុជា ជាពិសេសក្រសួងកិច្ចការនារី ដោយបានគាំទ្រ ទៅលើការលើកកម្ពស់សមភាពយេនឌ័រ ជាថវិកានិងបច្ចេកទេសមួយចំនួន។
សូមជម្រាបថា កិច្ចប្រជុំកំពូលអាស៊ី-អឺរ៉ុប លើកទី១៣ ដែលកម្ពុជាធ្វើជាម្ចាស់ផ្ទះលើកដំបូង នឹងប្រព្រឹត្តទៅ នាថ្ងៃទី១៦-១៧ ខែវិច្ឆិកា ឆ្នាំ២០២០ខាងមុខនេះ នៅរាជធានីភ្នំពេញ៕អត្ថបទ ៖ សន ពិសិដ្ឋ