ប្រេស៊ីល៖ភ្លេីងឆេះព្រៃជិត៣ម៉ឺនកន្លែងបានកេីតឡេីងនៅក្នុងតំបន់ព្រៃអាម៉ាហ្សូនក្នុងប្រទេសប្រេស៊ីលកាលពីខែសីហា ដែលនោះជាចំនួនភ្លេីងឆេះព្រៃប្រចាំខែច្រើនបំផុតលំដាប់ទី២ក្នុងរយៈពេល១០ឆ្នាំកន្លងមកនេះ។ 

ចំនួននេះបានថយចុះតិចជាងចំនួនភ្លេីងឆេះព្រៃក្នុងខែសីហាដូចគ្នាកាលពីឆ្នាំមុន៥%ស្របពេលដែលរូបភាពនៃភ្លើងឆេះព្រៃនៅក្នុងតំបន់ព្រៃត្រូពិចដ៏ធំបំផុតរបស់ពិភពលោកនេះត្រូវបានចែកចាយនៅជុំវិញពិភពលោក​ ហេីយដុតបញ្ឆេះឲ្យមានកំហឹងជាសកល។

នៅឆ្នាំនេះ​ ភ្លេីងឆេះព្រៃនៅក្នុងតំបន់ព្រៃអាម៉ាហ្សូននៃប្រទេសប្រេស៊ីលបានកើតឡើងប្រហាក់ប្រហែលគ្នានឹងឆ្នាំ២០១៩​ ប៉ុន្តែផ្នែកដែលរងផលប៉ះពាល់ខ្លាំងជាងគេនៅក្នុងតំបន់អាម៉ាហ្សូនគឺ​តំបន់​ផានតាណាល់​ (Pantanal) ដែលជាតំបន់ដីសើមធំជាងគេបំផុតនៅលើពិភពលោក​ដោយភ្លេីងឆេះព្រៃបានកើនឡើង២២០%ក្នុងរយៈពេលដូចគ្នា។ 

ក្រុមសកម្មជនបរិស្ថានបានបន្ទោសចក្ខុវិស័យនៃការអភិវឌ្ឍសេដ្ឋកិច្ចនៅតំបន់អាម៉ាហ្សូនរបស់ប្រធានាធិបតីស្តាំនិយម លោក​ ហ្សែ​ បុលសូណារ៉ូ​ (Jair Bolsonaro) ថាបានជំរុញឲ្យមានការកេីនឡេីងនៃការកាប់បំផ្លាញព្រៃឈេី​ និងការរុករករ៉ែដែលបណ្ដាលឲ្យមានភ្លេីងឆេះព្រៃ។ 

ប៉ុន្តែលោក​ បុលសូណារ៉ូ​ បាននិយាយថារដ្ឋាភិបាលត្រូវការឲ្យមានការវិនិយោគលេីការរុករករ៉ែ​ និងកសិកម្មបន្ថែមទៀតនៅក្នុងតំបន់អាម៉ាហ្សូនដើម្បីជួយពលរដ្ឋឲ្យចេញផុតពីភាពក្រីក្រ។

គួរកត់សម្គាល់ថា​ បន្ទាប់ពីមានសម្ពាធជាសកល​ពីរដ្ឋាភិបាល​ និងវិនិយោគិនបរទេស​ លោក បុលសូណារ៉ូ បានដាក់ពង្រាយយោធាដើម្បីប្រយុទ្ធប្រឆាំងនឹងការកាប់បំផ្លាញព្រៃឈើ​ និងភ្លេីងឆេះព្រៃនៅក្នុងតំបន់ព្រៃអាម៉ាហ្សូន៕