ជប៉ុន៖គណបក្សកាន់អំណាចក្នុងប្រទេសជប៉ុនគ្រោងធ្វេីការបោះឆ្នោតនៅថ្ងៃច័ន្ទនេះ ដេីម្បីជ្រេីសរេីសមេដឹកនាំថ្មីឲ្យស្នងតំណែង  លោក  ស៊ីនហ្សូ  អាបេ  ដោយអ្នកឈ្នះនឹងមានលទ្ធភាពសឹងតែ១០០%ក្លាយជានាយករដ្ឋមន្ត្រីថ្មីរបស់ជប៉ុន។ 

កាលពីខែមុន  លោក  អាបេ  បានប្រកាសលាលែងពីតំណែងដោយសារហេតុផលសុខភាព។

អ្នកឈ្នះក្នុងការបោះឆ្នោតរបស់គណបក្សអំណាចត្រូវបានគេរំពឹងថាគឺ  លោក  យ៉ូស៊ីហ៊ីដេ  សូហ្គា  (Yoshihide Suga) អាយុ៧១ឆ្នាំដែលមានតួនាទីជារដ្ឋមន្ត្រីទីស្ដីការគណៈរដ្ឋមន្ត្រីនៅក្នុងរដ្ឋបាលបច្ចុប្បន្ន។

លោក  សូហ្គា  ត្រូវបានគេចាត់ទុកថាជាសម្ព័ន្ធមិត្តដ៏ជិតស្និទ្ធរបស់  លោក  អាបេ  ហើយទំនងជានឹងបន្តគោលនយោបាយរបស់  លោក  អាបេ។ 

នៅពេលដែលគណបក្សកាន់អំណាចក្នុងប្រទេសជប៉ុនបានជ្រើសរើសមេដឹកនាំថ្មីរបស់ខ្លួនរួចហេីយ  សភាជប៉ុននឹងរៀបចំការបោះឆ្នោតមួយនៅថ្ងៃពុធដេីម្បីជ្រេីសរេីសនាយករដ្ឋមន្ត្រី  ដែលនៅពេលនោះ  លោក  សូហ្គា  ប្រាកដជាអាចនឹងត្រូវបានតែងតាំងជានាយករដ្ឋមន្ត្រីដោយសារតែសម្លេងភាគច្រេីននៃគណបក្សកាន់អំណាចក្នុងសភា៕