ហុងកុង៖មេដឹកនាំក្រុងហុងកុងបាននិយាយនៅថ្ងៃអង្គារនេះថា​ ពលរដ្ឋហុងកុងចំនួន១២នាក់ដែលត្រូវបានចាប់ខ្លួនដោយអាជ្ញាធរចិនដីគោកពេលព្យាយាមភៀសខ្លួនចេញពីទីក្រុងហុងកុងតាមទូកនោះ​ «គួរតែទទួលយកការទទួលខុសត្រូវតាមច្បាប់»។

រដ្ឋាភិបាលទីក្រុងហុងកុងបានប្រកាសថា​ ខ្លួននឹងមិនធ្វើអន្តរាគមន៍ក្នុងករណីនេះទេ​ បេីទោះបីជាមានការអង្វរពីសាច់ញាតិរបស់អ្នកជាប់ឃុំឃាំងទាំងនោះដែលសុំឱ្យជួយក៏ដោយ​។

រដ្ឋាភិបាលទីក្រុងហុងកុងបាននិយាយថាករណីនេះជាបញ្ហារបស់ចិនដីគោក។

ពលរដ្ឋហុងកុុងទាំង១២នាក់ត្រូវបានចាប់ខ្លួននៅឯសមុទ្រកាលពីថ្ងៃទី២៣ ខែសីហាពីបទចូលទឹកដីចិនដោយខុសច្បាប់បន្ទាប់ពីចេញដំណេីរតាមទូកឆ្ពោះទៅកោះតៃវ៉ាន់ក្នុងគ្រាដែលក្រុមសកម្មជនគាំទ្រលទ្ធិប្រជាធិបតេយ្យភ័យខ្លាចពីការបង្ក្រាបរបស់ក្រុងប៉េកាំង។

យោងតាមរដ្ឋាភិបាលទីក្រុង​ហុងកុង​ មនុស្សទាំង១២នាក់នោះជាប់សង្ស័យថាបានប្រព្រឹត្តិបទឧក្រិដ្ឋនៅក្នុងទីក្រុងហុងកុងដោយក្នុងនោះ១១នាក់ត្រូវបានចោទប្រកាន់ពីបទបង្កេីតអគ្គិភ័យ និងផលិត​ ឬកាន់កាប់គ្រឿងផ្ទុះ។

ចំណែកម្នាក់ទៀតត្រូវបានសង្ស័យថាបានឃុបឃិតជាមួយកងកម្លាំងបរទេសដែលជាបទចោទនៅក្រោមច្បាប់សន្តិសុខជាតិដែលត្រូវបានដាក់ឲ្យអនុវត្តដោយទីក្រុងប៉េកាំងកាលពីខែមិថុនា​ ហេីយអាចឈានដល់ការជាប់ពន្ធនាគារអស់មួយជីវិត៕