អត្ថបទ៖ឃឹម វិសាល

ស្វាយរៀង៖ ឪពុកដែលវាយកូនស្រីនៅក្រុងបាវិត ត្រូវបានតុលាការខេត្ត សម្រេចផ្ដន្ទាទោសដាក់ពន្ធនាគាររយៈពេលបីឆ្នាំ ។

លោក ខាំ សុផារី ព្រះរាជអាជ្ញាអមសាលាដំបូងខេត្តស្វាយរៀង បានឱ្យដឹងថា ករណីនេះ តុលាការបានធ្វើនីតិវិធីបង្ហាញខ្លួនជនត្រូវចោទ ហើយកាត់ទោសប្រកាសសាលក្រមដាក់ពន្ធនាគារ រយៈពេលបីឆ្នាំតែម្ដង រួចហើយឃុំខ្លួនតាមអំណាចសាលក្រម មិនមែនតាមដីកានោះទេ។

លោក បានបញ្ជាក់បន្តទៀតថា តំណាងអយ្យការបានចោទប្រកាន់បុរសខាងលើពីបទហិង្សាដោយចេតនា តាមមាត្រា២១៩ នៃក្រមព្រហ្មទណ្ឌ។

សូមរំលឹកថា ក្មេងស្រីម្នាក់ត្រូវបានឪពុកបង្កើតប្រើប្រាស់អំពើហិង្សាវាយដំយ៉ាងដំណំ ហើយត្រូវគេថតវីដេអូ និងបានចែកចាយនៅតាមបណ្ដាញសង្គម។ ហេតុការណ៍នេះ បានកើតឡើងកាលពីថ្ងៃទី១៣ ខែកញ្ញា ឆ្នាំ២០២០កន្លងទៅ ស្ថិតក្នុងភូមិថ្មី សង្កាត់ច្រកម្ទេស ក្រុងបាវិត ខេត្តស្វាយរៀង។

យោងតាមការសួរនាំ ក្រោយសមត្ថកិច្ចចាប់ខ្លួន ជនសង្ស័យបានសារភាពថា មូលហេតុដែលនាំឱ្យខ្លួនប្រើអំពើហិង្សាលើកូនស្រីបែបនេះ ក៏ព្រោះតែខឹងណែនាំកូនមិនស្ដាប់ រឿងលេងទូរស័ព្ទនៅពេលយប់ពេក៕