លោកជំទាវ ភឿង សកុណា អំពាវនាវឲ្យប្រជាពលរដ្ឋ ហូបស្អាត និងរស់នៅស្អាត ដើម្បីឲ្យមានសុខភាពល្អ ក្រៅពីការជួយថែទាំ ដោយក្រុមគ្រូពេទ្យ
| ព័ត៌មានជាតិ
SHARE

  ស្វាយរៀង ៖ លោកជំទាវ ភឿង សកុណា ប្រធានក្រុមការងារថ្នាក់ជាតិ ចុះមូលដ្ឋាន ស្រុកស្វាយទាប ខេត្តស្វាយរៀង បានមានប្រសាសន៍ អំពាវនាវឲ្យប្រជាពលរដ្ឋទាំងអស់ ជាពិសេសប្រជាពលរដ្ឋ នៅរស់នៅតំបន់ដាច់ស្រយាល ត្រូវខិតខំសំអាតផ្ទះសម្បែង ហូបចុកឲ្យបានស្អាត ដើម្បីជួយឲ្យមានសុខភាពល្អ ក្រៅពីការជួយពិនិត្យ និងព្យាបាល របស់ក្រុមគ្រូពេទ្យ។

  ការលើក​ឡើងរបស់លោកជំទាវ បានធ្វើឡើង ​ក្នុងឱកាសដែលក្រុមគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ប្រមាណ៥០០នាក់ ចុះ​ពិនិត្យ ព្យាបាលជំងឺ និងផ្តល់ថ្នាំពេទ្យ ដោយឥតគិតថ្លៃ ជូនដល់ពលរដ្ឋជាង៨ពាន់ ៧០០នាក់ នៅសាលាបឋមសិក្សាគគីរសោម ភូមិសង្គម ឃុំគគីរសោម ស្រុកស្វាយទាប ខេត្តស្វាយរៀង។

  លោកជំទាវប្រធានក្រុមការងារថ្នាក់ជាតិ បានបន្ថែមថា ការពិនិត្យនិងព្យាបាល ដោយឥតគិតថ្លៃនេះ ជាគោលនយោបាយរបស់រាជរដ្ឋាភិបាល ដែលតែងតែយកចិត្តទុកដាក់ ជួយដល់សុខភាពប្រជាពលរដ្ឋ ឲ្យមានភាពល្អប្រសើរឡើង ព្រោះសុខភាព គឺជាមូលដ្ឋានគ្រឹះ ដើម្បីឆ្ពោះទៅរក ភាពជោគជ័យ សុភមង្គល ជូនគ្រួសារ និងសង្គមជាតិ។

  ក្នុងឱកាសនោះ ប្រជាពលរដ្ឋ នៅខេត្តស្វាយរៀង រីករាយជាខ្លាំង ដែលទទួលបានការយកចិត្តទុកដាក់ ពីក្រុមគ្រូពេទ្យស្ម័គ្រចិត្ត ហើយប្តេជ្ញាថា នឹងខិតខំថែរក្សាសុខភាពខ្លួនឯងបន្ថែមទៀត ដើម្បីឲ្យទទួលបានសុខភាពល្អ ជៀសឆ្ងាយពីជំងឺ ដែលរារាំងដល់ ការរីកចម្រើនរបស់ក្រុមគ្រួសារ និងសង្គមជាតិ។

  បើតាមប្រសាសន៍ ឯកឧត្តម លេង ផាលី ប្រធានក្រុមគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បានឲ្យដឹងថា គិតចាប់ពី​បង្កើតឡើង ក្នុងឆ្នាំ២០១២ ក្រុមការងារ​ បានពិនិត្យនិងព្យាបាល ជូនប្រជាពលរដ្ឋបាន ចំនួន១៩៤លើកមកហើយ​ ដោយប្រជាពលរដ្ឋ​ ជាង៤៦ម៉ឺននាក់ ​ក្នុង១៩រាជធានីខេត្ត ទទួលបានសេវាសប្បុរសធម៌នេះ។

  ឯកឧត្តមបញ្ជាក់ថា ការចុះពិនិត្យ និងព្យាបាលជំងឺ ជូនប្រជាពលរដ្ឋនេះ គឺកើតចេញពីស្មារតីមនុស្សធម៌​​ពោលគឺការព្យាបាល មិនប្រកាន់បក្សពួក សាសនា ឬនិន្នាការនយោបាយណាមួយឡើយ សំដៅចូលរួមកាត់បន្ថយភាពក្រីក្រ របស់ប្រជាពលរដ្ឋមួយចំណែក៕

អត្ថបទ ៖ សន ពិសិដ្ឋ រូបភាព ៖ លឹម មុនី 

Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation