សម្តេចតេជោ ជំរុញឲ្យមន្ត្រីគណបក្ស ខិតខំបំពេញការងារ បម្រើប្រជាពលរដ្ឋ ក្នុងស្មារតីទទួលខុសត្រូវខ្ពស់បំផុត ទោះមានឬគ្មានវត្តមាន អតីតគណបក្សប្រឆាំង
| ព័ត៌មានជាតិ
SHARE

ភ្នំពេញ ៖ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា នៅព្រឹកថ្ងៃទី២២ ខែសីហានេះ បានជំរុញឲ្យមន្ត្រីគណបក្សទាំងអស់ ​កុំមានមោទនភាពលើខ្លួនឯង ហើយត្រូវខិតខំបំពេញការងារ បម្រើប្រជាពលរដ្ឋ ក្នុងស្មារតីទទួលខុសត្រូវខ្ពស់បំផុត ជាពិសេស ​ការបំពេញសេវាសាធារណៈ ជូនប្រជាពលរដ្ឋ ឲ្យបានពេញលេញ ​បើទោះបីជាមាន ឬមិនមានវត្តមាន អតីតគណបក្សប្រឆាំងក៏ដោយ។

សម្តេចតេជោ បញ្ជាក់ថា ​មន្ត្រីគណបក្សទាំងអស់ ដែលមានតួនាទី ក្នុងជួររាជរដ្ឋាភិបាល និងអាជ្ញាធរ នៅតាមមូលដ្ឋាន ត្រូវខិតខំប្រឹងប្រែង ធ្វើយ៉ាងណា បំពេញការងារ ឲ្យត្រឹមត្រូវតាមការសន្យារបស់ខ្លួន នៅចំពោះមុខរបស់ប្រជាជន នៅអំឡុងពេល នៃការឃោសនាបោះឆ្នោត​។

នេះបើយោងតាមប្រសាសន៍ ឯកឧត្តម សុខ ឥសាន្ត អ្នកនាំពាក្យគណបក្សប្រជាជន បានប្រាប់អ្នកសារព័ត៌មានឲ្យដឹង នៅក្រោយបញ្ចប់ កិច្ច​ប្រជុំគណៈកម្មាធិការកណ្តាល គណបក្សប្រជាជនកម្ពុជា ដែលធ្វើឡើង​ ​នៅមជ្ឈមណ្ឌលសន្និបាត និងពិព័រណ៍កោះពេជ្រ។

បើតាមឯកឧត្តម សុខ ឥសាន្ត​ នៅក្នុងកិច្ចប្រជុំនេះ សម្តេចតេជោ បានលើកឡើង ពីបញ្ហាសំខាន់ចំនួន២ គឺទី១ពាក់ព័ន្ធនឹង សភាពការណ៍អន្តរជាតិ និងទី២គឺពាក់ព័ន្ធនឹងបញ្ហាផ្ទៃក្នុង របស់កម្ពុជា។ បញ្ហាផ្ទៃក្នុង សម្តេចបានឲ្យដឹងថា ក្រោយការបោះឆ្នោតរួចរាល់ គឺការបង្កើតរាជរដ្ឋាភិបាល នីតិកាលទី៦, រាជរដ្ឋាភិបាល មានការខិតខំប្រឹងប្រែង ជំរុញការងារអន្តរជាតិ និងការងារផ្ទៃក្នុង ដើម្បីអភិវឌ្ឍន៍ប្រទេស ស្របតាមក្របខ័ណ្ឌ នៃគោលនយោបាយរបស់គណបក្ស ប្រជាជនកម្ពុជា។

ពាក់ព័ន្ធនឹងលទ្ធផលការងារ របស់គណបក្ស ក្នុងឆមាសទី១ ឆ្នាំនេះ គឺមានលទ្ធផលគួរឲ្យគាប់ប្រសើរ ប៉ុន្តែពុំទាន់ស្រប ទៅតាមការចង់បាន របស់គណបក្សនៅឡើយនោះទេ។ ដូច្នេះទាមទារឲ្យមានការប្រជុំ ដើម្បីលើកទឹកចិត្តឲ្យមន្ត្រីរាជការរបស់បក្ស ធ្វើយ៉ាងណា ខិតខំបំពេញបន្តទៀត។

អ្នកនាំពាក្យគណបក្ស បានឲ្យដឹងដែរថា ចំណុចសំខាន់ ដែលគណបក្សប្រជាជនកម្ពុជា សម្រេចបានក្នុងឆមាសទី១ឆ្នាំនេះ ​គឺការថែរក្សាបាននូវសន្តិសុខ នយោបាយ និងការរីកចម្រើន នៅក្នុងសង្គមជាតិកម្ពុជា។ ប៉ុន្តែចំណុច ដែលប្រឈមនោះ គឺសេវាសាធារណៈ គឺមិនទាន់សម្រេចបានពេញលេញ។

សូមជម្រាបថា កិច្ចប្រជុំនេះ មានការចូលរួមពី សមាជិកគណៈកម្មាធិការកណ្តាលទាំងអស់ រួមទាំងតំណាងគណបក្ស មកពីក្រសួងស្ថាប័ន និងមូលដ្ឋានមួយចំនួនផងដែរ។ ​កិច្ចប្រជុំនេះ ធ្វើឡើងដើម្បីកំណត់ទិសដៅ គណៈកម្មាធិការសម្រាប់រយៈពេល៦ខែ និងដើម្បីត្រួតពិនិត្យវាយតម្លៃ លើអ្វីដែល គណបក្សបានអនុវត្ត រយៈពេល៦ខែកន្លងមក៕អត្ថបទ ៖ សន ពិសិដ្ឋ រូបភាព ៖ អេង សុគុណ, លឹម មុនី

Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation