អត្ថបទ:ឃឹម វិសាល

ភ្នំពេញ៖ បើតាមលោកវរសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានឲ្យដឹងថា បុរស ៣នាក់ពាក់ព័ន្ធក្នុងករណីប្រើប្រាស់រថយន្តពាក់ស្លាកលេខនគរបាល បំពាក់ស៉ីរ៉ែន ជិះទៅសាលារៀន ត្រូវបានស្នងការដ្ឋាននគរបាលរាជធានីភ្នំពេញ កោះហៅឲ្យចូលមកបំភ្លឺ។

លោក សាន សុខសីហា បានបញ្ជាក់ថា  មនុស្ស ៣នាក់ដែលពាក់ព័ន្ធក្នុងករណីនេះ  រួមមានឈ្មោះ តាន់ សម្បត្តិឧត្តម ជាសិស្សសាលាឯកជន  ដែលបានបើករថយន្តស្លាកលេខនគរបាលទៅសាលារៀន ព្រមជាមួយម្ចាស់រថយន្តត្រូវជាបងប្រុសឈ្មោះ  តាន់  វិទ្យាបុត្រ  ជាមន្ត្រីនគរបាលនៅបណ្ឌិតសភានគរបាលកម្ពុជា រួមជាមួយម្ចាស់ដើមរថយន្តឈ្មោះ  ភ័ណ្ឌ ជីវិន ជាមន្ត្រីនគរបាលនៅអគ្គនាយកដ្ឋានអន្តោប្រវេសន៍។ 

លោកបន្តថា បន្ទាប់ពីបានការរាយការណ៍ពីប្រជាពលរដ្ឋ  ក៏ដូចជាការចុះផ្សាយព័ត៌មាន នៅលើបណ្តាញសង្គមហ្វេសបុក ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានដាក់បទបញ្ជាដល់ក្រុមការងារព័ត៌មាន  និងប្រតិកម្មរហ័ស សហការជាមួយការិយាល័យចរាចរណ៍ផ្លូវគោក និងអធិការដ្ឋាននគរបាលខណ្ឌជ្រោយចង្វារ ដើម្បីស្រាវជ្រាវឲ្យបានដឹងច្បាស់អំពីព័ត៌មាន ដែលបានចុះផ្សាយនេះ។  ក្រោយពីចុះស្រាវជ្រាវដល់ទីតាំងសាលារៀនដោយផ្ទាល់ បានឲ្យដឹងថា ពិតជាមានសិស្សសាលាម្នាក់ឈ្មោះ តាន់ សម្បត្តិឧត្តម បានជិះរថយន្តស្លាកលេខនគរបាលបំពាក់ស៉ីរ៉ែនមកសាលារៀនពិតប្រាកដមែន។ 

រហូតមកដល់រសៀលថ្ងៃទី១៧  ខែកុម្ភ: ឆ្នាំ២០២១  សមត្ថកិច្ចជំនាញនៃការិយាល័យចរាចរណ៍ផ្លូវគោក បានរកឃើញរថយន្តនេះ  និងបាននាំយកទាំងរថយន្ត  និងអ្នកបើកបរដើម្បីសួរនាំនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ។  នៅរសៀលថ្ងៃទី១៨ ខែកុម្ភ: ឆ្នាំ២០២១  អ្នកពាក់ព័ន្ធទាំង ៣រូបនេះ ត្រូវបានសមត្ថកិច្ចនៃការិយាល័យចរាចរណ៍ផ្លូវគោកកោះហៅឲ្យចូលខ្លួនមកបំភ្លឺលើករណីប្រើប្រាស់រថយន្តស្លាក

លេខនគរបាលបំពាក់ស៉ីរ៉ែនជិះទៅសាលារៀន។

តាមចម្លើយរបស់យុវជន តាន់ សម្បត្តិឧត្តម បានទទួលស្គាល់កំហុស  និងបានសារភាពថា ពិតជាបានយករថយន្តបងប្រុសរបស់គាត់ ដែលពាក់ស្លាកលេខនគរបាលបំពាក់ស៉ីរ៉ែនជិះទៅសាលារៀនពិតប្រាកដមែន។ 

តាមការស្រាវជ្រាវ  និងបញ្ជាក់យ៉ាងច្បាស់ពីការិយាល័យភស្តុភា នៃស្នងការដ្ឋាននគរបាលរាជធានីភ្នំពេញ  រថយន្តដែលពាក់ស្លាកលេខ នគរបាល 2. 8763 មិនមាននៅក្នុងបញ្ជីសារពើភណ្ឌរបស់ស្នងការដ្ឋាននគរបាលរាជធានីភ្នំពេញឡើយ ជាក់ស្តែងរថយន្តនេះត្រូវបានម្ចាស់ដើមឈ្មោះ  ភ័ណ្ឌ ជីវ័ន ដែលជាអតីតមន្ត្រីនគរបាលនៃអធិការដ្ឋាននគរបាលខណ្ឌមានជ័យ  (បច្ចុប្បន្នជាមន្ត្រីនគរបាលនៅអគ្គនាយកដ្ឋានអន្តោប្រវេសន៍ ) បានស្នើសុំធ្វើស្លាកលេខនគរបាល យកមកបំពាក់លើរថយន្តឯកជនរបស់ខ្លួន តាំងពីឆ្នាំ២០១៦មកម្ល៉េះ  លុះក្រោយមកខែតុលា ឆ្នាំ២០២០ ឈ្មោះ ភណ្ឌ  ជីវ័ន បានលក់រថយន្តនេះទៅឲ្យមិត្តភក្តិរបស់ខ្លួនឈ្មោះ តាន់ វិទ្យាបុត្រ ដែលជាមន្ត្រីនគរបាលនៅបណ្ឌិតសភានគរបាលកម្ពុជា។

អ្នកពាក់ព័ន្ធទាំង៣រូបនេះ បានទទួលស្គាល់នូវកំហុសរបស់ខ្លួន  ជាពិសេសបានសុំទោសជាសាធារណ: ចំពោះប្រជាពលរដ្ឋទូទៅ  ជាពិសេសសមត្ថកិច្ចនគរបាលជាតិ  នូវកំហុសរបស់ខ្លួន ដែលបានអនុញ្ញាតឲ្យប្អូនប្រុសរបស់ខ្លួនប្រើប្រាស់រថយន្តពាក់ស្លាកលខនគរបាលបំពាក់ស៉ីរ៉ែនជិះទៅសាលារៀនដែលខុសពីច្បាប់បានកំណត់ ។

ក្រោយពីទទួលស្គាល់កំហុស ធ្វើកិច្ចសន្យា  និងសុំទោសជាសាធារណៈរួច  សមត្ថកិច្ចការិយាល័យចរាចរណ៍ នៃស្នងការដ្ឋាននគរបាលរាជធានីភ្នំពេញ បានប្រគល់រថយន្ត និងមនុស្សទាំង៣នាក់នេះ  ទៅនាយកដ្ឋាននគរបាលចរាចរណ៍  និងសណ្តាប់ធ្នាប់សាធារណ: ដើម្បីត្រួតពិនិត្យឲ្យបានច្បាស់អំពីស្លាកលេខ  ជាពិសេសនីតិវិធីផ្សេងៗពាក់ព័ន្ធនឹងការលក់ដូររថយន្តស្លាកលេខនគរបាល និងការប្រើប្រាស់រថយន្តពាក់ស្លាកលេខនគរបាល បំពាក់ស៉ីរ៉ែន  ជិះទៅសាលារៀនដោយជនស៉ីវិល ដែលមិនមែនជាសមត្ថកិច្ច។ 

ម្យ៉ាងវិញទៀតដោយរថយន្តនេះ មិនមែនជារថយន្តរបស់អង្គភាព នាយកដ្ឋានចរាចរណ៍ នឹងដោះស៉ីរ៉ែនចេញ  ហើយដោយការយករថយន្តនេះទៅប្រើប្រាស់ខុសគោលការណ៍  សមត្ថកិច្ចនឹងដកហូតស្លាកលេខនគរបាល មករក្សាទុកមិនអនុញ្ញាតឲ្យប្រើប្រាស់បន្តទៀតឡើយ ។ ចំណែកម្ចាស់ដើមរថយន្ត  និងម្ចាស់បច្ចុប្បន្ន  ដែលជាមន្ត្រីប៉ូលិសនោះ នាយកដ្ឋានចរាចរណ៍  និងការិយាល័យចរាចរណ៍ផ្លូវគោក  នឹងធ្វើរបាយការណ៍គោរព ជូនទៅប្រធានអង្គភាពរបស់គាត់ទាំងពីរ  ដើម្បីអនុវត្តបន្ត  និងដាក់វិន័យកងកម្លាំងចំពោះកំហុសនេះផងដែរ៕