ហាណូយ៖ រដ្ឋាភិបាលវៀតណាម បាននិយាយថា វៀតណាម និងកូរ៉េខាងត្បូងមានបំណងបង្កើនតម្លៃពាណិជ្ជកម្មទ្វេភាគីរវាងប្រទេសទាំងពីរឱ្យដល់ ១០០ពាន់លានដុល្លារនៅឆ្នាំក្រោយ និងដល់ ១៥០ពាន់លានដុល្លារនៅឆ្នាំ ២០៣០ ពោលគឺកើនឡើងពី ៧៨ពាន់លានដុល្លារកាលពីឆ្នាំមុន។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters។

យោងតាមសេចក្តីថ្លែងការណ៍របស់រដ្ឋាភិបាលបាននិយាយថា គោលដៅពាណិជ្ជកម្មត្រូវបានព្រមព្រៀងគ្នាក្នុងអំឡុងពេលសន្ទនាតាមទូរស័ព្ទរវាងនាយករដ្ឋមន្ត្រីកូរ៉េខាងត្បូងលោក Han Duck-soo និងសមភាគីវៀតណាមលោក ផាម មិញ ជិញ នាយករដ្ឋមន្ត្រីវៀតណាម កាលពីល្ងាចថ្ងៃអង្គារ។

កូរ៉េខាងត្បូងគឺជាដៃគូសេដ្ឋកិច្ចដ៏សំខាន់សម្រាប់វៀតណាម និងជាប្រភពធំបំផុតនៃការវិនិយោគផ្ទាល់ពីបរទេសរបស់វៀតណាម។ ក្រុមហ៊ុន Samsung Electronics គឺជាអ្នកវិនិយោគបរទេសដ៏ធំបំផុតតែមួយគត់នៅក្នុងប្រទេសអាស៊ីអាគ្នេយ៍មួយនេះ។

សេចក្តីថ្លែងការណ៍បាននិយាយថា ភាគីទាំងពីរក៏បានព្រមព្រៀងងគ្នាក្នុងការស្វែងរកវិធីកាត់បន្ថយគម្លាតក្នុងពាណិជ្ជកម្មទ្វេភាគី។

យោងតាមទិន្នន័យគយវៀតណាមបានឱ្យដឹងថា ប្រទេសវៀតណាម បានទទួលឱនភាពពាណិជ្ជកម្មចំនួន ៣៤ពាន់លានដុល្លារជាមួយកូរ៉េខាងត្បូងកាលពីឆ្នាំមុន។ ការនាំចូលសំខាន់របស់វៀតណាមពីកូរ៉េខាងត្បូងរួមមានគ្រឿងអេឡិចត្រូនិក គ្រឿងម៉ាស៊ីន លោហធាតុ ប្លាស្ទិក ក្រណាត់ និងឥន្ធនៈ។

សេចក្តីថ្លែងការណ៍ បាននិយាយថា ក្នុងអំឡុងការអំពាវនាវនេះ នាយករដ្ឋមន្ត្រីទាំងពីរ ក៏បានចែករំលែកទស្សនៈអំពីសារៈសំខាន់នៃការរក្សាសន្តិភាព និងស្ថិរភាព និងសុវត្ថិភាពដែនសមុទ្រ និងសេរីភាពនៅសមុទ្រចិនខាងត្បូងផងដែរ៕