ភ្នំពេញ៖ ក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក បានប្រកាសឱ្យដឹងថា ក្រុមហ៊ុន Toyota Tsusho Manufacturing (Cambodia) Co., Ltd. ដែលជាក្រុមហ៊ុនថ្មីមួយ ត្រូវបានបង្កើតឡើងដោយ ក្រុមហ៊ុន Toyota Tsusho Corporation មកពីប្រទេសជប៉ុន បានសម្រេចជ្រើសរើសយកតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ ជាទីតាំងនៃរោងចក្រ ផ្គុំនិងដំឡើងរថយន្តម៉ាក តូយ៉ូតា។

លោក UEMATSU Hiroshi នាយកប្រតិបត្តិនៃក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក បានថ្លែងថា “ក្នុងនាមជាអ្នកអភិវឌ្ឍតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ យើងខ្ញុំមានកិត្តិយស និងមោទនភាពជាខ្លាំង ដែលបានក្លាយជាផ្នែកមួយនៃដំណើរការចាប់ផ្តើម និងការអភិវឌ្ឍមួយនេះ។ គម្រោងមួយនេះ នឹងក្លាយជាការកត់ត្រាក្នុងប្រវត្តិសាស្រ្តរបស់ក្រុមហ៊ុនមួយ បន្ថែមលើសមាជិកអ្នកវិនិយោគចំនួន១០២ក្រុមហ៊ុនដែលមានស្រាប់ក្នុងតំបន់។”

ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់ និងឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កម្ពុជាមានសន្តិភាព ស្ថេរភាព និងការអភិវឌ្ឍន៍សេដ្ឋកិច្ចក្នុងរយៈពេល៣ទសវត្សរ៍ចុងក្រោយនេះ។ លើសពីនេះទៀត ច្បាប់វិនិយោគថ្មីដ៏មានភាពទាក់ទាញ ក៏ទើបត្រូវបានអនុម័ត និងប្រកាសឲ្យប្រើប្រាស់ជាផ្លូវការ នាខែតុលា ឆ្នាំ២០២១ កន្លងទៅនេះ។ យើងអាចនិយាយបានថា ដោយសារកិច្ចខិតខំប្រឹងប្រែងជាបន្តបន្ទាប់របស់រាជរដ្ឋាភិបាលកម្ពុជានេះហើយ ដែលធ្វើឲ្យមានការបង្កើតរោងចក្ររថយន្តតូយ៉ូតានេះឡើង។

អ្នកឧកញ៉ា គិត ម៉េង ប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក បានសម្តែងការស្វាគមន៍យ៉ាងកក់ក្តៅចំពោះក្រុមហ៊ុន Toyota Tsusho Corporation ហើយបានប្តេជ្ញាចិត្តយ៉ាងមុតមាំ ចំពោះការគាំទ្រដ៏ល្អបំផុតចំពោះគម្រោងនេះ។

យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះការជឿទុកចិត្ត ដែលក្រុមហ៊ុនតូយ៉ូតាមានមកលើយើងខ្ញុំ ហើយយើងនឹងតបស្នងនូវទំនុកចិត្តដ៏ថ្លៃថ្លានេះ ជាមួយនឹងការគាំទ្រ រួមទាំងបំពេញនិងផ្ដល់សេវាកម្មដ៏ស្មោះអស់ពីចិត្តបំផុតរបស់យើងត្រឡប់ទៅវិញ។ ភាពជោគជ័យនៃសកម្មភាពផលិតរបស់ក្រុមហ៊ុន តូយ៉ូតា នៅប្រទេសកម្ពុជា នឹងក្លាយជាសមិទ្ធិផលដ៏ធំបំផុតរបស់យើងខ្ញុំ៕