វៀតណាម៖ បុរសម្នាក់ រស់នៅទីក្រុងព្រៃនគរ (ហូជីមិញ) នៅថ្ងៃពុធ សប្តាហ៍នេះ ត្រូវបានតុលាការវៀតណាម កាត់ទោសឱ្យជាប់ពន្ធនាគាររយៈពេល ១៦ ឆ្នាំ ដោយចោទប្រកាន់ពីបទមនុស្សឃាត ក្រោមការសម្លាប់ចោរលួចសត្វសុនខ ។
តាមដំណើរសាច់រឿង កាលពីថ្ងៃទី៧ ខែកញ្ញា ឆ្នាំមុន លោក Lai Van Tho អាយុ ៦៦ឆ្នាំ ជាម្ចាស់ឆ្កែ សង្ស័យថា Vo Thanh Trung (ជនសង្ស័យ) និងក្រុមមិត្តភ័ក្តិរបស់ Vo Thanh Trung បានលួចឆ្កែរបស់លោក Van Tho ។ បន្ទាប់ពីនោះ ក្រុមជនសង្ស័យ ក៏ប្រឈមមុខវាយតប់គ្នាដោយប្រើ កាំបិត និងថូផ្កា ជាមួយនឹងម្ចាស់ឆ្កែ និងកូនប្រុស ២នាក់ របស់ម្ចាស់ឆ្កែ មានដំបងឬស្សីដើម្បីវាយបកទៅវិញ ។
ក្រោយមក ក្រុមក្មេងទំនើងរបស់ជនសង្ស័យលួចសត្វឆ្កែ លោក Thanh Trung បានរត់គេចខ្លួន ខណៈលោក Trung បានលោតចូលទៅក្នុងប្រឡាយទឹក ស្ថិតក្នុងខណ្ឌ Binh Chanh ។ អំឡុងហែលទឹកទៅត្រើយម្ខាង Trung បានឃើញមនុស្សជាច្រើននៅចាំរួចជាស្រេច គេក៏សម្រេចចិត្តបកមកវិញ ។ ជាមួយគ្នានេះម្ចាស់ឆ្កែ លោក Van Tho ក៏បានឈរចាំនៅមាត់ច្រាំង នឹងវាយក្បាលអ្នកលួចឆ្កែនឹងដំបងឬស្សីជាច្រើនដងដោយមិនឱ្យងើបពីទឹកបាន ។ ចុងក្រោយ ជនសង្ស័យក៏បានលង់ទឹកស្លាប់នៅក្នុងប្រឡាយទឹកនោះតែម្តង ។
នៅក្នុងតុលាការប្រជាជនទីក្រុងព្រៃនគរ ឬ (ហូជីមិញ) ម្ចាស់សត្វឆ្កែ លោក Van Tho បានសារភាពថា គាត់ពិតជាបានវាយជនសង្ស័យឈ្មោះ Trung ពិតមែន ប៉ុន្តែមិនមានចេតនាចង់សម្លាប់ជនសង្ស័យនោះទេ ។
ជនជាតិវៀតណាមបរិភោគសាច់ឆ្កែប្រមាណជា៥លានក្បាលក្នុងមួយឆ្នាំ ជាប់លេខពីរ បន្ទាប់ពីប្រទេសចិន ដែលបរិភោគសាច់ឆ្កែរហូតដល់ ២០លានក្បាល ។ គួររំលឹកដែរថា ការលួចឆ្កែ កម្រត្រូវបានគេចាត់ទុកថាជាបទល្មើសឧក្រិដ្ឋណាស់ នៅក្នុងប្រទេសវៀតណាម លុះត្រាតែសត្វឆ្កែដែលលួចនោះ មានតម្លៃលើសពី ២ លានដុងវៀតណាម (៨៦ ដុល្លារអាម៉េរិក) ៕
ប្រែសម្រួល៖ ឡេង លាងហេង
ប្រភព៖ VN Express