លោកស្រី ម៉ែន សំអន ប្រាប់ប្រជាពលរដ្ឋ ឱ្យរួមគ្នាថែរក្សា និងអភិរក្សប្រពៃណីពីដូនតា ដើម្បីចូលរួមលើកស្ទួយមរតកប្រពៃណីជាតិ
កំពង់ឆ្នាំង៖ លោកស្រី ម៉ែន សំអន ឧបនាយករដ្ឋមន្រ្តី រដ្ឋមន្រ្ដីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានប្រាប់ប្រជាពលរដ្ឋឱ្យរួមគ្នាថែរក្សា និងអភិរក្សនូវប្រពៃណីពីដូនតា ដើម្បីចូលរួមលើកស្ទួយមរតក ប្រពៃណីជាតិ តាមរយៈបុណ្យរដូវរំហើយ។ ការអំពាវនាវដូចនេះ ក្នុងពិធីបើកព្រឹត្តិការណ៍ បុណ្យរដូវរំហើយ តាមរយៈការប្រឡងដាល់អំបុក និងបង្ហើរខ្លែង ដើម្បីជ្រោមជ្រែងប្រពៃណីខ្មែរ នៅខេត្ដកំពង់ឆ្នាំង នៅថ្ងៃទី១៧ ខែធ្នូ ឆ្នាំ២០២២។
សូមបញ្ជក់ថា បុណ្យរដូវរំហើយ ដែលមានកម្មវិធីប្រកួតប្រជែងដាល់អំបុក និងបង្ហើរខ្លែងនេះ បានប្រារព្ធធ្វើឡើងនៅថ្ងៃទី១៧ និង១៨ ខែធ្នូ ឆ្នាំ២០២២ នៅក្នុងភូមិដំណាក់កកោះ ឃុំពោធិ៍ ស្រុកកំពង់លែង ខេត្តកំពង់ឆ្នាំង រៀបចំដោយមូលនិធិ អ៉ឹងហ្វោនដេសិន (ING FOUNDATION) ដឹកនាំដោយ លោកឧកញ៉ា អ៉ឹ ប៊ុនហ៊ូវ និង មានបេក្ខជន បេក្ខនារី មកពីតាមបណ្តាក្រុង ស្រុកក្នុងខេត្តកំពង់ឆ្នាំងចូលរួមយ៉ាងច្រើនផងដែរ៕
ដោយ៖ ហឹង ចូច
