អត្ថបទ៖​ ហឹង​ ចូច
កំពង់ឆ្នាំង៖ ត្រីចិញ្ចឹមតាមបែរចំនួនរាប់រយតោននៅក្នុងខេត្តកំពង់ឆ្នាំង បានងាប់ជាបន្តបន្ទាប់ ចាប់ពីថ្ងៃទី១ រហូតមកដល់ថ្ងៃទី៥ ខែមេសា ឆ្នាំ២០២៣នេះ។

លោក លី​ ឡា នាយខ័ណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង បានឲ្យដឹងថា ត្រីចិញ្ចឹមនៅក្នុងបែរ ជាច្រើនប្រភេទដូចជា ត្រីខ្យា ត្រីឆ្តោ ត្រីសណ្តាយ ត្រីឆ្ពិន និងត្រីព្រលូង បានងាប់ជាបន្តបន្ទាប់ ចាប់ពីថ្ងៃទី១ រហូតមកដល់នឹងថ្ងៃទី៥ ខែមេសា ឆ្នាំ២០២៣នេះ មានចំនួន១៦០បែរក្នុងនោះ ត្រីខ្សាងាប់ចំនួន៩០បែរស្មើនឹង២៧០តោន ត្រីឆ្តោងាប់ចំនួន២៥បែរស្មើនឹង២៥តោន ត្រីចម្រុះមានត្រីឆ្ពិន ព្រលូង សណ្តាយ និងត្រីប្រាងាប់ចំនួន៤៥បែរស្មើនឹង​៦៧តោន។

លោក លី ឡា បានបញ្ជាក់ឲ្យដឹងថា ចំពោះមូលហេតុដែលបណ្តាលឲ្យត្រីងាប់ជាច្រើនតោននេះ គឺដោយសារអាកាសធាតុក្តៅខ្លាំង និងមានភ្លៀងធ្លាក់មួយមេ បង្ករឲ្យទឹកទន្លេមានក្លិនស្អុយ ដែលជាហេតុបណ្តាលឲ្យត្រីពុល ហើយងាប់ជាបន្តបន្ទាប់៕