ភ្នំពេញ៖ ពហុកីឡដ្ឋានជាតិអូឡាំពិក នឹងបើកទ្វារមុនគេ ដើម្បីទទួលការប្រកួត បើកឆាកលើប្រភេទកីឡា បាល់ទាត់ បុរស អាយុក្រោម ២២ឆ្នាំ នៅថ្ងៃទី២៩ ខែមេសា ​ឆ្នាំ២០២៣។

សូមបញ្ជាក់ថា ក្រុមបាល់ទាត់ជម្រើសជាតិយុវជន អាយុក្រោម ២២ឆ្នាំ ឥណ្ឌូណេស៊ី ត្រូវប៉ះហ្វីលីពីន ជាគូបើកឆាកប្រភេទកីឡាបាល់ទាត់ផ្នែកបុរស ក្នុងព្រឹត្តិការណ៍កីឡា ប្រចាំតំបន់អាស៊ីអាគ្នេយ៍ ​ឆ្នាំ២០២៣ នៅកម្ពុជា។ នេះជាការប្រកួតសន្សំពិន្ទុ មុនគេ ចេញពីពូល A ក្នុងចំណោម ៥ ក្រុម រួមមាន ឥណ្ឌូណេស៊ី ហ្វីលីពីន ទីម័រខាងកើត មីយ៉ាន់ម៉ា និងម្ចាស់ផ្ទះកម្ពុជា។ ចំណែក​នៅម៉ោង ៤ រសៀល ថ្ងៃទី២៩ ខែមេសា ឆ្នាំ២០២៣ នោះ U22 របស់ម្ចាស់ផ្ទះកម្ពុជា ក៏ត្រូវប៉ះ U22 ទីម័រខាងកើត នៅម៉ោង ៧ យប់ថ្ងៃដដែល ក្នុងពហុកីឡដ្ឋានជាតិអូឡាំពិក តែមួយគត់ គ្រាដែលសំបុត្រចូល ទស្សនាពុំមានគិតថ្លៃឡើយ។

អគ្គលេខាធិការ សហព័ន្ធកីឡាបាល់ទាត់កម្ពុជា លោក កែវ សារ៉េត បានថ្លែងប្រាប់សារព័ត៌មានថា ទីលានបាល់ទាត់ នៅពហុកីឡដ្ឋានជាតិអូឡាំពិក មានកៅអី ប្រមាណ ២៩.០០០ កន្លែង ក្នុងនោះ នៅទីតាំងចំហមាន ២៤.០០០ កន្លែង និងទីតាំងម្លប់ មានតែ ៥.០០០ កន្លែងប៉ុណ្ណោះ៕

អត្ថបទ៖ វឿន សាវុធ

​