អត្ថបទ៖ មិន ភក្តី
ព្រៃវែង៖ អភិបាលខេត្តព្រៃវែង ណែនាំដល់អាជ្ញាធរមូលដ្ឋានមន្ទីរកសិកម្ម និងមន្ត្រីជំនាញពាក់ព័ន្ធ ត្រូវបន្តចុះត្រួតពិនិត្យ និងតាមដានជាប្រចាំ ចំពោះបញ្ហាសត្វល្អិត រុយស និងដង្កូវមូលដើម និងសូមឲ្យប្រជាកសិករត្រូវរាយការណ៍ជាបន្ទាន់មកអាជ្ញាធរមូលដ្ឋាន នៅពេលដែលបានឃើញប្រភេទសត្វល្អិតនេះ នៅក្នុងភូមិសាស្ត្ររបស់ខ្លួន។

ការណ៍នេះធ្វើឡើងកាលពីរសៀលថ្ងៃទី៩ ខែកក្កដា ឆ្នាំ២០២៤ ក្នុងឱកាស លោក សួន សុម៉ាលីន អភិបាលនៃគណៈអភិបាលខេត្ត រួមជាមួយ លោកអភិបាលរងខេត្ត តំណងក្រសួងកសិកម្ម រុក្ខាប្រមាញ់ និងនេសាទ លោកស្នងការនរគបាលខេត្ត ប្រធានមន្ទីរពាក់ព័ន្ធ អភិបាលស្រុក និងមន្រ្តីជំនាញពាក់ព័ន្ធ បានអញ្ជើញចុះជួបជាមួយបងប្អូនប្រជាកសិករដែលបានរងផលប៉ះពាល់ដោយសារសត្វល្អិត រុយស និងដង្កូវមូលដើម បំផ្លាញផលដំណាំស្រូវ ដែលស្ថិតនៅតាមបណ្ដាស្រុក ចំនួន៤ រួមមាន​​ ភូមិអង្គរទ្រេត ឃុំអង្គរទ្រេត ស្រុកស្វាយអន្ទរ ខេត្តព្រៃវែង, ឃុំស្វាយជ្រុំ,ឃុំជីផុច ស្រុកមេសាង ខេត្តព្រៃវែង, ឃុំគោខ្ចក,ឃុំប្រាសាទ,ឃុំកំពង់ត្របែក ស្រុកកំពង់ត្របែក ខេត្តព្រៃវែង
និង ភូមិចាក់ខ្លាញ់ ឃុំពាមរក៍ ស្រុកពាមរក៍ ខេត្តព្រៃវែង។

​ក្នុងនោះបើយោងតាមរបាយការណ៍ របស់មន្ទីរកសិកម្ម រក្ខាប្រមាញ់ និងនេសាទខេត្តព្រៃវែង បានឲ្យដឹងថា គិតត្រឹមថ្ងៃទី០៩ ខែកក្កដា ឆ្នាំ២០២៤នេះ លើការងារបង្កបង្កើនផលស្រូវរដូវវស្សា អនុវត្តបានលើផ្ទៃដីសរុប ចំនួន២៤៣.៣១១ហិកតា ស្មើនឹង៩៧,៣៣% នៃផែនការ២៥០.០០០ហិកតា នៅក្នុងរយៈពេលកន្លងមកដល់ បច្ចុប្បន្ននេះ មានការផ្ទុះឡើងនូវពពួកសត្វល្អិតរុយស និងដង្កូវមូរស្លឹកបានស៊ីបំផ្លាញដំណាំស្រូវរបស់កសិករ នៅក្រុង/ស្រុកចំនួន១១ ឃុំ/សង្កាត់ រុយ ស និងដង្កូវមូលស្លឹក បានស៊ីបំផ្លាញលើផ្ទៃដី សរុបចំនួន៣៧.៥៦៣ហិកតា ស្មើនឹង១៥,៤៤% ក្នុងនោះខូចសរុប៣.២០៩ហិកតា ស្មើនឹង១,៣២% នៃផ្ទៃដី ដំណាំស្រូវបានដាំដុះសរុប។

ជាមួយគ្នានោះ លោកអភិបាលខេត្ត បានថ្លែងថា ដោយមានការយកចិត្តទុកដាក់ពីថ្នាក់ដឹកនាំ ក្រសួងកសិកម្ម រុក្ខាប្រមាញ់ និងនេសាទ រួមជាមួយថ្នាក់ដឹកនាំខេត្ត អង្គភាពជំនាញនៃអគ្គនាយកដ្ឋានកសិកម្ម មន្ទីរកសិកម្ម រុក្ខាប្រមាញ់ និងនេសាទខេត្ត និងអាជ្ញាធរមូលដ្ឋានគ្រប់កំដាប់ថ្នាក់ រួមជាមួយអ្នកពាក់ព័ន្ធនានា បានចុះជួយអន្តរាគមន៍ ដោយបានធ្វើការណែនាំអំពីវិធានការនានាក្នុងការទប់ស្កាត់ និងកម្ចាត់សត្វល្អិតរុយស /ជង្កូវមូលស្លឹកដល់កសិករ និងបានអន្តរាគមន៍បាញ់ថ្នាំទៅលើស្រែកសិករ ព្រមទាំងអនុវត្តម្ចាស់ការដោយកសិករ ម្ចាស់ស្រែផ្ទាល់លើផ្ទៃដីសរុបចំនួន១៦.៦៥៥ហិកតា ស្មើនឹង៤៤,៣៤%នៃផ្ទៃដីប៉ះពាល់សរុប នៅតាមបណ្តា ក្រុង/ស្រុកក្នុងខេត្តព្រៃវែង។

នៅចំពោះមុខនេះ ក្រសួងកសិកម្ម រុក្ខាប្រមាញ់ និងនេសាទ រដ្ឋបាលខេត្តព្រៃវែង អង្គភាពជំនាញ នៃអគ្គនាយកដ្ឋានកសិកម្ម មន្ទីរកសិកម្ម រុក្ខាប្រមាញ់ និងនេសាទខេត្ត រដ្ឋបាលក្រុង/ស្រុក ឃុំ/សង្កាត់ និងអ្នកពាក់ព័ន្ធទាំងអស់ នឹងបន្តតាមដាននូវការបំផ្លាញ និងចុះធ្វើអន្តរាគមន៍វិធានការនានាក្នុងការកម្ចាស់ សត្វល្អិតរុយស និងដង្កូវមូរស្លឹកទៅដល់កសិករជាបន្តទៀត។

ក្នុងនោះលោក អ៊ុក សំណាង ប្រជាមន្ទីរ កសិកម្ម រុក្ខាប្រមាញ់ និងនេសាល ខេត្តព្រៃវែង ក៏បានលើកឡើងអំពីបញ្ហាប្រឈម និងវិធីសាស្ត្របច្ចេកទេសនៃការបាញ់ថ្នាំសម្រាប់ សត្វល្អិតដែលស៊ីបំផ្លាញដំណាំរបស់ប្រជាពលរដ្ឋ មានដូចជា រុយ ស និងដង្កូវមូលស្លឹករបស់ជូនប្រជាកសិករផងដែរ៕