ភ្នំពេញ៖​ លោកទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.)​ បានជួបពិភាក្សាការងារជាមួយនឹងលោកស្រី Roueida El Hage តំណាងប្រចាំប្រទេស នៃការិយាល័យឧត្តមស្នងការទទួលបន្ទុកសិទ្ធិមនុស្សអង្គការសហប្រជាជាតិប្រចាំកម្ពុជា (OHCHR)​ នៅថ្ងៃទី៤ ខែកញ្ញា ឆ្នាំ២០២៤។ កិច្ចប្រជុំនេះ បានផ្តោតលើលិខិតស្រាយបំភ្លឺ របស់ គ.ស.ម.ក. ដែលធ្វើការបដិសេដចំពោះសេចក្តីថ្លែងការណ៍របស់អង្គការ ASEAN Paliamentarians for Human Rights (APHR) និងការពង្រឹងកិច្ចសហប្រតិបត្តិការលើវិស័យសិទ្ធិមនុស្សរវាងអង្គភាពទាំង២ នាពេលបច្ចុប្បន្ន និងអនាគត។

ក្នុងឱកាសនោះ​ លោកទេសរដ្ឋមន្ត្រី កែវ រ៉េមី បានប្រាប់លោកស្រី Roueida El Hage និងសហការីថា វិធានការរបស់រាជរដ្ឋាភិបាល ក្នុងការចាប់ខ្លួនបុគ្គលមួយចំនួន ដែលជាមេក្លោងក្នុងការប្រឆាំងនឹងកិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម (CLV-DTA) គឺមកពីអាជ្ញាធរបានរកឃើញភស្តុតាងជាក់លាក់ ដូចជា កាំភ្លើងកែច្នៃ ដ្រូនភ្ជាប់ដោយគ្រាប់ផ្ទុះ និងអាវុធគ្រោះថ្នាក់ ដទៃជាច្រើនទៀត។ ការណ៍នេះ អាជ្ញាធរគ្មានជម្រើសអ្វីក្រៅពីការចាប់ខ្លួន ដើម្បីរក្សាសន្តិសុខជាតិ សណ្តាប់ធ្នាប់សាធារណៈ និងស្ថិរភាពនៅក្នុងសង្គមកម្ពុជា និងបន្តនីតិវិធីស្របតាមច្បាប់កម្ពុជា។

ម្យ៉ាងវិញទៀត អាជ្ញាធរក៏បានចាត់វិធានការរដ្ឋបាលផ្សេងៗ លើបុគ្គលចំនួន​ ១៨៨នាក់ ដូចជា​ ការពន្យល់ណែនាំ ការផ្តល់ ព័ត៌មានពិត និងទុកចិត្តបាន ហើយឱ្យបុគ្គលទាំងនេះត្រឡប់ទៅផ្ទះវិញ។ បន្ថែមពីនេះ លោកទេសរដ្ឋមន្ត្រី ក៏បានលើកឡើងពីមាត្រា២៩ (២) នៃសេចក្តីប្រកាសជាសកលស្តីពីសិទ្ធិមនុស្ស (UDHR) ព្រមទាំង មាត្រា១៩ និងមាត្រា២១ នៃកតិកាសញ្ញាអន្តរជាតិស្តីពី​ សិទ្ធិពលរដ្ឋ និងសិទ្ធិនយោបាយ (ICCPR) ដែលបង្ហាញថា សិទ្ធិទាំងនេះ គឺមិនមែនជាសិទ្ធិដាច់ខាតនោះទេ ដោយមានការលើកលែង ដើម្បីរក្សាការពារសន្តិសុខជាតិ​ ឬសណ្តាប់ធ្នាប់សាធារណៈ។

ក្នុងកិច្ចជំនួបនេះ លោកស្រី Roueida El Hage បានគូសបញ្ជាក់ពីជំហរក្នុងការផ្តល់ការគាំទ្ររបស់ OHCHR ដើម្បីជួយរាជរដ្ឋាភិបាល ក្នុងការអនុវត្តការប្តេជ្ញាចិត្តរបស់ប្រទេសកម្ពុជា ស្តីពី “ការពង្រឹងការគាំពារសង្គម”។ ម្យ៉ាងវិញទៀត លោកស្រីក៏បានសាកសួរពីបច្ចុប្បន្នភាពរបស់សេចក្តីព្រាងច្បាប់ស្តីពី​ ស្ថាប័នជាតិសិទ្ធិមនុស្ស និងលើកឡើងពីគម្រោងសំណើរបស់អគ្គលេខាធិការអង្គការសហប្រជាជាតិក្នុងការដំឡើងចំនួនឆ្នាំអាណត្តិរបស់ OHCHR ប្រចាំកម្ពុជា ពី២ឆ្នាំ ទៅ៥ឆ្នាំ។ ទន្ទឹមនេះ លោកស្រីបានថ្លែងអំណរគុណចំពោះកិច្ចសហប្រតិបត្តិការរវាង គ.ស.ម.ក. និង OHCHR ក្នុងការៀបចំសិក្ខាសាលាបានយ៉ាងល្អប្រសើរនាពេលកន្លងទៅនេះ។

លោកទេសរដ្ឋមន្ត្រី បានគូសបញ្ជាក់ថា គ.ស.ម.ក. បានបញ្ជូនសេចក្តីព្រាងច្បាប់ស្តីពី​ ស្ថាប័នជាតិ សិទ្ធិមនុស្ស ទៅទីស្តីការគណៈរដ្ឋមន្ត្រីរួចរាល់ហើយ និងបានប្រជុំជាមួយក្រុមប្រឹក្សាអ្នកច្បាប់លើទម្រង់ នៃសេចក្តីព្រាងច្បាប់នេះ។

ចំពោះការប្តេជ្ញាចិត្តរបស់ប្រទេសកម្ពុជា លើ “ការពង្រឹងការគាំពារសង្គម” រាជរដ្ឋាភិបាល​ បាន​និងកំពុងអនុវត្តកម្មវិធីគោលនយោបាយអាទិភាពទាំង៦ ក្នុងយុទ្ធសាស្ត្របញ្ចកោណ ដំណាក់កាលទី១ ដើម្បីពង្រឹងការគាំពារសង្គមនេះ។ បន្ថែមពីនេះ លោកទេសរដ្ឋមន្ត្រី​ បានលើកឡើងពី គម្រោងរត់ម៉ារ៉ាតុង ដែលនឹងប្រព្រឹត្តទៅនៅថ្ងៃទី៨ ខែធ្នូ ឆ្នាំ២០២៤ នៅខេត្តបាត់ដំបង ដើម្បីអបអរសាទរ ទិវាសិទ្ធិមនុស្សអន្តរជាតិ១០ធ្នូ និងបានអញ្ជើញ OHCHR ចូលរួមផងដែរ៕