ភ្នំពេញ៖ តុលាការខេត្តសៀមរាប បានកោះហៅ​ លោក ស៊ាន បូរ៉ាត់ រដ្ឋលេខាធិការក្រសួង អប់រំ យុវជន និងកីឡា​ ឲ្យចូលឆ្លើយបំភ្លឺនៅព្រឹកថ្ងៃទី១៨ ខែធ្នូ ឆ្នាំ២០២៤ ពាក់ព័ន្ធសំណុំរឿងក្រុមហ៊ុនអតីតឧកញ៉ា ឡេង ចាន់ណា​ ដែលធ្វើឡើងតាមសំណើរបស់មេធាវីរាជរដ្ឋាភិបាល ដែលកំពុងទទួលជួយការពារក្តីជូនប្រជាពលរដ្ឋរងគ្រោះ​ ខណៈលោក ស ថាវី អនុរដ្ឋលេខាធិការក្រសួងការពារជាតិ​ និងអតីតអភិបាលខេត្តឧត្តរមានជ័យ​ ក៏ត្រូវបានតុលាការខេត្តសៀមរាប កោះហៅឲ្យចូលខ្លួនឆ្លើយបំភ្លឺនៅពេលព្រឹកថ្ងៃទី១១ ខែធ្នូ ឆ្នាំ២០២៤។

សូមបញ្ជាក់ថា​ ឧកញ៉ា ឡេង ចាន់ណា ប្រធានក្រុមហ៊ុន «ប្រ៊ីនលាន ស៉ីធីវើល» ត្រូវបានកម្លាំងនគរបាលខេត្តសៀម រាបចាប់ខ្លួន​ នៅរសៀលថ្ងៃទី១២ ខែមីនា ឆ្នាំ២០២៤​ តាមពាក្យបណ្តឹងរបស់ប្រជាពលរដ្ឋ​ ពាក់ព័ន្ធនឹងងបទល្មើសឆបោក រំលោភលើទំនុកទុកចិត្ត និងចេញមូលប្បទានបត្រ គ្មានសាច់ប្រាក់​ ក្នុងរូបភាពទិញដី ផ្ទះ និងការវិនិយោគដោយបានការប្រាក់ខ្ពស់​ ដោយអ្នកខ្លះបានការប្រាក់ស៊ីតែប៉ុន្មានខែ ក៏លែងបានរហូត។

ប្រជាពលរដ្ឋខ្ទង់ពាន់នាក់ បានចាញ់បោកឧកញ៉ា ឡេង ចាន់ណា ដោយខ្លះខ្ចីលុយពីធនាគារ ដើម្បីមកវិនិយោគជាមួយនឹងក្រុមហ៊ុនខាងលើ ហេីយពួកគាត់ត្រូវសងធនាគារវិញយ៉ាងលំបាកលំបិនបំផុត ក៏ព្រោះតែចាញ់ការលួងលោម ឆាបោករបស់ឧកញ៉ាខាងលើ រួមទាំងបក្ខពួក។

ក្រោយការចាប់ខ្លួនអតីតឧកញ៉ា ឡេង ចាន់ណា​ ជាច្រេីនខែមកនេះ​ មេធាវីតំណាងជនរងគ្រោះគឺ​ លោក គី តិច ទេសរដ្ឋមន្ដ្រីទទួលបន្ទុកបេសកកម្មពិសេស និងជាប្រធានក្រុមមេធាវីរាជរដ្ឋាភិបាល​ បានចាត់តាំងមេធាវីរាជរដ្ឋាភិបាលមួយក្រុម ចុះជួបផ្ទាល់ជាមួយពលរដ្ឋរងគ្រោះ​ ដែលជាការយកចិត្តទុកដាក់ពីសុខទុក្ខប្រជាពលរដ្ឋ​ ដោយបានប្រមូលភស្តុតាងចំនួន​ ១៤លើក​ រួចមកហើយ ដែលជំនួបចុងក្រោយធ្វើឡើងនៅលើទឹកដី ខេត្តសៀមរាប៕