រួមគ្នាថែរក្សាមរតកដូនតា! មហាព្រឹត្តិការណ៍វប្បធម៌ប្រចាំឆ្នាំ «បុណ្យរំឭកគុណអង្គរ» នឹងប្រារព្ធធ្វើលើកទី៤ នៅថ្ងៃទី១៤ ដល់ ១៦ ខែធ្នូ
ភ្នំពេញ៖ មហាព្រឹត្តិការណ៍វប្បធម៌ប្រចាំឆ្នាំ «បុណ្យរំឭកគុណអង្គរ» លើកទី៤ នឹងចាប់ផ្ដើមប្រារព្ធធ្វើឡើងនៅរយៈពេល៣ថ្ងៃនៅពាក់កណ្ដាលខែធ្នូខាងមុខនេះ។ នេះបើយោងតាមក្រសួងវប្បធម៌ និងវិចិត្រសិល្បៈ។
ក្រសួងវប្បធម៌ បានឲ្យដឹងថា បុណ្យរំឭកគុណអង្គរ ធ្វើឡើងដើម្បីរំឭកគុណដល់បុព្វការីជន គុណូបការៈដ៏ឧត្តុង្គឧត្តមរបស់បុព្វបុរសខ្មែរគ្រប់ជំនាន់។ ពិធីបុណ្យមួយនេះ គឺជាការចូលរួមលើកកម្ពស់កិត្យានុភាពវប្បធម៌ ប្រពៃណី និងទំនៀមទម្លាប់ដ៏ផូរផង់របស់ប្រជាជនខ្មែរដែរ។
ក្រសួងក៏បានបញ្ជាក់ថា ព្រឹត្តិការណ៍នេះមានរយៈពេល ២ ថ្ងៃប៉ុណ្ណោះដែលចាប់ផ្តើមធ្វើឡើងពីថ្ងៃទី១៤ ដល់ថ្ងៃទី១៦ ខែធ្នូ ឆ្នាំ២០២៤ ដែលក្នុងនោះមានកម្មវិធីសាសនា ការដង្ហែព្រះពុទ្ធរូបពីប្រាសាទអង្គរវត្តទៅកាន់ប្រាសាទបាយ័ន និងមានការសម្តែងសិល្បៈ ព្រមទាំងទស្សនីយភាពជាច្រើនទៀត។
យោងតាមរយៈសារាចរណែនាំរបស់រាជរដ្ឋាភិបាលកម្ពុជា បានយល់ព្រមជាគោលការណ៍ឲ្យរៀបចំពិធីបុណ្យរំឭកគុណអង្គរនៅរមណីយដ្ឋានអង្គរបេតិកភណ្ឌពិភពលោករយៈពេល៣ថ្ងៃចាប់ពីថ្ងៃទី១៤-១៦ ខែធ្នូ ជារៀងរាល់ឆ្នាំគិតចាប់ពីឆ្នាំ២០២២តទៅ។
សូមជម្រាបជូនដែរថា ពិធីបុណ្យរំឭកគុណអង្គរឆ្នាំ២០២៣ កន្លងទៅ បានប្រារព្ធរយៈពេល១០ថ្ងៃចាប់ផ្តើមពីថ្ងៃទី៧ រហូតដល់ថ្ងៃទី១៦ ខែធ្នូ។ ខណៈពិធីបើកព្រឹត្តិការណ៍ជាផ្លូវការបានប្រព្រឹត្តទៅនៅថ្ងៃទី៧ ខែធ្នូក្រោមអធិបតីភាពដ៏ខ្ពង់ខ្ពស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និងលោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួង វប្បធម៌និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា ព្រមទាំងវត្តមានថ្នាក់ ដឹកនាំសំខាន់ៗជាច្រើនរូបទៀត៕
អត្ថបទ៖ CNC
