ភ្នំពេញ៖​ ព្រឹត្តិការណ៍បាល់ទាត់មិត្តភាព ដើម្បីអបអរសាទរ «ទិវាសន្តិភាពនៅកម្ពុជា» គ្រោងនឹងធ្វើឡើងនៅថ្ងៃទី២៩ ខែធ្នូ ឆ្នាំ២០២៤ នៅពហុកីឡដ្ឋានមរតកតេជោ ដែលមានមហាជនចូលរួមប្រមាណជិត​ ៥ម៉ឺននាក់ ហើយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏នឹងអញ្ជើញជាអធិបតីដ៏ខ្ពង់ខ្ពស់ប្រគល់បាល់ ថតរូបអនុស្សាវរីយ៍​ និងសំណេះសំណាល ក្នុងព្រឹត្តិការណ៍នេះផងដែរ។

ដើម្បីឱ្យព្រឹត្តិការណ៍បាល់ទាត់មិត្តភាពនេះដំណើរការទៅដោយរលូន​ និងជោគជ័យ នារសៀលថ្ងៃទី៦​ ខែធ្នូ​ ឆ្នាំ២០២៤​ រដ្ឋបាលរាជធានីភ្នំពេញ​ បានរៀបចំកិច្ចប្រជុំមួយជាមួយស្ថាប័នពាក់ព័ន្ធនៅសាលារាជធានីភ្នំពេញ ដោយមានការអញ្ជើញចូលរួមជាអធិបតីភាពពី​ លោក​ នេត សាវឿន ឧបនាយករដ្ឋមន្ត្រី​,​ លោក យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី,​ នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានសហព័ន្ធកីឡាបាល់ទាត់កម្ពុជា,​ នាយឧត្តមសេនី ស ថេត អគ្គស្នងការនគរបាលជាតិ,​លោក សំហេង បុរស តំណាងលោកឧបនាយករដ្ឋមន្ត្រីហ៊ុន ម៉ានី ប្រធានសហភាពសហព័ន្ធយុវជនកម្ពុជា​ និងលោក ឃួង ស្រេង អភិបាលរាជធានីភ្នំពេញ។

នាយឧត្តមសេនីយ៍ សៅ សុខា បានលើកឡើងថា​ ការរៀបចំព្រឹត្តិការណ៍បាល់ទាត់នេះ ដើម្បីអបអរសាទរខួប២៦ឆ្នាំ ទិវាសន្តិភាពនៅកម្ពុជាដែលរកមកបានដោយ សម្តេចអគ្គមហាសេនាបតីតេជោ ហ៊ុន សែន។ អរគុណសន្តិភាព គឺអរគុណសម្តេចអគ្គមហាសេនាបតីតេជោ ហ៊ុន សែន។​ ដូច្នេះព្រឹត្តិការណ៍បាល់ទាត់នេះ​ ត្រូវតែធ្វើឡើងដោយភាពគគ្រឹកគ្រេងជាមួយការប្រគុំតន្ត្រី សម័យ បុរាណ។​ ចំពោះការងារសន្តិសុខ ត្រូវតែពង្រឹងឱ្យបានម៉ឹងម៉ាត់បំផុត។ សន្តិភាពមានតម្លៃណាស់កាត់ថ្លៃមិនបានសូម្បីតែប្រទេសខ្លះសុខចិត្តកាត់ឱ្យគេដូរយកសន្តិភាពក៏រកមិនទាន់បានផង។​ សព្វថ្ងៃបណ្ដាប្រទេសលើពិភពលោកគេមកស្វែងយល់​ និងយកបទពិសោធន៍សន្តិភាពនៅកម្ពុជាទៀតផង។

លោក​ ឃួង ស្រេង អភិបាលរាជធានីភ្នំពេញ បានលើកឡើងថា ព្រឹត្តិការណ៍នេះ មានអ្នកចូលរួមទស្សនាប្រមាណជិត៥ម៉ឺននាក់។ ដូច្នេះការរក្សាសន្តិសុខ សណ្តាប់ធ្នាប់ជារឿងសំខាន់បំផុត ដោយគ្រប់ស្ថាប័ន ត្រូវសហការគ្នាធ្វើឱ្យបានល្អបំផុត​ ជាមួយនិងការទទួលខុសត្រូវរៀងៗខ្លួន។

លោក នេត សាវឿន ឧបនាយករដ្ឋមន្ត្រី​ បានលើកឡើងថា​ បាល់ទាត់នេះ ផ្សារភ្ជាប់ជាមួយសន្តិភាព។ សន្តិភាពបានមកដោយលំបាក ដូច្នេះហើយបានគេយកប្រទេសកម្ពុជាជាគំរូ រហូតគេផ្តល់មេដាយសន្តិភាពជូនកម្ពុជា«សម្ដេចតេជោហ៊ុន សែន»​ ថែមទៀត។

ដូច្នេះត្រូវផ្សាយខ្លឹមសារនៃព្រឹត្តិការណ៍នេះឱ្យទូលំទូលាយ។​ ចំពោះការងារសន្តិសុខសណ្តាប់ធ្នាប់​ ត្រូវរួមគ្នាធ្វើ និងទទួលខុសត្រូវទាំងអស់គ្នា​ និងសុំឱ្យបានការចូលរួមពីក្រុមយុវជនស្ម័គ្រចិត្តផងដែរ។

ក្រៅពីការងារសន្តិសុខសណ្តាប់ធ្នាប់ ការងាររៀនចំចំណត​ និងការងារ អនាម័យ ក៏ត្រូវយកចិត្តទុកដាក់ផងដែរ ជាមួយនឹងការជំរុញឱ្យក្រសួងក្រសួងប្រៃសណីយ៍ និងទូរគមនាគមន៍បន្ថែមល្បឿនកម្លាំងសេវាទូរស័ព្ទ ដោយសារមនុស្សចូលរួមច្រើន។

សូមបញ្ជាក់ថា​ ព្រឹត្តិការណ៍បាល់ទាត់មិត្តភាព ដើម្បីអបអរសាទរ «ទិវាសន្តិភាពនៅកម្ពុជា» ថ្ងៃទី២៩ ខែធ្នូ ឆ្នាំ២០២៤ សាលារាជធានីភ្នំពេញសហការជាមួយសហព័ន្ធកីឡាបាល់ទាត់កម្ពុជា សហភាពសហព័ន្ធយុវជនកម្ពុជា (ស.ស.យ.ក.) ក្រុមបាល់ទាត់តារាកម្ពុជា និងសហព័ន្ធកីឡាប្រដាល់គុនខ្មែរ ដោយមានការប្រកួតចំនួន២គូ ដោយគូទី១ ក្រុមបាល់ទាត់គុនខ្មែរប្រកួតជាមួយក្រុមបាល់ទាត់ តារាកម្ពុជា និងគូទី២ ក្រុមបាល់ទាត់ ស.ស.យ.ក.ប្រកួតជាមួយក្រុមបាល់ទាត់តារាកម្ពុជា។

សម្តេចធិបតីនាយករដ្ឋមន្ត្រី នឹងអញ្ជើញជាអធិបតីដ៏ខ្ពង់ខ្ពស់សម្រាប់ការប្រកួតគូទី២ រវាងក្រុមបាល់ទាត់ ស.ស.យ.ក. និងក្រុមបាល់ទាត់តារាកម្ពុជា នៅវេលាម៉ោង​ ១៧:០០នាទី៕