ព្រះសីហនុ: ខេត្តព្រះសីហនុ ដែលស្ថិតនៅតាមបណ្តោយឆ្នេរសមុទ្រដ៏ស្រស់ស្អាតរបស់ប្រ ទេសកម្ពុជា កំពុងលេចចេញជាទិសដៅដ៏លេចធ្លោមួយសម្រាប់ភ្ញៀវទេសចរជាតិ និងអន្តរជាតិ។ ដោយសារភាពអំណោយផលនៃតំបន់ឆ្នេរដ៏ស្រស់ស្អាត រមណីយដ្ឋានប្រណិតៗ និងការអភិវឌ្ឍកាន់តែស៊ីវិល័យ ធ្វើឲ្យខេត្តនេះមានសក្តានុពលដ៏ធំធេងក្នុងការក្លាយជាមជ្ឈមណ្ឌលនាំមុខគេសម្រាប់វិស័យទេសចរណ៍នៅក្នុងតំបន់។

ជាមួយនឹងការផ្តល់ជូនដ៏សម្បូរបែប ទីតាំងយុទ្ធសាស្ត្រ និងការអភិវឌ្ឍជាបន្តបន្ទាប់ និងតាមរយៈការធ្វើឱ្យមានតុល្យភាពនៃការអភិវឌ្ឍជាមួយនឹងនិរន្តរភាព ខេត្តអាចបើកសក្តានុពលពេញលេញរបស់ខ្លួន ដោយទាក់ទាញភ្ញៀវទេសចររាប់លាននាក់ និងជំរុញឱ្យឧស្សាហកម្មទេសចរណ៍របស់កម្ពុជាឆ្ពោះទៅមុខ។

ខេត្តព្រះសីហនុមានឆ្នេរស្អាតជាច្រើនដូចជា ឆ្នេរឯករាជ្យ ( អូរតែលប្រាំពីរជាន់) ឆ្នេរអូរឈើទាល អូរត្រេះ ឆ្នេរហាវៃ ឆ្នេរម្លប់ជ្រៃ និងឆ្នេរសុខា ដែលទាក់ទាញភ្ញៀវទេសចរដែលស្វែងរកការសម្រាកលំហែ និងដំណើរផ្សងព្រេង។ ទឹកពណ៌ខៀវស្រងាត់ ខ្សាច់ពណ៌សក្បុស​ និងរុក្ខជាតិបៃតងខៀវស្រងាត់ផ្ដល់នូវការគេចចេញពីភាពអ៊ូអរនៃជីវិតក្នុងទីក្រុង។

លើសពីនេះ ខេត្តនេះ មានកោះតូចធំចំនួន ៣២ ជាពិសេសកោះនៅជិតៗដូចជា កោះរ៉ុង និងកោះរ៉ុងសន្លឹម ផ្តល់នូវភាពស្រស់ស្អាត និងឱកាសសម្រាប់ការមុជទឹកមើលជីវចម្រុះបាតសមុទ្រ និងទេសចរណ៍ធម្មជាតិ។

ការកើនឡើងនៃរមណីយដ្ឋានប្រណិតៗដូចជា ដឹរ៉ូយ៉ាល់ សេនកោះរ៉ុង​, តំបន់វិស្សមកាលទេសចរណ៍ឆ្នេរមាសឆ្នេរប្រាក់ និងគម្រោងវិនិយោគដ៏ធំ Bay of Lights ដែលនឹងក្លាយជាមជ្ឈមណ្ឌលហិរញ្ញវត្ថុ និងកន្លែលំហែកម្សាន្ត បានបង្កើនភាពទាក់ទាញរបស់ខេត្តនេះយ៉ាងខ្លាំង។

រមណីយដ្ឋានស្តង់ដារអន្តរជាតិទាំងនេះផ្តល់ជូននូវសេវាកម្មលំដាប់ពិភពលោក អាហារឆ្ងាញ់ៗ និងបទពិសោធន៍ផ្តាច់មុខ ដែលបំពេញតម្រូវការដែលកំពុងកើនឡើងសម្រាប់ការធ្វើដំណើរលំដាប់ខ្ពស់។ វត្តមានរបស់ពួកគេមិនត្រឹមតែទាក់ទាញភ្ញៀវទេសចរដ៏សម្បូរបែបប៉ុណ្ណោះទេ ប៉ុន្តែថែមទាំងពង្រីកការស្នាក់នៅរបស់ភ្ញៀវផងដែរ រួមចំណែកដល់កំណើនសេដ្ឋកិច្ចក្នុងស្រុក។

លើសពីតំបន់ឆ្នេរ, ខេត្តព្រះសីហនុសម្បូរទៅដោយបេតិកភណ្ឌវប្បធម៌ និងប្រវត្តិសាស្ត្រ។ វត្តលើ ទឹកធ្លាក់ក្បាលឆាយ និងឧទ្យានជាតិរាម គឺជាគោលដៅពេញនិយមសម្រាប់ភ្ញៀវទេសចរដែលចង់ស្វែងយល់ពីភាពចម្រុះនៃវប្បធម៌ និងធម្មជាតិក្នុងតំបន់។ ភាពទាក់ទាញទាំងនេះបង្ហាញពីអត្តសញ្ញាណតែមួយគត់របស់ខេត្ត និងបន្ថែមភាពស៊ីជម្រៅដល់ការផ្តល់ជូនទេសចររបស់ខ្លួន។

ការវិនិយោគថ្មីៗលើហេដ្ឋារចនាសម្ព័ន្ធ រួមទាំងអាកាសយានដ្ឋានអន្តរជាតិក្រុងព្រះសីហនុ កំពង់ផែទឹកជ្រៅ និងបណ្តាញផ្លូវថ្នល់ដែលប្រសើរឡើង បានធ្វើឱ្យខេត្តតំបន់ឆ្នេរមួយនេះ កាន់តែងាយស្រួលសម្រាប់អ្នកដំណើរ។ ការប្ដេជ្ញាចិត្តរបស់រដ្ឋាភិបាលក្នុងការអភិវឌ្ឍតំបន់នេះ ឲ្យក្លាយជាគោលដៅទេសចរណ៍ដ៏សំខាន់នៅកម្ពុជា។

ក្នុងឱកាសផ្តល់បទសម្ភាជាមួយក្រុមអ្នកសារព័ត៌មាន កាលពីថ្ងៃទី ១៥ខែធ្នូ ឆ្នាំ ២០២៤ ក្នុងអំឡុងធ្វើការផ្សព្វផ្សាយព័ត៌មានទ្រង់ទ្រាយធំពីសក្តានុពលខេត្តព្រះសីហនុ រយៈពេល ៣ថ្ងៃ ដែលដឹកនាំដោយក្លិបអ្នកកាសែតកម្ពុជា​ លោក ម៉ាង ស៊ីណេត អភិបាលខេត្តព្រះសីហនុ បានមានប្រសាសន៍ថា ខេត្តព្រះសីហនុ មានតំបន់ទេសចរណ៍ដ៏ទាក់ទាញ ទាំងទេសចរណ៍ធម្មជាតិ និងវប្បធម៌ ដែលក្នុងនោះ មានឆ្នេរសមុទ្រដ៏ស្រស់ស្អាត ដែលត្រូវបានចូលជាសមាជិកពេញសិទ្ធិក្លឹបឆ្នេរសមុទ្រដែលស្អាតបំផុតលើសកលលោកកាលពីឆ្នាំ ២០១១ រួមទាំងតំបន់កោះដ៏មានសក្តានុពលសម្បូរបែបជាច្រើន និងរមណីយដ្ឋាននានា កំពុងត្រូវបានជំរុញការអភិវឌ្ឍ និងកែលម្អកាន់តែទាក់ទាញ។

លោកអភិបាលខេត្តបន្តថា ចំពោះគោលដៅទេសចរណ៍វប្បធម៌វិញ គឺខេត្តព្រះសីហនុ មានវត្តជាច្រើន ដែលល្បីមានបារមីស័ក្តិសិទ្ធ ដូចជា វត្តក្រោម, វត្តលើ និងវត្តអូរត្រេះ​ ជាដើម ដែលភ្ញៀវទេសចរ និងប្រជាពលរដ្ឋនិយមទៅបួងសួងសុំសេចក្តីសុខ។

ខណៈដែលខេត្តព្រះសីហនុ ត្រូវបានគេមើលឃើញថា មានការរីកចម្រើនខ្លាំងក្នុងវិស័យទេសចរណ៍នោះ បញ្ហាប្រឈមដូចជា ការថែរក្សាបរិស្ថាន និងការអភិវឌ្ឍប្រកបដោយចីរភាពនៅតែមាន។ ហើយបញ្ហាសំខាន់មួយទៀត ដែលខេត្តព្រះសីហនុ ត្រូវការស្តារមុខមាត់របស់ខ្លួនឡើងវិញនោះ គឺពាក់ព័ន្ធការដោះស្រាយបញ្ហាល្បែងអនឡាញខុសច្បាប់ ដែលបង្កផលប៉ះពាល់យ៉ាងខ្លាំងដល់វិស័យទេសចរណ៍ និងការវិនិយោគ។

ពាក់ព័ន្ធបញ្ហានេះ លោកអភិបាលខេត្តព្រះសីហនុ ម៉ាង ស៊ីណេត បានលើកឡើងថា អាជ្ញាធរ និងអ្នកពាក់ព័ន្ធកំពុងធ្វើការដោះស្រាយបញ្ហាទាំងនេះ ដើម្បីធានាបាននូវសម្រស់ធម្មជាតិ និងបេតិកភណ្ឌវប្បធម៌របស់ខេត្តត្រូវបានថែរក្សាទុកសម្រាប់មនុស្សជំនាន់ក្រោយ។

លោកអភិបាលខេត្ត បានបញ្ជាក់ថា ដើម្បីប្រែក្លាយខេត្តព្រះសីហនុ ជាតារារះនាទិសនិរតី រាជរដ្ឋាភិបាល ក៏ដូចជា អាជ្ញាធរខេត្ត ចាត់ទុកវិស័យទេសចរណ៍ គឺអាទិភាពសម្រាប់ជំរុញកំណើនសេដ្ឋកិច្ច ដែលទាមទារជំរុញការអភិវឌ្ឍ និងអភិរក្សវិស័យនេះប្រកបដោយចីរភាព។

ទន្ទឹមនឹងនេះ លោក បានអះអាងថា ដើម្បីផ្តល់ទំនុកចិត្តដល់អ្នកវិនិយោគ និងភ្ញៀវទេសចរ អាជ្ញាធរខេត្ត បានដាក់ចេញវិធានការយ៉ាងម៉ឺងម៉ាត់ ដោយសហការជាមួយអង្គភាពមានសមត្ថកិច្ចពាក់ព័ន្ធក្នុងការទប់ស្កាត់ និងបង្ក្រាបបទល្មើសគ្រប់ប្រភេទ ឲ្យទាន់ពេលវេលា ក្នុងនោះរួមទាំងល្បែងអនឡាញខុសច្បាប់ ដែលរហូតមកទល់នឹងពេលនេះ អាជ្ញាធរខេត្តបានបង្ក្រាបល្បែងអនឡាញខុសច្បាប់ចំនួន ៨ទីតាំងហើយ ជាមួយការចាប់បញ្ជូនជនបរទេសរាប់ពាន់នាក់ត្រឡប់ទៅស្រុកកំណើតវិញ។

លោកអភិបាលខេត្តបន្ថែមថា តាមរយៈវិធានការទាំងនេះ សង្ឈឹមថា វិនិយោគិន និងភ្ញៀវទេសចរ នឹងមកខេត្តព្រះសីហនុកាន់តែច្រើន។

បើតាមលោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានឱ្យដឹងថា ដើម្បីទាក់ទាញភ្ញៀវទេសចរមកកម្សាន្តនៅខេត្តព្រះសីហនុ ឲ្យបានច្រើន និងស្នាក់នៅយូរ យើងកំពុងជំរុញការរៀបចំឲ្យមានសេវាកម្មកម្សាន្តសម្រាប់ពេលយប់, ផ្សាររាត្រី និងការបង្កើតរមណីយដ្ឋានអេកូកសិទេសចរណ៍ នៅតំបន់ដែលមានសក្តានុពលខ្ពស់ ដូចជា កោះរ៉ុង និងតំបន់រាម ជាដើម។

យោងតាមរបាយការណ៍របស់មន្ទីរទេសចរណ៍ខេត្តព្រះសីហនុ បានឲ្យដឹងថា ក្នុងរយៈពេល ១១ខែ ឆ្នាំ ២០២៤នេះ ខេត្តព្រះសីហនុ បានទទួលស្វាគមន៍ភ្ញៀវទេសចរជាតិ និងអន្តរជាតិសរុបប្រមាណ ៤,២៩លាននាក់ ថយចុះ ៩,១១ភាគរយ បើធៀនឹងរយៈពេលដូចគ្នាកាលពីឆ្នាំ ២០២៣។ ក្នុងនោះភ្ញៀវទេសចរជាតិ មានប្រមាណ ៤លាននាក់ និងភ្ញៀវទេសចរបរទេសប្រមាណជិត ២៩ម៉ឺនាក់ ដែលភាគច្រើនមានប្រភពទីផ្សារមកពីប្រទេស ចិន ឥណ្ឌូនេស៊ី វៀតណាម សហរដ្ឋអាមេរិក អាល្លឺម៉ង់ និងម៉ាឡេស៊ី៕

អត្ថបទ៖​ សៀម​ ប៊ុនធី